තායිලන්තයේ පැවති 20 වැනි ලෝක මුයි තායි ශූරතාවලියේදී පදක්කම් 7ක් දිනා ගැනීමට ශ්‍රී ලංකා කණ්ඩායම සමත් විය.
ඊට රන් පදක්කම් 2ක්, රිදී පදක්කම් 3ක් සහ ලෝකඩ පදක්කම් 2ක් ඇතුළත් වූ අතර, සෙහස් අකීස සහ තරින්ද දසුන්ප්‍රිය රන් පදක්කම් දිනා ගත්හ.
කිලෝග්‍රෑම් 37 බර පන්තියයෙන් අවුරුදු 10 – 11 කාණ්ඩයෙන් සෙහස් අකීස තරග කළ අතර, ඔහු තවමත් 6 ශ්‍රේණියේ ඉගෙනුම ලබන පාසල් සිසුවෙකි. කිලෝග්‍රෑම් 54 බර පන්තිය යටතේ විවෘත අංශයෙන් තරග කළ තරින්ද දසුන්ප්‍රිය රන් පදක්කම් දිනා ගැනීමට සමත් වී තිබුණි. ඔහු කොළඹ විශ්වවිද්‍යාලයට අනුබද්ධිත සෞන්දර්ය සහ ප්‍රාසාංගික කලා විශ්වවිද්‍යාලයයේ උපාධි අපේක්ෂකයෙකි.
ලෝක මුයි තායි සම්මේලනය විසින් සංවිධාන කළ මේ තරගාවලිය පසුගියදා තායිලන්තයේ බැංකොක් නුවර නිමිනුත් ක්‍රීඩාංගණයේදී පැවති අතර, ඊට රටවල් 42ක මුයි තායි ක්‍රීඩකයන් එක්වූහ.
ශ්‍රී ලංකා මුයි තායි කණ්ඩායම පෙරේදා රාත්‍රීයේ කටුනායක ගුවන්තොටුපොළෙන් යළි මෙරටට පැමිණි අතර, ඔවුන් පිළිගැනීමට මේ ක්‍රීඩකයන්ගේ මවුපියන් ඇතුළු පිරිසක් පැමිණ සිටියහ.
