ජාතික බදු ප්‍රතිපත්තියක් කඩිනමින් ක්‍රියාත්මක කරමින් කර්මාන්තකරුවන්ගේ බදු ගැටලු විසඳීමට කටයුතු කරන බව කර්මාන්ත හා ව්‍යවසායකත්ව සංවර්ධන ඇමැති සුනිල් හඳුන්නෙත්ති මහතා පැවසීය.
දීර්ඝ කාලයක් පුරා දේශීය කර්මාන්ත ක්ෂේත්‍රය තුළ ඇතිවී තිබූ ගැටලු විසඳීම සඳහා විධිමත් වැඩපිළිවෙළක් නව රජය විසින් ක්‍රියාත්මක කරන බව ද ඇමැතිවරයා කීය.
දේශීය ව්‍යවසායකයින් සහ කර්මාන්තකරුවන් මුහුණ දෙන ගැටලු පිළිබඳ ජාතික වාණිජ මණ්ඩලය විසින් පසුගියදා (26) ජාතික වාණිජ මණ්ඩලයේ ශ්‍රවණාගාරයේදී සංවිධානය කර තිබූ විශේෂ සම්මන්ත්‍රණයකට සහභාගි වෙමින් අමාත්‍යවරයා මේ බව සඳහන් කළේය.
මෙම සම්මන්ත්‍රණයේදී රජයේ ප්‍රතිපත්ති සහ කර්මාන්ත සංවර්ධනය, කර්මාන්තකරුවන් මුහුණ දෙන අභියෝග, ශ්‍රම බළකාය සංවර්ධනය කිරීම, කාන්තා ව්‍යවසායකත්වය නගා සිටුවීම, අපනයන සංවර්ධනය, කර්මාන්තකරුවන් සඳහා ලබා දෙන දිරිගැන්වීම්, නවෝත්පාදන වැනි කරුණු රැසක් පිළිබඳ දීර්ඝ ලෙස සාකච්ඡා කරන ලදි.
මෙහිදී දීර්ඝ කාලයක් තිස්සේ ව්‍යවසායකයින් හා කර්මාන්තකරුවන් මුහුණදෙන ගැටලු රැසක් ඉදිරිපත් වූ අතර ඇමැතිවරුන් විසින් එම ගැටලු සඳහා කර්මාන්ත සහ ව්‍යවසායකත්ව සංවර්ධන අමාත්‍යාංශය ප්‍රමුඛ රජය විසින් මේ වන විට ලබාදී ඇති විසඳුම් සහ සහන පිළිබඳව දැනුම්වත් කරන ලදි.
මෙහිදී අදහස් දක්වමින් සුනිල් හඳුන්නෙත්ති ඇමැතිවරයා පැවසුවේ රටේ ආර්ථිකය නිෂ්පාදන ආර්ථිකයක් කරා මෙහෙයවීම නව රජයේ අරමුණ බවත්, නව රජයේ මැදිහත්වීම මත රටේ ආර්ථීකය පැවති තත්ත්වයට වඩා යම් ස්ථාවර මට්ටමකට ළඟා වී ඇති බවත්ය.
පසුගිය කාලයේ ලංකාවේ ආර්ථිකය කඩා වැටුණේ කොවිඩ් වසංගතය හෝ ආර්ථික අර්බුදය නිසා නොවන අතර ප්‍රතිපත්තිමය තීරණ ගැනීමේ පැවති දුර්වලතා ආර්ථිකය කඩා වැටීමට හේතුවක් විය.
තවද කර්මාන්තකරුවන් දීර්ඝ කාලයක් තිස්සේ මුහුණදුන් ගැටලු විසඳීම අරමුණු කරගනිමින් සෑම දිස්ත්‍රික්කයකම කර්මාන්ත ප්‍රවර්ධන සභා පිහිටුවන බවත්, විශේෂයෙන්ම රජය විසින් ජාතික බදු ප්‍රතිපත්තියක් ක්‍රියාත්මක කරමින් කර්මාන්තකරුවන්ගේ බදු ගැටලු විසඳීමට කටයුතු කරන කරන බවද ඇමැතිවරයා මෙහිදී වැඩිදුරටත් පැවසීය.
මෙම අවස්ථාව සඳහා ජාතික වාණිජ මණ්ඩලයේ සභාපති අනුර වර්ණකුලසූරිය, උප සභාපති ලක්මාල් ප්‍රනාන්දු, හිටපු සභාපති දීපාල් නෙල්සන්, කර්මාන්ත සහ ව්‍යවසායකත්ව සංවර්ධන අමාත්‍යාංශයේ නිලධාරීන්, ව්‍යවසායකයින් ඇතුළු පිරිසක් සහභාගි වූහ.
නෙරංජලා වික්‍රමසිංහ
