ගම්පහ දිස්ත්‍රික් ප්‍රවීණයන්ගේ මලල ක්‍රීඩා සංගමය මඟින් සංවිධාන කළ 7 වැනි ප්‍රවීණයන්ගේ සමස්ත ලංකා මලල ක්‍රීඩා තරගාවලිය සමස්ත ශූරතාව දිනා ගැනීමට සත්කාරක ගම්පහ දිස්ත්‍රික් කණ්ඩායම සමත් විය.
වතුපිටිවල ක්‍රීඩාංගණයේ පැවති තරගාවලියේදී ගම්පහ දිස්ත්‍රික් පිල ලකුණු 543ක් ලබාගත් අතර, ලකුණු 410ක් සමඟ සිවිල් ආරක්ෂක දෙපාර්තමේන්තුව අනුශූරතාව දිනා ගත්තේය.
තරගාවලියේ දක්ෂතම ක්‍රීඩකයා ලෙස දුර පැනීමේ ඉසව්වෙන් මීටර් 6.27ක් සටහන් කළ කෑගල්ල දිස්ත්‍රික්කයේ ශිරෝන් විජේසිංහ සම්මාන දිනාගත් අතර, එම ඉසව්වෙන්ම මීටර් 4.71ක දක්ෂතාවක් දැක්වූ ගම්පහ දිස්ත්‍රික්කයේ හර්ෂණී ජයකාන්ති දක්ෂතම ක්‍රීඩිකාව ලෙස සම්මාන දිනා ගත්තාය.
තරගාවලියේ සමස්ත පිරිමි ශූරතාව ලකුණු 342ක් දිනාගත් ගම්පහ දිස්ත්‍රික් පිරිමි කණ්ඩායම දිනාගත් අතර, කාන්තා ශූරතාව සිවිල් ආරක්ෂක දෙපාර්තමේන්තු කාන්තා කණ්ඩායම (211) සතුවිය.
තරගාවලියේ ජය සංකේත ප්‍රදානය චාන්ස් ස්පෝට්හි කළමනාකරු ලසන්ත අමරසිංහ මහතාගේ ප්‍රධානත්වයෙන් පැවැත්විණි.
මේ තරගාවලියේදී ටී.ජී.ආර්.එම්.එස්. නිරන්ජන් (කොළඹ), ශිරෝන් විජේසිංහ (කෑගල්ල), එස්.ඒ.ඒ. ප්‍රනාන්දු (ගම්පහ), උදිත කුමාර (කොළඹ), මෙරිල් පෙරේරා (එයාර්පෝට් ඇන්ඩ් එවියේශන්), බී.සී. ලිවේරා (කොළඹ), ඩබ්ලිව්.එම්. ආරියසේන (ගම්පහ), ජී.ටී.බී. ද එස්. ගුණවර්ධන (කළුතර), වයි.එම්. ජයතිලක (ගම්පහ), එම්.බී. හේරත් (මහනුවර), සහ උපාලි සෙනෙවිරත්න (කෑගල්ල) පිරිමි කාණ්ඩයෙන් ද, ඒ.ඩී. ප්‍රේමතිලකා (ගම්පහ), හර්ෂණී ජයකාන්ත (ගම්පහ), ජේ.ඒ.ඒ. එස්. ජයසූරිය (ගම්පහ), කේ.එම්.ටී.කේ. බණ්ඩාර (ක්‍රිස්ටල් මාර්ටින්), පී.කේ.එස්. මානෙල් (හම්බන්තොට), ඩී.වී.ඩී. ගීතාංජලී (ගාල්ල), කේ.එච්. උදුලවතී (ගාල්ල), සී.ජේ. යටවර (කොළඹ) සහ එල්.පී. රණවීර (කෑගල්ල) කාන්තා කාණ්ඩයෙන් ද වයස් සීමාවල දක්ෂතම ක්‍රීඩක ක්‍රීඩිකාවන් ලෙස සම්මාන ලැබූහ.
