සමෘද්ධිමත් ජාතියක පදනම වන්නේ ශක්තිමත් සෞඛ්‍ය සේවා පද්ධතියක් බව වත්මන් රජයේ පිළිගැනීම බව සෞඛ්‍ය හා ජනමාධ්‍ය ඇමැති, වෛද්‍ය නලින්ද ජයතිස්ස මහතා පැවැසීය.
ඇමැතිවරයා මේ බව පැවැසුවේ ශ්‍රී ලංකා වෛද්‍ය පරිපාලකයන්ගේ විද්‍යායතනයේ 2025 වර්ෂය සඳහා නව සභාපතිවරයාගේ පදවි ප්‍රාප්තිය වෙනුවෙන් පශ්චාද් වෛද්‍ය උපාධි ආයතන ශ්‍රවණාගාරයේදී පසුගියදා පැවැති උත්සව අවස්ථාවට එක් වෙමිනි.
ශ්‍රී ලංකා වෛද්‍ය පරිපාලකයන්ගේ විද්‍යායතනයේ 32 වැනි සභාපතිවරයා වන විශේෂඥ වෛද්‍ය සුදත් ධර්මරත්න මහතාට හිටපු සභාපති, සෞඛ්‍ය හා ජනමාධ්‍ය අමාත්‍යාංශයේ අතිරේක ලේකම් විශේෂඥ වෛද්‍ය කුමාර වික්‍රමසිංහ මහතා විසින් සභාපති විශේෂ පලඳනාව මෙහිදී පලඳවන ලදි.
එහිදී වැඩිදුරටත් අදහස් දැක්වූ ඇමැතිවරයා මෙලෙස ද කීවේය.
“නව පුනරුද යුගයකට ගමන් කරමින් සිටින අවස්ථාවක මෙරට සෞඛ්‍ය ක්ෂේත්‍රයේ ඉදිරි සංවර්ධන සැලැස්ම සහ දැක්ම පිළිබඳ පැහැදිලි අවබෝධයක් මේ වන විට වෛද්‍ය පරිපාලකයන්ට මෙන්ම සෞඛ්‍ය අමාත්‍යාංශයට තිබෙනවා. එය ක්‍රියාවට නැංවීමට සියලු දෙනා කැපවී කටයුතු කළ යුතුයි.
මෙවර අය-වැයෙන් ඉතිහාසයේ වැඩිම මූල්‍ය ප්‍රතිපාදන සෞඛ්‍ය සේවාවට වෙන් කිරීමට වත්මන් රජය පියවර ගෙන තිබෙනවා. එතුළින් අපේක්ෂා කරන්නේ මෙරට ජනතාවට විධිමත්, ගුණාත්මක සෞඛ්‍ය සේවාවක් දීමයි. එම කාර්යයේදී වෛද්‍ය පරිපාලකයන්ගේ විශේෂඥතාව, නායකත්වය සහ උපාය මාර්ගික අධීක්ෂණය අත්‍යවශ්‍ය වෙනවා.
වත්මන් රජයේ ප්‍රතිපත්ති දිශානතියේ තීරණාත්මක අංගයක් ලෙස ප්‍රාථමික සෞඛ්‍ය සේවාවේ නම් කර තිබෙනවා. ප්‍රාථමික සෞඛ්‍ය සේවා සංවර්ධනයෙන් ද්විතීයික සහ තෘතීයික සෞඛ්‍ය ආයතනවලට තිබෙන රෝගී තදබදය අඩු කරගැනීමට බෙහෙවින් ඉවහල් වෙනවා.
තිරසර සංවර්ධන ඉලක්ක සාක්ෂාත් කරගැනීම සෞඛ්‍ය අමාත්‍යාංශයේ ප්‍රමුඛතම අරමුණක්. වර්තමානය වන විට බෝ නොවන රෝග ඊට යම් අභියෝගයක් එල්ල කරනවා. එය පාලනය කිරීමට රජය සමස්ත සෞඛ්‍ය කාර්ය මණ්ඩලය සමඟ දැඩි පරිශ්‍රමයක් ගන්නවා. මෙරට වයස්ගත ජනතාවට ගෞරවනීය ජීවන තත්ත්වයක් ළඟා කර දීම නව රජයේ ඉලක්ක ගත සෞඛ්‍ය වැඩපිළිවෙළේ ඉහළින්ම සඳහන්.
