පොලිස් විරුදිනේ සමරන්නේ අපේ සීයාගේ මරණය වූ දවසේ කියා ගොඩක් අය දන්නේ නෑ – තුවාන් සාබාන්ගේ මී මුණුපුරු තුවාන් සෆ්රාස් කියයි
ශ්‍රී ලංකා පොලීසියේ 161 වැනි පොලිස් විරු අනුස්මරණ දිනය ඉකුත් මාර්තු මස 21 වැනි දිනට යෙදී තිබිණි. දිවයින පුරා පොලිස් කොට්ඨාස මට්ටමින් පොලිස් විරු අනුස්මරණ දිනය සැමරීමට කටයුතු කෙරිණි. මේ අතර පොලිස් විරු අනුස්මරණ දිනයට සමගාමීව හලාවත පොලිස් අධිකාරි කාර්යාල පරිශ්‍රයේ සැමරුම් උත්සවයක් පැවැත්වූයේ හලාවත කොට්ඨාස භාර ජ්‍යෙෂ්ඨ පොලිස් අධිකාරි රොහාන් පෙරේරා මහතාගේ ප්‍රධානත්වයෙනි. මියගිය පොලිස් රණවිරුවන්ගේ පවුල්වල හා ආබාධිත වූ රණවිරුවන්ගේ පවුල්වල සාමාජික සාමාජිකාවන්ට මේ අවස්ථාවට ආරාධනා කර තිබුණි.
ක්‍රියාන්විත රාජකාරියේ යෙදී සිටියදී මියගිය පොලිස් විරුවන් සිහි කරමින් ඉදිකර ඇති ස්මාරකය අබියස පැවැත්වූ මේ සැමරුම් උත්සවයේදී පොලිස් නිලධාරීන්,මියගිය ආබාධිත පොලිස් විරුවන්ගේ පවුල්වල සාමාජික සාමාජිකාවන් ක්‍රියාන්විතයේදී මියගිය පොලිස් විරුවන් සිහිගන්වමින් ස්මාරකයට පුෂ්පෝපහාර දැක්වීම සිදුකෙරිණි. පුෂ්පෝපහාර දැක්වීමට පැමිණි අය අතර එක් සුවිශේෂී පුද්ගලයකු විය.ඒ ක්‍රියාන්විත රාජකාරියේ යෙදී සිටියදී උතුවන්කන්දේ රැඳී සිටි සූර සරදියෙල් අත්අඩංගුවට ගැනීමට උත්සාහ දැරීමේ මෙහෙයුමේදී මියගිය කොස්තාපල් තුවාන් සාබාන්ගේ මී මුණුපුරා වන තුවාන් මොහොමඩ් සෆ්රාස්ය. ක්‍රියාන්විතයේදී මියගිය පළමු ලාංකේය පොලිස් භටයා වන්නේ තුවාන් සාබාන්ය. කොස්තාපල් තුවාන් සාබාන් මියගියේ 1864 මාර්තු 21වැනි දිනය. ඒ අනුව ශ්‍රී ලංකා පොලීසිය විසින් මියගිය පොලිස් විරුවන් සිහි කිරීම සෑම වසරකම මාර්තු 21 වැනි දින සිදු කිරීමට පියවර ගෙන තිබේ. රාජකාරි ඉටු කිරීමට යෑමේදී දිවි පිදූ පළමු පොලිස් නිලධාරියා ලෙස ඉතිහාසගතගතවී ඇත්තේ මේ පොලිස් නිලධාරියාය. එම සිදුවීම නිල ඇඳුම් ඇඳ සිටි පොලිස් නිලධාරියකු වික්‍රමාන්විත රාජකාරියේදී මියගිය බවට මාවනැල්ල, උතුවන්කන්ද මංසන්ධියේ ස්මාරකයක සටහන් කර තිබීම මෙරට පොලිස් විරුවකු සිහිගැන්වීමට තිබෙන පැරණිතම මූලාශ්‍රය වේ.
