ඉදිරි වසර 30 ඇතුළත ජපානයේ දැවැන්ත භූ කම්පනයකින් හටගන්නා සුනාමියක් හේතුවෙන් ලක්ෂ 3කට ආසන්න පිරිසක් ජීවිතක්ෂයට පත්වනු ඇතැයි ජපාන කාලගුණ විද්‍යා ඒජන්සියෙන් වාර්තාවක් භාරදී ඇතැයි එරට රජය ප්‍රකාශ කළ බව විදෙස් මාධ්‍ය වාර්තා කරයි. දකුණු ජපානයේ හොන්ෂූ දූපත ආසන්නයේ කිලෝමීටර් 800ක් ගැඹුරු මුහුදේ පිහිටි නන්කායි අගල ලෙස හඳුන්වනු ලබන කලාපයේ එම භූ කම්පනය සිදුවනු ඇති බවටත්, එහි බලපෑමෙන් හටගන්නා සුනාමිය එම කලාපයේ ජීවිත 2,98,000ක් බිලිගනු ඇති බවටත් ජපාන කාලගුණ විද්‍යා ඒජන්සිය ඇස්තමේන්තු කර ඇත්තේ දීර්ඝ කාලයක් පුරා සිදු කළ අධ්‍යයනයකින් පසුව බව ද විදෙස් මාධ්‍ය වැඩිදුරටත් වාර්තා කරයි. අමෙරිකානු ඩොලර් ට්‍රිලියන 2කට අධික හානියක් සිදුවනු ඇතැයි ඇස්තමේන්තු කර ඇති මේ ‘මෙගා’ සුනාමිය පිළිබඳ ජපාන භූ විද්‍යා ඒජන්සිය පළමුවරට අනාවරණය කර ඇත්තේ 2014 වසරේදී වන අතර, ඒ වන විට සිදුවනු ඇතැයි ඇස්තමේන්තු කළ ජීවිත හානිය 3,23,000ක් වු බව ද වාර්තා වේ. භූ කම්පන සුලබව සිදුවන බැවින් හානිය අවම කරගැනීම සඳහා අවදානම් කලාපවලින් ජනතාව ඉවත් කිරීම සහ උස් ගොඩනැඟිලි ඉදි කිරීමෙන් වැළකී සිටීම ඇතුළු පියවර රැසක් ජපාන රජය මඟින් ක්‍රියාත්මක කර ඇතැයි ද වාර්තා වේ. භූ විද්‍යා ඒජන්සිය ලබා දුන් වාර්තාව පදනම් කරමින් මෙගා සුනාමියට මුහුණ දිය යුතු ආකාරය සම්බන්ධව මේ වන විට ජපාන රජයේ දැඩි අවධානය යොමුවී ඇතැයි ද වාර්තා වේ. කෙසේ වුවද එම මෙගා සුනාමිය පිළිබඳ පළමුවරට 2014දී පර්යේෂණ වාර්තාවක් ලැබීමෙන් පසුව ගත වූ දශකය තුළ එම කලාපයේ ජනතාව අවම කිරීමට ජපාන රජය අවශ්‍ය පියවර ගෙන ඇතැයි ද වාර්තා වේ.
නන්කායි අගල නමැති එම කලාපයේ ගැඹුරු මුහුදේ සියවස් ගණනාවක සිට පවතින පිලිපීන සාගර භූ තැටිය සහ ජපානයේ යුරේසියානු භූ තැටිය අතර හිඩැසක් නිර්මාණය වීමත්, දරුණු සුනාමි තත්ත්වයක් මතු කරමින් එය සෑම වසර 100කට වරක් එකිනෙක හා ගැටීමත් අධ්‍යයනය කරමින් එරට භූ විද්‍යා ඒජන්සිය මේ වාර්තාව සකස් කර ඇතැයි විදෙස් මාධ්‍ය සඳහන් කරයි. මීට පෙර අවසන් වරට නන්කායි අගල සක්‍රීය වී ඇත්තේ 1946දිය. මේ වන විට නැවත එවැනි සුනාමියක් හට ගැනීමේ සම්භාවිතාව 82% දක්වා ඉහළ ගොස් ඇතැයි ද, රිච්ටර් මාපකයේ 9.1ක් දක්වා භූ කම්පනයක් සිදුවිය හැකි අස්ථාවරත්වයක් මතුවී ඇතැයි ද ජපාන රජය ප්‍රකාශ කර තිබේ.
