– වසර 5කට දේශපාලනය තහනම්
– 2027 ජනාධිපතිවරණ අපේක්ෂකත්වයත් අහිමි වෙයි
යුරෝපා සංගමයේ අරමුදල් වංචා කිරීමේ චෝදනාවට වරදකරු වූ ප්‍රංශයේ අන්ත දක්ෂිණාංශික දේශපාලන නායිකා මැරින් ලේ පෙන්ට පැරිස් නුවර අධිකරණයකින් වසර 4ක සිරදඬුවමක් නියම කළ බව විදෙස් මාධ්‍ය වාර්තා කරයි. 56 හැවිරිදි මැරීන් ලේ පෙන් යුරෝපා සංගමයේ අරමුදලින් යුරෝ මිලියන 4.1ක මහජන මුදල් අවභාවිත කිරීමේ වරදකරු කරමින් වසර දෙකකට අත්හිටුවන ලද සිවුවසරක සිරදඬුවම නියම කර ඇතැයි ද, වසර 5කට දේශපාලනය ක්‍රියාකාරකම් තහනම් කර ඇතැයි ද විදෙස් මාධ්‍ය වැඩිදුරටත් වාර්තා කරයි. ඒ අනුව ඇයට ලබන 2027 ප්‍රංශ ජනාධිපතිවරණයට තරග කිරීමේ අවස්ථාව ද අහිමි වූ බව වාර්තා වේ. ප්‍රංශයේ නැෂනල් රැලි පක්ෂයේ නායිකාව වන මැරින් යුරෝපා පාර්ලිමේන්තු අරමුදල් සිය පක්ෂයේ වැඩකටයුතු සඳහා සාමාජිකයන් අතර බෙදා දුන් බවට තහවුරු වී ඇති බවත්, ඇය සමඟ යුරෝපා පාර්ලිමේන්තුවේ මන්ත්‍රීවරු 9 දෙනකු ඇතුළු පාර්ලිමේන්තු සහායකයන් 12 දෙනකු වරදකරුවන් බවට තහවුරු වී ඇති බවත් විදෙස් මාධ්‍ය සඳහන් කරයි. ඇය විසින් යුරෝපා සංගමයේ අරමුදල් අවභාවිත කිරීම හේතුවෙන් යුරෝ මිලියන 2ක දඩ මුදලක් ගෙවීමට ද අධිකරණය නියම කර ඇති අතර, දඬුවමට එරෙහිව අභියාචනාවක් ගොනු කරන බව ඇගේ නීතිඥවරයා ප්‍රකාශ කර ඇතැයි ද වාර්තා වේ. ප්‍රංශයේ වත්මන් ජනාධිපති එමානුවෙල් මැක්‍රොන්ගේ ප්‍රබලතම ප්‍රතිවාදිනිය වන ඇය එරට දේශපාලනය උඩුයටිකුරු කිරීමේ බලවත්ම පුද්ගලයා බවට පත්වි සිටි අතර, මීට පෙර ජනාධිපතිවරණ 3කට තරග කළ අතර, ලබන 2027 ජනාධිපතිවරණයේදී ඇය ජයග්‍රහණය කරනු ඇතැයි අනාවැකි පළවී තිබිණි.
