වත්මන් ආණ්ඩුව බලයට පත්වීමෙන් පසුව මේ දක්වා දේශීය සහ විදේශීය වශයෙන් රුපියල් කෝටි පන්ලක්ෂ පහළොස් දහස් හයසීයක් පමණ ණය ලබාගෙන ඇතැයි මන්ත්‍රී දයාසිරි ජයසේකර මහතා පාර්ලිමේන්තුවේදී පසුගියදා (21) ප්‍රකාශ කළේය.
එම මුදල් ආණ්ඩුව මඟින් පාවිච්චි කර ඇත්තේ කවර අවශ්‍යතා වෙනුවෙන්දැයි දයාසිරි ජයසේකර මහතා විමසා සිටියේය.
පාර්ලිමේන්තු මන්ත්‍රී දයාසිරි ජයසේකර මහතා,
“දේශීය වශයෙන් 2025 මාර්තු 05 වැනිදා වන විට භාණ්ඩාගාර බිල්පත් ලෙස රුපියල් බිලියන 3775ක්, භාණ්ඩාගාර බැඳුම්කර වශයෙන් රුපියල් බිලියන 1063ක් වගේම ලෝක බැංකුවෙන්, ජාත්‍යන්තර මූල්‍ය අරමුදලෙන් සහ ආසියානු සංවර්ධන බැංකුවෙන් ඩොලර් මිලියන 1084ක් ලෙස රුපියල් බිලියන 5156ක ප්‍රමාණයක්. එය කෝටිවලින් කිවුවොත් රුපියල් කෝටි පන්ලක්ෂ පහළොස් දහස් හයසීයක් වශයෙන් ඔබතුමාලා ණය අරගෙන තිබෙනවා. ඒවා පාවිච්චි කරලා තිබෙන්නේ මොනවාටද? බුකින් ඩොට්කොම් ඉවත් කළ යුතු බවට ප්‍රකාශයක් සිදු කර තිබෙනවා. මේක සුදුසු ද? නිකම්ම කරපු ප්‍රකාශයක්ද?”
