දහතුන්වැනි ආරක්ෂක සේවා පැරෂුට් ශූරතාවලියේදී විශිෂ්ට දස්කම් දැක්වීමට ගුවන් හමුදා ක්‍රීඩක ක්‍රීඩිකාවෝ සමත් වූහ.
අම්පාර ගුවන් හමුදා පැරෂුට් පුහුණු පාසලේ පැවති තරගාවලියේදී ක්‍රීඩකයන්ගේ නිවැරදි පතිත කිරීම් (Accuracy), කණ්ඩායම් ක්‍රියාකාරිත්වය සහ ගුවනේදී දක්වන සුවිශේෂි දක්ෂතා මෙහිදී පරීක්ෂා කරන ලදි. ඒ අනුව තරගාවලියේ සම ශූරතා දිනා ගැනීමට ශ්‍රී ලංකා ගුවන් හමුදාව සහ ශ්‍රී ලංකා යුද හමුදාව සමත් විය.
ගුවන් හමුදා කණ්ඩායම Skydiving රන් පදක්කම, Accuracy ඉසව්වේ රිදී පදක්කම දිනාගත් අතර, කේවල අංශයේදී ගුවන් හමුදාවේ කෝප්‍රල් දර්ශන වික්‍රමරත්න Accuracy ඉසව්වේ රිදී පදක්කම සහ ස්කොඩ්‍රන් ලීඩ් විදුරංග බණ්ඩාර ලෝකඩ පදක්කම දිනා ගත්හ. එහි කාන්තා ඉසව්වේදී නායක ගුවන් කාන්තා හංසිකා මධුභාෂිනී රන් පදක්කම, නායක ගුවන් කාන්තා මාධවී අමරසිංහ රිදී පදක්කම සහ කෝප්‍රල් සුදර්ශනී උදයකුමාරි ලෝකඩ පදක්කම දිනා ගත්හ.
තරගාවලියේ ජය සංකේත ප්‍රදානය ශ්‍රී ලංකා නාවික හමුදාවේ අධ්‍යක්ෂ ජනරාල් පුහුණු, රියර් අද්මිරාල් ධම්මික විජේවර්ධන මහතාගේ ප්‍රධානත්වයෙන් පැවැත්විණි.
