සිංහල හා හින්දු අලුත් අවුරුදු සමය ළඟ එනවා. ලොකු, කුඩා කවුරුත් තෙල්, සීනි, පිටි අධික ආහාර වැඩිපුර ගන්නා කාලයක් විදියටත් මෙය පෙන්වා දෙන්න වෙනවා. සීනි අඩුවෙන් යොදමින් අවුරුදු කැවිලි පෙවිලි සකසා ගැනීමෙන් අපට බෝ නොවන රෝග අවදානමෙන් මිදිය හැකියි. එහිදී විකල්පයක් විදියට පලතුරු වැඩිපුර භාවිත කළ හැකි නම් බෝ නොවන රෝග අවදානම අධික සීනි, පිටි, තෙල් භාවිතය බොහෝ දුරට අඩුකර ගැනීමටත් පුළුවන. පොඩිත්තන් අතුරෙනුත් පූර්ව දියවැඩියා ලක්ෂණ සමඟ අධික තරබාරුව ආදිය බහුලව දක්නට ලැබෙන මෙකල ආහාර පාන පමණක්ම නෙවෙයි, නෑදෑ, වැඩිහිටියන් සමඟ එකට කෙළිදෙළින් ගත කිරීමත් ඉතා වැදගත්. දශක කිහිපයකට කලින් වෛද්‍ය සිසු සිසුවියන්ට කරුණු හැදෑරීම සඳහා දියවැඩියාව වැලඳුණු ළමයකු සොයා ගැනීම දුෂ්කර වුවත් දැන් වසරකට සිය ගණනක් ළමා රෝහලට එන තත්ත්වයක් ඇති වීම බෙහෙවින් අසතුටුදායකයි. ඉතින්, රැකවරණය, ආදරය ළමුන්ට අත්‍යවශ්‍ය බවත් අවධාරණය කළ යුතුයි. එවැනි රැකවරණයක් ඇති ආහාරපාන පමණක් නොවෙයි, අවුරුදු සමයේදී ක්‍රීඩාවල නිරත වීමත් මෙරට සංස්කෘතිය සමඟ බැඳී පවතින්නක්. දරුවන්ගේ ක්‍රියාකාරිත්වය නීරෝගි දිවියකට අත්‍යවශ්‍ය කරුණක්. ක්‍රීඩාව ඊට කදිම මඟක්. උත්සව සමයට සීමා නොවී දිනපතා ක්‍රීඩාවට කාලය වෙන් කරවා ගැනීම කවුරුත් අනිවාර්යයෙන්ම කළ යුත්තක්. සූර්ය තාපය අධික විටෙකදී අධිකව වෙහෙස වෙමින් මැරතන්, පාපැදි තරග ආදියෙහි යෙදෙන්නේ නම් ජලය වැඩිපුර පානය කිරීමට වග බලා ගත යුතුයි. එසේම, දෙහි, දොඩම්, නාරං, දෙළුම් ආදී ස්වභාවික පලතුරු දියර සීනි රහිතව හෝ අඩුවෙන් ගැනීම වැදගත්. එසේම, ඊට ලුණු ස්වල්පයක් එක්කර ගැනීමෙන් අව් රශ්මියත් සමඟ වැඩිපුර ලවණ සිරුරෙන් බැහැර වීමේ අඩුව සපුරා ගත හැකියි.
උපදෙස් – රිජ්වේ ආර්යා ළමා රෝහලේ ළමා රෝග විශේෂඥ වෛද්‍ය,
දීපාල් පෙරේරා
නුවන් ජයවික්‍රම