ක්ලීන් ශ්‍රී ලංකා වැඩපිළිවෙළට සමපාත වෙමින්, තිරසර අපද්‍රව්‍ය කළමනාකරණ පිළිවෙත් අනුගමනය කිරීමෙන් පරිසර හිතකාමී සෞඛ්‍ය සේවා පද්ධතියක් නිර්මාණය කළ හැකියි. එම නිර්මාණකරණයේදී වෛද්‍ය පරිපාලකයන්ට විශාල වගකීමක් පැවරෙනවා. ගෝලීය වශයෙන් සිදු වන තොරතුරු තාක්ෂණයේ වේගවත් දියුණුව මෙරට සෞඛ්‍ය සේවාවේ විප්ලවීය වෙනසක් සිදු කිරීමට හැකි වෙනවා. කෘත්‍රිම බුද්ධිය (AI) සාමාන්‍ය පරිපාලන ක්‍රම උසස් තාක්ෂණික පරිපාලන මට්ටමකට ගෙන ඒමට යොදා ගත හැකියි. සත්කාර සේවාවේ කාර්යක්ෂමතාව වැඩිදියුණු කිරීමට Al තාක්ෂණය ඒකාබද්ධ කරගැනීමට හැකි නියමු ව්‍යාපෘතියක් අවශ්‍යයි.
වෛද්‍ය පරිපාලකයන්ගේ විද්‍යායතනයේ 32 වැනි සභාපතිවරයා ලෙස විශේෂඥ වෛද්‍ය සුදත් ධර්මරත්න මහතා පත්වීමේ උත්සව අවස්ථාවට සහභාගි වීමට ලැබීම මහත් ගෞරවයක්. සෞඛ්‍ය අමාත්‍යාංශයේ ජ්‍යෙෂ්ඨ වෛද්‍ය පරිපාලකයකු සහ පශ්චාද් උපාධි වෛද්‍ය ආයතනයේ ජ්‍යෙෂ්ඨ කථිකාචාර්යවරයකු වන විශේෂඥ වෛද්‍ය ධර්මරත්න මහතා මෙරට ජාතික සෞඛ්‍ය සේවා පද්ධතියට ඉමහත් දායකත්වයක් දී ඇති වෛද්‍ය පරිපාලකවරයෙක්.”
මේ අවස්ථාවට විද්‍යා හා තාක්ෂණ ඇමැති, ආචාර්ය ක්‍රිෂාන්ත අබේසේන, සෞඛ්‍ය හා ජනමාධ්‍ය අමාත්‍යාංශයේ ලේකම් විශේෂඥ වෛද්‍ය අනිල් ජාසිංහ, සෞඛ්‍ය සේවා අධ්‍යක්ෂ ජනරාල් වෛද්‍ය අසේල ගුණවර්ධන, කොළඹ විශ්වවිද්‍යාලයේ වෛද්‍ය පීඨයේ පීඨාධිපති මහාචාර්ය වජිර දිසානායක, පශ්චාද් වෛද්‍ය උපාධි ආයතනයේ අධ්‍යක්ෂ මහාචාර්ය සේනක රාජපක්ෂ, ශ්‍රී ලංකා වෛද්‍ය පරිපාලකයන්ගේ විද්‍යායතනයේ ලේකම් වෛද්‍ය ඇන්ටන් ප්‍රනාන්දු, භාණ්ඩාගාරික වෛද්‍ය ප්‍රියන්ත කරුණාරත්න, ශ්‍රී ලංකා වෛද්‍ය සංගමයේ සභාපති වෛද්‍ය සුරන්ත පෙරේරා මහත්වරුන්, සෞඛ්‍ය හා ජනමාධ්‍ය අමාත්‍යාංශයේ අතිරේක ලේකම්වරුන්, විශේෂඥ වෛද්‍යවරුන්, වෛද්‍යවරුන් ඇතුළු පිරිසක් එක් වූහ.
සන්ධ්‍යා කරුණාරත්න