ධනවතුන් සතු මුදල් හා දේපළ කොල්ලකා දුප්පත් ජනයා අතර බෙදාදීමේ නිරතව සිටි සූර සරදියෙල් එවකට පාලනය කළ ඉංග්‍රීසි ආණ්ඩුවට මහත් හිසරදයක් විය. ඔහු විසින් කොල්ලකෑ බොහෝ වස්තුව, සරදියෙල් විසින් දුප්පතුන් අතර බෙදා දෙන ලද අතර, කිසිවිටෙකත් ඔවුන්ගෙන් සොරකම් නොකළේය. මේ නිසාම Òලංකා රොබින්හුඩ්Ó ලෙසින් ද ඔහු හැඳින්විණි. සරදියෙල්ගේ ඉලක්ක වූයේ බ්‍රිතාන්‍ය ජාතිකයන් සහ එහි ඉහළ හා මධ්‍යම පන්තියේ වැජඹෙමින් ධනය රැස් කර ගත් පිරිස්ය. දුගී ගම්වැසියන් අතර ඉමහත් ජනප්‍රියත්වයක් ලබා ගැනීමට සරදියෙල් සමත් වූයේ මෙසේ කොල්ලකන වස්තු හා මුදල් ඔවුන් අතර බෙදා දීම නිසාය. මේ නිසාවෙන් ඔහුගේ ක්‍රියාවන් යුක්තිසහගත බවත්, සරදියෙල් යනු බ්‍රිතාන්‍ය පාලනයට එරෙහිව කැරලිගැසූවකු මිස මංපහරන්නකු නොවන බවත්, ශ්‍රී ලාංකේය බොහෝ දෙනා අතර ප්‍රචලිත විය.
සරදියෙල්ගේ හැසිරීම් රටාව කෑගල්ලේ පදිංචිව සිටි සිය පියා අනුමත නොකර නිවෙසේ රඳවා ගැනීමට කටයුතු නොකළ නිසා ඔහු මාවනැල්ලේ උතුවන්කන්දේ සැඟව සිටීමට කටයුතු කළේය. කිහිප අවස්ථාවකම ඔහු නීතිය රැහැනට ද හසු කරගැනීමට කටයුතු කළ අතර, සිරගත කිරීමෙන් පසු සිරගෙදරින් ද සූක්ෂ්ම ලෙස පලා යෑමට කටයුතු කළේය. මේ හේතුවෙන් එකල ඔහු සොයා මෙහෙයුම් දැඩි ලෙස ක්‍රියාත්මක කෙරිණි.
මෙවන් පසුබිමක 1864 මාර්තු 21වැනිදා සරදියෙල් ඔහුගේ සමීපතම මිතුරා වන මම්මලේ මරික්කාර් සමඟ මාවනැල්ලේ පිහිටි නිවෙසක සිටියදී ලැබුණු ඔත්තුවකට අනුව පොලිස් සැරයන් මගට්, සැරයන් යුසුප්, සැරයන් අහමත් සහ පොලිස් කොස්තාපල් තුවාන් සාබාන් ඇතුළු පොලිස් කණ්ඩායම විසින් එම නි‍ෙවස වටලන ලදි. පොලිස් සැරයන් අහමත් සරදියෙල් වෙත වෙඩි තබා ඔහුට තුවාල කළ අතර එම අවස්ථාවේ සරදියෙල්ගේ මිතුරා වන මම්මලේ මරික්කාර්ගේ වෙඩිපහරකින් කොස්තාපල් සාබාන් ජීවිතක්ෂයට පත්විය. සරදියෙල් සහ මම්මලේ මරික්කාර් දෙදෙනා මහනුවරට රැගෙන ගොස් ඉංග්‍රීසි ජූරි සභාවක් ඉදිරියේ නඩුව විභාග කෙරිණි. ජූරිය විසින් ඔවුන් දෙදෙනා වැරදිකරුවන් ලෙස තීරණය කරන ලද අතර මරණ දණ්ඩනය නියම කෙරිණි. ඒ අනුව සරදියෙල් සහ මම්මලේ මරික්කාර් 1864 මැයි 7වැනිදා එල්ලා මරා දැමීමට කටයුතු කළේය.
1864 මාර්තු 21වැනි දින සිට සෑම වර්ෂයකම මාර්තු 21වැනි දින පොලිස් විරුවන් සිහි කරමින් සැමරුම් උත්සවම පැවැත්වීමට කටයුතු කරයි.
මියගිය කොස්තාපල් තුවාන් සාබාන්ගේ මී මුණුපුරා වන තුවාන් මොහොමඩ් සෆ්රාස් මේ සම්බන්ධව අදහස් දක්වමින් මෙසේ පැවසීය.
