කළුතර නගරයේ ප්‍රධාන බස් නැවතුමේ සිට බණ්ඩාරගම ප්‍රධාන බස් නැවතුම වෙත ,කිසිදු ලංගම බස් රථයක් ධාවනය නොවීම පිළිබඳව ප්‍රදේශවාසීන් සහ පාසල් දරු දැරියෝ විමතියට පත් වී සිටිති.
එම ගමන් මාර්ගයේ පෙ.ව.5.30ට පමණ ගමන් ආරම්භ කරන පුද්ගලික බස් රථ ධාවනයද ප.ව.6.00න් පසුව නතර වන අතර, සැන්දෑ කාලයේදී හෝ රාත්‍රී කාලයේදී කළුතර නගරයේ සිට බණ්ඩාරගම නගරය වෙත හෝ ඒ අතරමග ගම්බිම් බලා යෑමට කිසිදු මගී ප්‍රවාහන බස් රථයක් දක්නට නොලැබීම වසර ගණනාවක් මුළුල්ලේ ජනතාව මුහුණ දී සිටින ඛේදනීය තත්ත්වයකි.
කළුතර බණ්ඩාරගම මගී ප්‍රවාහන බස් රථ සේවය හරිහැටි සිදු නොවීම සහ ලංගම මගී ප්‍රවාහන බස් රථ ධාවනය නොවීම පිළිබඳව පසුගිය වසර කිහිපය මුළුල්ලේ, කළුතර ප්‍රාදේශීය සභාවේ සහ කළුතර නගර සභාවේ මාසික සභා වාරවලදී අවස්ථා ගණනාවකදීම පක්ෂ විපක්ෂ මන්ත්‍රීවරුන් විසින් පෙන්වා දුන්නද, සාකච්ඡා කළද, ඒ සඳහා විවිධ යෝජනා ඉදිරිපත් කළද එකකින්වත් මෙතෙක් කිසිදු ප්‍රතිඵලයක් ලැබී නැත.
මුදල් ගෙවා මාසික සීසන් පත් ලබාගත් පාසල් දරු දැරියෝ විශාල සංඛ්‍යාවක් මේ නිසා දැඩි අපහසුතාවයට පත් වී සිටින අතර, මේ පිළිබඳව අදාළ බලධාරීන් අවධානය යොමු නොකරන්නේ නම්, කළුතර දිස්ත්‍රික් සම්බන්ධීකරණ කමිටුවට මෙම ගැටලු ඉදිරිපත් කොට ඊට ස්ථිරසාර විසඳුමක් ලබා දෙන ලෙස, මාලිමා රජයෙන්වත් ඉල්ලා සිටින බව ප්‍රදේශවාසීහු දන්වා සිටිති.
කළුතර නගරයේ සිට බණ්ඩාරගම නගරය දක්වා වූ කිලෝමීටර ගණනාවක් දුර ප්‍රමාණයක් වූ බස් ධාවන මාර්ගයක ලංගම මගී ප්‍රවාහන බස් රථයක් ධාවනය නොවන දිවයිනේ ඇති එකම මාර්ගය මෙය විය හැකි බවද ප්‍රදේශවාසීහු පවසති.
එච්.එල්.එස්.ශාන්ත
නුගගොඩ,වස්කඩුව
