ජාතික තරුණ සේවා සභාවේ සමාගමක් වන ශ්‍රී ලංකා යූත් සර්විසස් පුද්ගලික සමාගම සැපයුම්කරුවෙක් ලෙස ලියාපදිංචි වී සභාවටම මිල ගණන් ඉදිරිපත් කිරීමේදී වැඩි මිල ගණන් ඉදිරිපත් කර ඇති බව කෝප් අනුකාරක සභාවේදී අනාවරණය විය.
මෙම කරුණු අනාවරණය වූයේ 2022 සහ 2023 වර්ෂයන්ට අදාළ විගණකාධිපති වාර්තා, වර්තමාන කාර්ය සාධනය සහ 2025 පෙබරවාරි 18 සහ 20 යන දිනවලදී පවත්වන ලද පොදු ව්‍යාපාර පිළිබඳ කාරක සභා රැස්වීම්වලදී ගනු ලැබූ නිර්දේශ ක්‍රියාත්මක කිරීමේ ප්‍රගති සමාලෝචනය පිණිස පත්කළ අනුකාරක සභාව රැස්වූ අවස්ථාවේදීය.
මෙම කමිටුව පසුගියදා (19) පාර්ලිමේන්තු මන්ත්‍රී චන්දිම හෙට්ටිආරච්චි මහතාගේ සභාපතීත්වයෙන් පාර්ලිමේන්තුවේදී රැස්විය.
මෙහිදී ස්මාර්ට් යූත් වැඩසටහන් මාලාවේ තුරඟ තරග පිටියේ පැවැති සංගීත ප්‍රසංගය ද ඇතුළත්ව මෙම වැඩසටහන සම්බන්ධයෙන්ද පවතින සියලු වීඩියෝ පට කාරක සභාවට ලබාදෙන ලෙස හිටපු සභාපති පසිඳු ගුණරත්න මහතාට ලබාදුන් නිර්දේශය පිළිබඳ අනුකාරක සභාව නිලධාරීන්ගෙන් විමසා සිටින ලදී.
ඒ අනුව එම වීඩියෝපට තමන්ට ලබාදී ඇති බව නිලධාරීහු කාරක සභාවට දැන්වූහ.
එහිදී ලක්ෂ 120ක මුදලක් මේ වෙනුවෙන් අදාළ නිෂ්පාදන ආයතන වෙත ලබාදීම පිළිබඳ කාරක සභාව දීර්ඝව කරුණු විමසීය. ඒ අවස්ථාවේදී අනාවරණය වුයේ ජාතික තරුණ සේවා සභාවේ සමාගමක් වන ශ්‍රී ලංකා යූත් සර්විසස් පුද්ගලික සමාගම සැපයුම්කරුවෙක් ලෙස අදාළ සැපයුම වැඩි මුදලකට ලබාගෙන එම සමාගම විසින් තවත් ආයතන ඔස්සේ එය සිදු කර ඇති බවය.
තවද ස්මාර්ට් යූත් ප්‍රදර්ශනය ඇතුළු වැඩසටහන් මාලාව සමීක්ෂණ වාර්තාවකින් අනතුරුව සිදු කළ බව හිටපු සභාපතිවරයා පැවසුවද එවැනි වර්තාවක් සභාව සතුව නොමැති බව ජාතික තරුණ සේවා සභා නිලධාරීහු කාරක සභාවට දැන්වූහ.
මෙහිදී අදහස් දැක්වූ කාරක සභා සභාපතිවරයා ස්මාර්ට් යූත් වැඩසටහන් මාලාව තුළ විශාල මූල්‍ය වංචාවක් සිදුව ඇති බවත් ඒ සම්බන්ධයෙන් අමාත්‍යාංශ මට්ටමින් ස්වාධීන පරීක්ෂණයක් සිදු කර පූර්ණ වාර්තාවක් මාස 3ක් තුළ කාරක සභාවට යොමු කරන ලෙසත්, ජාතික තරුණ සේවා සභාව මඟින් ද පරීක්ෂණයක් සිදු කර නීත්‍යනුකූල පියවරයන් ගැනීමට කටයුතු කරන ලෙසත් නිලධාරීන්ට උපදෙස් ලබාදුන්නේය.
එමෙන්ම දේශපාලන හේතුන් මත ගැටලු සඳහා මුහුණදුන් නිලධාරීන් 40 දෙනකු සඳහා වන්දි දීමට විශ්‍රාමික නිලධාරීන්ගෙන් යුත් කමිටුවක් පත් කරන ලෙස දී තිබු කැබිනට් තීරණයක් නොසලකා හරිමින් සභාව මඟින් වෙනම කමිටු 3ක් පත්කර වන්දි දීම පිළිබඳ ද කාරක සභාවේදී සාකච්ඡා විය. ඒ අනුව මෙලෙස වන්දි ලබාගත් නිලධාරීන්, ලබාදුන් වන්දි මුදල් ප්‍රමාණයන්, මෙම උසස්වීම් ලබාදුන් දිනයන්, ගෙවීම් කළ දිනයන්, අනුමැතිය ලබාදුන් දිනයන් හා තීන්දු ලබාදුන් නිලධාරීන් පිළිබඳ පූර්ණ වාර්තාවක් සති 2ක් තුළ ලබාදීමට කටයුතු කරන ලෙස කාරක සභාව විසින් නිලධාරීන්ට උපදෙස් දෙන ලදී.
