Home » මිනිපේ මහ පාලම හන්දියේ අඩුපාඩු ගොඩයි

මිනිපේ මහ පාලම හන්දියේ අඩුපාඩු ගොඩයි

by mahesh
April 2, 2025 4:00 pm 0 comment

මිනිපේ මහ ගොවි ජනපදයේ පළමු පියවර පාලම හන්දිය සිට මිනිපේ ප්‍රධාන අමුණ දක්වා වූ කොටසේ ග්‍රාම නිලධාරි වසම් 18ක ගොවි ගම්මාන 170කට ආසන්න සංඛ්‍යාවක් නියෝජනය කරනු ලබයි.

අතිවිශාල ජනතාවක් ගැවසෙන පාලම හන්දිය නගරයට අවශ්‍ය පොදු පහසුකම් සලසාදීමට අදාළ අංශ අපොහොසත් වීම හේතුවෙන් නගරයට පැමිණෙන ජනතාව සහ පාසල් දරුවන් වසර ගණනාවක සිටම විවිධ අපහසුතාවන්ට පත්ව සිටින බව නගරවාසිහු පවසති.

ගොවි ජනපදයේ පළමු පියවරේ පිහිටි ගම්මානවල ජනතාව සහ පාසල් දරුවන් සිය අවශ්‍යතා සඳහා භාවිත කරනු ලබන්නේ පාලම් හංදියෙන් ආරම්භව රන්දෙණිගල දෙසට දිවෙන මාර්ගයයි. වර්තමානයේ මෙම මාර්ගය ප්‍රධාන ආර්ථික මාර්ගයක් වශයෙන්ද හැඳින්වෙන අතර රන්දෙණිගල මාර්ගය හරහා නුවරඑළිය, වළපනේ සහ හඟුරන්කෙත වැනි නගර කරා මෙන්ම එම ප්‍රදේශවල සිට අම්පාර, පොලොන්නරුව, මහියංගනය, හසලක සහ දෙහිඅත්තකණ්ඩිය වැනි ප්‍රදේශ කරාද මගී බස්රථ ඇතුළු පෞද්ගලික වාහනද ධාවනය කරනු ලබයි. ඊට අමතරව දිවා රාත්‍රී රථවාහන ධාවනය වෙන අම්පාර – කොළඹ ප්‍රධාන මාර්ගය ද පිහිටා ඇත්තේ පාලම්හංදිය නගරය හරහාය. මේ අනුව දිසා තුනකට ගමන් කිරීමට මාර්ග ඉදිවී ඇති පාලම්හංදිය නගරය ජනපදයේ කේන්ද්‍රස්ථානයක් වී තිබේ.

මිනිපේ විවිධ සේවා සමුපකාර සමිතිය ඇතුළු අර්ධ රාජ්‍ය හා පෞද්ගලික ව්‍යාපාරික ආයතන රාශියක් මෙම නගරයේ තිබීම නිසා පාලම්හංදිය නගරය ද ජනාකීර්ණ නගරයක් බවට පත්ව තිබේ.

ඩබ්ලිව්. ඒ. රංජිත් මහතා

පාලම්හංදිය නගරය කියන්නේ නොනිදන නගරයක් කීවොත් නිවැරැදියි. එයට හේතුවන්නේ මේ නගරය හරහා දිවා රාත්‍රී මගී බස් රථ සේවාවක් සහ ව්‍යාපාරික රථවාහන ගමන් කිරීමයි. ගොවි ජනපදයේ ගැමියා විවිධ ප්‍රදේශවලට යෑමටත් පිට පළාත්වල රැකියාවන් ඇතුළු විවිධ අවශ්‍යතාවන් සඳහා ගොස් ගමට යෑමට වාහනයක් ගැනීමට පැමිණෙන්නේ පාලම්හංදියටයි. නගරයට පැමිණෙන පාසල් දරුවන් ඇතුළු ගැමියන්ට අවශ්‍ය ජල පහසුකම් වගේම වැසිකිළි කැසිකිළි පහසුකම් නගරයේ නොමැතිකම හරිම ගැටලුවක් වී තිබෙනවා.

ඒ වගේම තමයි මහියංගණය සිට රන්දෙණිගල දක්වා ගමන් කරන බස් රථයක් ගැනීමට රැඳී සිටින ස්ථානයේ සහ මහනුවර දෙස සිට පැමිණෙන බස්රථ නතර කරන ස්ථානයේ මගියාට බස් රථයක් පැමිණෙන තුරු රැඳී සිටීමට සිදුව ඇත්තේ කඩපිලක හෝ අව්වට වේළෙමින් වැස්සට තෙමෙමිනුයි. මෙය ජාතික ආහාර නිෂ්පාදනයට දායක වී සිටින මිනිපේ ගොවියා සහ පාසල් දරුවා දැඩි අපහසුතාවකට පත් කරවන්නක් වී තිබීම කනගාටුදායකය.

නගරයේ අඩුපාඩු ගැන කතා කරනවා වාගේම නගරයට ආසන්නයේ තිබෙන මහවැලි ගඟ හරහා ඉදිකර තිබෙන මහපාලම ගැනත් කතා කළ යුතුයි. මේ මහපාලම රාත්‍රී කාලයට අඳුරෙන් පිරී පවතිනවා. වීථී පහන් නැහැ. ඇත්තේ වීථි පහන් කණු පමණයි. පාලම්හංදිය අවට ගම්වල පදිංචි බොහෝ පිරිස් ඇඟලුම් ආයතන, පෞද්ගලික ආයතනවල සහ වෙනත් ආයතනවල රැකියාවන් සඳහා ගොස් රාත්‍රී ආපසු සිය නිවෙස් කරා ගමන් කරන්නේ පා ගමණෙනුයි.

මහියංගණය නගරයේ රාත්‍රී කාලයේ තිබෙන උපකාරක පංතිවලට සහභාගි වෙන ඇතැම් ළමයිනුත් මහපාලම මතින් එන්නේ පාගමණෙනුයි. මේ පාලම රාත්‍රී කාලයට අඳුරෙන් පිරී පැවතීම පා ගමන් කරුවාගේ ගමනට දැඩි බාධාවකි. විශේෂයෙන් මහපාලම හා පාලම්හංදිය අවට ප්‍රදේශය නිතර වල්අලි රංචු ගැවසෙන ප්‍රදේශයකි. ඒ නිසා පාලමේ පවතින අඳුර පළවා හැරීමට අදාළ ආයතන අවධානය යොමු කරන මෙන්ද අපි ඉල්ලා සිටිනවා.

ප්‍රදේශයේ ගොවි ජනතාව පාසල් දරුවා පත්ව සිටින මේ අපහසුතාවයෙන් මුදා ගැනීමට මිනිපේ ප්‍රාදේශීය සභාවේ හෝ මාර්ග සංවර්ධන අධිකාරියේ විශේෂ අවධානය යොමු කරන මෙන් ජනපදවාසීන් වශයෙන් අපි ඉල්ලා සිටිනවා.

ඊ.එම්.එස්. ඒකනායක 
හසලක

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT