දකුණු ආසියාතික සහ අග්නිදිග ආසියාතික රටවල් 7ක ජාත්‍යන්තර සංවිධානයක් වන බහුආංශික තාක්ෂණ හා ආර්ථික සහයෝගිතාව සඳහා වන බෙංගාල බොක්ක ප්‍රවේශය හෙවත් බිම්ස්ටේක් සංවිධානයේ සමුළුව අනිද්දා (4) තායිලන්තයේ බැංකොක් නුවරදී ආරම්භ වන බව විදෙස් මාධ්‍ය වාර්තා කරයි. වෙළෙඳාම, ආරක්ෂාව සහ කලාපීය සහයෝගිතාව කෙරෙහි අවධානය යොමු කරමින් පැවැත්වෙන බිම්ස්ටේක් සමුළුව මෙවර පැවැත්වෙන්නේ වසර 3කට පසුව බවත්, අවසන් වරට 2022 දී පවත්වනු ලැබුවේ ශ්‍රී ලංකාවේදී බවත් විදෙස් මාධ්‍ය වැඩිදුරටත් වාර්තා කරයි.
බංග්ලාදේශය, භූතානය, ඉන්දියාව, මියන්මාරය, නේපාලය, ශ්‍රී ලංකාව සහ තායිලන්තය ඇතුළත් බිම්ස්ටේක් සංවිධානය 1997 වසරේදි බිහිවීමෙන් පසු මේ දක්වා බැංකොක් (2004), නවදිල්ලි (2008) නේපිටෝව් මියන්මාරය (2014), කත්මණ්ඩු (2018) සහ කොළඹ (2022) නගරවල සමුළු 5ක් පවත්වා ඇති අතර, මෙවර සමුළුව පවත්වනු ලබන්නේ 6 වැනි වරට බව විදෙස් මාධ්‍ය සඳහන් කරයි. වෙළෙඳාම සහ සංචාර ප්‍රගතිය සඳහා බෙංගාල බොක්ක ඔස්සේ භාණ්ඩ සහ මගී ප්‍රවාහනය ඉහළ නැංවීම සම්බන්ධව සමුද්‍රීය ප්‍රවාහන සහයෝගිතාව පිළිබඳ ගිවිසුමක් ද මෙහිදී අත්සන් තැබීමට නියමිත බව වාර්තා වේ.
