මහනුවර ශ්‍රී දළදා මාලිගයේදී ඓතිහාසික ශ්‍රී දන්ත ධාතුන් වහන්සේ මහජනතාව වෙනුවෙන් ප්‍රදර්ශනය කෙරෙන ‘ශ්‍රී දළදා දැක්ම’ එළැඹෙන 18දා සවස ආරම්භ කෙරේ. එදින සවස 3 සිට 5.30 දක්වා පැවැත්වෙන ශ්‍රී දළදා ප්‍රදර්ශනය නැවත 19දා සිට 27දා දක්වා දහවල් 12 සිට සවස 5.30 දක්වා පවැත්වීමට කටයුතු යොදා ඇත. ඒ අනුව දින 10කදී පැවැත්වෙන මේ පින්කමට ඓතිහාසික මහමළුවේ සිට ප්‍රධාන වාහල්කඩ තුළින් පෝලිම් 3ක් ඔස්සේ ශ්‍රී දළදා මාලිගය දක්වා පැමිණීමට ඉඩ සලසා ඇත. එසේම, මේ සඳහා ඇතුළු වීමට විශේෂ අවසරපත් නිකුත් කර නොමැති අතර ජනතාවට පෝලිම් මඟින් පැමිණ ශ්‍රී දළදා වහන්සේ වන්දනා කිරීමට ඉඩ සලසා ඇත. ජනතාවට අවශ්‍ය සනීපාරක්ෂක පහසුකම් සපයා තිබේ.
එසේම, දන්සල් පැවැත්වීමට කැමැති පින්වතුන්ට ඒ සඳහා දළදා මාලිගයෙන් නිසි පරිදි අවසර ලබාගෙන ඒ කටයුතු වල නිරත වීමට පුළුවන. මෙවර ශ්‍රී දළදා ප්‍රදර්ශනයක් පැවැත්වෙන්නේ වසර 16කට පසුවය.
