ජාතීන් අතර ආගම් අතර සහෝදරත්වය වර්ධනය කරගෙන ජීවත්වීම උතුම් දළදා වහන්සේට කරන සැබෑ ගෞරවයක් බව කොළඹ අගරදගුරු අති උතුම් මැල්කම් කාදිනල් රංජිත් හිමිපාණන් වහන්සේ පැවසූහ.
සිරි දළදා වන්දනාව දළදා ප්‍රදර්ශනය සම්බන්ධයෙන් ඊයේ (26) විශේෂ ප්‍රකාශයක් කළ කොළඹ අගරදගුරු අති උතුම් මැල්කම් කාදිනල් රංජිත් හිමිපාණන් වහන්සේ මේ බව පැවසූහ.
මේ සම්බන්ධයෙන් වැඩිදුරටත් අදහස් දැක්වූ කාදිනල් හිමිපාණෝ මෙසේද කීහ.
අපේ ජාතික සංස්කෘතිය සභ්‍යත්වය හුඟාක් දුරට සංස්කරණය වෙලා හැදිලා තියෙන්නේ බුදුහාමුදුරුවන්ගේ දේශනාවලින් අපට ලැබුණු ධර්මය තුළයි. ඒ ධර්මයේ උතුම්කම අපට තව තවත් වැටහෙන්නේ මේ රට තුළ සහෝදරත්වය සාමය එකඟතාවය ජාතීන් අතරේ එකමුතුව වර්ධනය කරන්නට එම ධර්මයෙන් අපිට ලැබෙන උතුම් ආභාෂය නිසයි.
මේ වගේ උතුම් වස්තුවක් අපට ලැබිල තියෙනවා. අපි මොන ආගමක් ඇදහුවත් මේ රටේ ඉපදීමට වාසනාව ලබාගත් අය වෙන්නට ඕනේ.
අපි ඒ පිළිබඳ උද්දාමයට පත් වෙන අතර මේ රටේ පොදු උරුමයේ කොඳු නාරටිය වන බුදු දහම ආරක්ෂා කර ගැනීමට අපි හැම දෙයක්ම කළ යුතුයි.
ශ්‍රී ලංකාවේ ඉතාමත් උතුම් වූ වස්තුවක් වන බුදු දහමට සම්බන්ධ බුදුරජාණන් වහන්සේගේ දන්ත ධාතූන් වහන්සේ මේ ශ්‍රී ලංකා පො‍ෙළාව මත වැඩවාසය කිරීම අප සියලු දෙනාටම ලැබුණ ලොකු ආශිර්වාදයක්.
දන්ත ධාතූන් වහන්සේ ප්‍රදර්ශනය කරන්නට ශ්‍රී ලංකාවේ රජය අති පූජ්‍ය වන්දනීය මහ නාහිමිවරුන්ගෙන් ඉල්ලා සිටීම සහ එම ඉල්ලීම පිළිගෙන මේ උතුම් වූ වස්තුව දැක වන්දනා කර ගැනීමට අවස්ථාව ලබාදීම වෙනුවෙන් ඒ ආගමික නායකත්වය ගත්ත ක්‍රියාදාමය අපි අගය කරනවා.
ඒ අයට ස්තූතිවන්ත වෙනවා. අන්තර් ආගමික සහයෝගය සහ සහෝදරත්වය වර්ධනය කරගන්නා වූ මෙවැනි උතුම් අවස්ථාවක් ගැන අපි සතුටු වන අතර ඒ සියලු දෙනාටම අපගේ අවංක ස්තුතිය පුදකර සිටිනවා.
දන්ත ධාතූන් වහන්සේට වන්දනා කරන්නට ඒ වගේම උන්වහන්සේට ගෞරව කරන්නට අපේ ජනතාව පෙළ ගැසී එන මොහොතේදී
අපි අපේ සහෝදරත්වය ඔවුන් සමඟ දක්වන්නට එකතු වෙමු.
ආගමික සංහිඳියාව සහෝදරත්වය වර්ධනය කරන්නට අපිට ගතහැකි සෑම පියවරක්ම ගමු.
එය අති උතුම් දළදා වහන්සේට අප දක්වන ගෞරවයේ කොටසක් බවට පත්වෙනවා. අපි උන්වහන්සේට දක්වන වන්දනා ගෞරවයට අමතරව අපි ජාතීන් අතර ආගමිකයින් අතර සහෝදරත්වය වර්ධනය කරගෙන ජීවත්වීම අපි උන්වහන්සේට දක්වන තවත් ගෞරවයක් වෙනවා. මේ අවස්ථාවේදී ඔබ සියලු දෙනාගෙන්ම ඒ ගැන ඉල්ලා සිටින්නේ මේ කටයුත්තට දායකත්වය දක්වන ලෙසයි. සියලු දෙනා එකතුවෙලා මේ ගෞරවය උන්වහන්සේට ලබා දෙමු.
මා කතෝලික ජනතාව කිතුනු ජනතාව වෙනුවෙන් අපේ බෞද්ධ සහෝදර සහෝදරියන්ට සුබ පතනවා. අතිපූජ්‍ය වන්දනීය මහා නායක හිමිවරුන් ප්‍රමුඛ ලංකාවේ ජීවත්වන සෑම බෞද්ධ සහෝදර සහෝදරියකටම අපේ සුභාසිංශන හිමිවෙනවා. ශ්‍රී ලංකාවට මේ උතුම් වූ අවස්ථාවෙන් ජය වේවා කියලා ප්‍රාර්ථනා කරනවා.
නෙරංජලා වික්‍රමසිංහ
