Home » ඊජිප්තුවේ ශ්‍රී ලංකා තානාපති සිසිර සෙනවිරත්න එරට ජනපතිට අක්ත පත්‍ර පිළිගන්වයි

ඊජිප්තුවේ ශ්‍රී ලංකා තානාපති සිසිර සෙනවිරත්න එරට ජනපතිට අක්ත පත්‍ර පිළිගන්වයි

by sachintha
March 28, 2025 4:18 pm 0 comment

ඊජිප්තුවේ ශ්‍රී ලංකා තානාපතිවරයා වශයෙන් පත්කළ සිසිර සෙනවිරත්න මහතා එරට ජනාධිපති අබ්දෙල් ෆටා අල් සිසි මහතා වෙත අක්ත පත්‍ර ප්‍රදානය කර තිබේ.

එරට කයිරෝ නුවර පිහිටි අලි – ඉටිහාඩියා මන්දිරයේදී ශ්‍රී ලංකා තානාපතිවරයා අක්ත පත්‍ර පිළිගන්වා තිබෙන අතර, අනතුරුව පැවති සාකච්ඡාවේදී ශ්‍රී ලංකා ජනාධිපතිවරයාගේ සුබ පැතුම් ඊජිප්තු ජනාධිපතිවරයා වෙත පිළිගන්වා තිබෙන බව විදේශ කටයුතු අමාත්‍යාංශය පවසයි.

එහිදී ශ්‍රී ලංකා නව තානාපතිවරයාට සුබ පැතුම් එක්කර තිබෙන අබ්දෙල් ෆටා අල් සිසි මහතා ඉදිරියේදී ඔහුගේ නිල රාජකාරි සහ මෙහෙවර ඉටු කිරීමේදී ඊජිප්තුවේ පූර්ණ සහයෝගය දෙන බවට සහතික වී තිබේ.

ඊජිප්තුවට සමගාමීව සිසිර සෙනවිරත්න මහතා, ශ්‍රී ලංකා තානාපතිවරයා ලෙස ලිබියානු රාජ්‍යය සුඩාන් ජනරජය, මොරොක්කෝ රාජධානිය, ටියුනීසියා ජනරජය, එරෙට්‍රියා රාජ්‍යය සහ ඇල්ජීරියානු මහජන ප්‍රජාතන්ත්‍රවාදී ජනරජය යන රටවලට ද අක්ත පත්‍ර පිළිගන්වා ඇත.

ඊජිප්තුවේ ශ්‍රී ලංකා තානාපති ධුරයට පත්වීමට පෙර තානාපති සිසිර සෙනවිරත්න මහතා කොළඹ විදේශ කටයුතු, විදේශ රැකියා සහ සංචාරක අමාත්‍යාංශයේ කොන්සියුලර් කටයුතු අධ්‍යක්ෂ ජනරාල්වරයා ලෙස සේවය කර තිබෙන අතර, වසර 22 ක පමණ පළපුරුද්දක් සහිත වෘත්තීය රාජ්‍යතාන්ත්‍රික නිලධාරියෙකි.

2003දී ශ්‍රී ලංකා විදේශ සේවයට බැඳුණු ඒ මහතා විදේශ කටයුතු අමාත්‍යාංශයේ සහ විදේශයන් හි ශ්‍රී ලංකා දූත මණ්ඩලවල විවිධ තනතුරු දරා ඇත. ඊජිප්තුවේ තානාපති ධුරයට පත්වීමට පෙර ඉතාලියේ ශ්‍රී ලංකා තානාපති කාර්යාලයේ නියෝජ්‍ය දූත මණ්ඩල ප්‍රධානියා ලෙස සේවය කර ඇත. ඊට පෙර එක්සත් අරාබි එමීර් රාජ්‍යය, බහරේන්, බර්ලින් සහ නෝර්වේ රටවල ශ්‍රී ලංකා රාජ්‍යතාන්ත්‍රික දූත මණ්ඩලවල සේවය කර තිබේ.

තානාපති සෙනවිරත්න මහතා පේරාදෙණිය විශ්වවිද්‍යාලයෙන් කලා උපාධියක් සහ ජර්මනියේ බර්ලින් ආර්ථික විද්‍යා හා නීති විද්‍යාලයෙන් යුරෝපීය ඒකාබද්ධතාවයේ දේශපාලන ආර්ථිකය පිළිබඳ ශාස්ත්‍රපති උපාධියක් ලබා ඇත.

මහින්ද අලුත්ගෙදර

You may also like

Leave a Comment

Sri Lanka’s most Trusted and Innovative media services provider

Facebook

@2025 – All Right Reserved. Designed and Developed by Lakehouse IT