‘අපි හලාවත, සිංහපුර ප්‍රදේශයේ පදිංචිව ඉන්නේ.තුවාන් සාබාන් කියන්නේ මගේ සීයාගෙත් සීයා. ඒ කියන්නේ හතරවැනි පරම්පරාව. ඇත්තටම අපි මැලේසියා සම්භවයක් තියෙන අය. ඒ කාලේ යුද කටයුතුවලට පොලීසියට හමුදාවට ගිනි නිවන හමුදාවට වැනි ක්ෂේත්‍රවලට මැලේසියා ජාතිකයන් ලංකාවට ගෙන්වලා තියෙනවා.එදවස මැලේ ජාතිකයන් යුද කටයුතුවලට රණශූරයන් කියා කියනවා. අපේ සීයලාවත් මෙහෙට ගෙනත් තියෙන බව තමයි කියන්නේ. අපේ තුවාන් සාබාන් සීයා පොලීසියට බැඳිලා මාවනැල්ල ප්‍රදේශයේ තමා වැඩ කටයුතු භාරව ඉඳලා තියෙන්නේ. එහි සේවය කරද්දි උත්වන්කන්දේ සරදියෙල් අල්ලන්න යද්දි වෙඩි වැදිලා මියගිහින් තියෙනවා. සීයයි ඒ පරම්පරාවේ සියලු දෙනයි පොලීසියේ තමයි සේවය කර තියෙන්නේ. පරම්පරා හතරක් පොලිස් සේවය සහ හමුදා රාජකාරි කරපු අය. මගේ තාත්තත් හමුදාවේ සේවය ක‍ළේ. දැන් තාත්තා මිය ගිහින් අවුරුදු 16ක් වෙනවා. හැබැයි මට සහෝදරයෝ තව දෙන්නෙක් ඉන්නවා. අපි තුන්දෙනාම පොලීසිය හෝ හමුදා සේවයට බැඳෙනවාට තාත්තා කැමැති වුණේ නෑ. මගේ අයියා නැෂනල් රගර් ටීම් එකේ. මල්ලි ෆුට්බෝල් ප්ලේයර් කෙනෙක්. මම බාහිර කථිකාචාර්යවරයෙක් විදියට වැඩ කරනවා. අපේ පරම්පරාවේ ගොඩක් අය මැලේසියාවේ පදිංචි වෙලා ඉන්නවා. මියගිය සාබාන් සීයාගේ ෆොටෝ, එයාට දුන්න සෙටිෆිකට් එකක් ඇතුළු ලියකියවිලි ගොඩක් තිබුණා. මීට අවුරුදු තුන හතරකට පමණ පෙර ආව ගංවතුරෙන් ඒ සියල්ල විනාශ වෙලා ගියා. ගොඩක් අය දන්නේ නෑ පොලිස් විරු දිනේ සමරන්නේ මේ අපේ සීයාගේ මරණය වූ දිනයේ කියලා.අපේ සීයලා මැලේසියන් ජාතිකයෝ. විරුවන් ලෙස හඳුන්වලා ශ්‍රි ලංකා පොලීසිය මේ වගේ අගය කිරීම් සිදුකීරීම අපට ලොකු සතුටක්. “
හලාවත කොට්ඨාස භාර ජ්‍යෙෂ්ඨ පොලිස් අධිකාරි රොහාන් පෙරේරා මහතා මේ සම්බන්ධව මෙසේ පැවසීය.
‘‘අපට දැනගන්න ලැබුණා කොස්තාපල් තුවාන් සාබාන්ගේ පරපුර ඉන්නේ හලාවත කියලා. අපට ඒ නිසා මෙවර පොලිස් විරු දිනයට කෙසේ හෝ ඒ පරපුරේ සාමාජිකයෙක් සම්බන්ධ කරගන්න හැකිවුණා. ඒ අපේ පොලිස් ස්ථානයේ ඉන්න නිලධාරිවරයකුගේ සම්බන්ධීකරණයෙන්. මේ අවස්ථාවට සම්බන්ධ කර ගැනීම සම්බන්ධව විශාල ලෙස ඔහු සතුටු වුණා. සමහර අය දන්නේ නැහැ තුවාන් සාබාන් මේ හලාවත ප්‍රදේශයේ පදිංචි වෙලා හිටියා කියලා. ඉදිරියේදී සෑම සැමරුම් උත්සවයකටම ඒ පවුලේ සාමාජිකයෙක් සම්බන්ධ කර ගැනීමට කටයුතු කරනවා. ඒ වගේම මේ විරු සමරු උත්සවය හලාවත පොලිස් කොට්ඨාසයේ මෙවර අතිඋත්කර්ෂවත් අන්දමින් සැමරීමට අපි කටයුතු කළා“
සහකාර පොලිස් අධිකාරි ධම්මික හපුගොඩ, හලාවත මූලස්ථාන ප්‍රධාන පොලිස් පරීක්ෂක රුෂාන්ත පෙරේරා, කොට්ඨාස අපරාධ විමර්ශන අංශයේ ප්‍රධාන පොලිස් පරීක්ෂක සමන්සිරි, මියගිය පොලිස් රණවිරුවන්ගේ පවුල්වල හා ආබාධිත වූ රණවිරුවන්ගේ පවුල්වල සාමාජික සාමාජිකාවෝ ඇතුළු පිරිසක් මේ අවස්ථාවට එක්ව සිටියහ.
මාරවිල සමූහ – මිහිර විජේසේකර
