නීතිවිරෝධි ලෙස කින්නියා ප්‍රදේශයේ රාත්‍රි කාලයේ කිමිදුම් සිදුකර මසුන් ඇල්ලූ ධීවර කාර්මිකයන් තිදෙනකු මසුන් කිලෝ ග්‍රෑම් 65ක් සමඟ කිමිදුම් උපකරණ රැසක්ද පෙරේදා (22) අත්අඩංගුවට ගත් බව ධීවර හා ජලජ සම්පත් දෙපාර්තමේන්තුව පවසයි.
නාවික හමුදාව සමඟ එක්ව මෙම වැටලීම සිදු කළ අතර කිමිදුම් සිදුකර එමින් සිටියදී මෙම අත්අඩංගුවට ගැනීම සිදු කළ බව ධීවර හා ජලජ සම්පත් දෙපාර්තමේන්තුවේ ත්‍රිකුණාමලය සහකාර අධ්‍යක්ෂ ඉෂාර ටී.කංකානම්ගේ මහතා පැවසීය. අත්අඩංගුවට ගත් සැකකරුවන් කින්නියා ප්‍රදේශයේ පදිංචිකරුවන්ය. ධීවර මෙහෙයුම් නිලධාරි ආර්. උදයරාජ් මහතාගේ මෙහෙයවීම මත වැඩිදුර පරීක්ෂණ පැවැත්වූ බව සහකාර අධ්‍යක්ෂවරයා පැවසීය. අත්අඩංගුවට ගත් සැකකරුවන් 1996 අංක 02 දරන ධීවර හා ජලජ සම්පත් පනත යටතේ කින්නියා සංචාරක මහේස්ත්‍රාත් අධිකරණය වෙත ඉදිරිපත් කිරීමට නියමිතය.
අත්අඩංගුවට ගත් කිමිදුම් උපකරණ අතර ඔක්සිජන් ටැංකි 08ක්, පිටත සවිකරන එන්ජිම සහිත බෝට්ටුවක් වන බව සහකාර අධ්‍යක්ෂවරයා වැඩිදුරටත් පැවසීය.
ත්‍රිකුණාමලය විශේෂ ඒ.ටී.එම්. ගුණානන්ද
