ජාත්‍යන්තර ක්‍රිකට් පිටියට මාස දෙකක විවේකයකදී 18 වැනි ඉන්දීය ප්‍රිමියර් ලීග් විස්සයි20 ක්‍රිකට් තරගාවලිය හෙට (22) කොල්කටාහි ඊඩ්න් ගාඩ්න්ස් පිටියේදී ආරම්භ වේ.
තරග 74කින් සමන්විත මෙවර අයිපීඑල් තාරගාවලිය දින 65ක් පුරා ක්‍රියාත්මක වන අතර, මැයි මස 25 වැනිදා නිමාවීමට නියමිතය.
අයිපීඑල් තරගාවලිය නිසා අයිසීසී ඉහළ පෙළේ රටවල් අතර ද්විපාර්ශ්වික තරගාවලි නොපැවැත්වෙන අතර, මේ දිනවල පැවැත්වෙන්නේ නවසීලන්ත – පාකිස්තාන තරගාවලිය පමණි. එය ලබන මස 5 වැනිදා නිමා වන අතර, යළි ප්‍රධාන රටවල් දෙකක් අතර තරගාවලියක් පැවැත්වෙන්නේ මැයි මස අගදීය. ඒ අතරතුර සිම්බාබ්වේ – බංග්ලාදේශ (අප්‍රේල් 20 – 28) ටෙස්ට් තරගාවලියක් පමණක් පැවැත්වීමට නියමිතය.
කණ්ඩායම් 10ක් එක්වන තරගාවලිය ක්‍රීඩාංගණ 13කදී පැවැත්වෙන අතර, දින 9කදී දිවා සහ දිවා රාත්‍රී ලෙස තරග දෙක බැඟින් පැවැත්වීමට ද සැලසුම් කර තිබේ.
තරගාවලිය ආරම්භ කරමින් වත්මන් ශූර කොල්කටා නයිට් රයිඩර්ස් පිල සහ රාජස්ථාන් රෝයල්ස් බැංගලෝර් පිල හෙට (22) රාත්‍රී 7.30ට තරග බිමට පිවිසෙයි. අනිද්දා (23) සන්රයිසස් හයිද්‍රාබාද් පිල සහ රාජස්ථාන් රෝයල්ස් පිල පස්වරු 3.30ටත්, රාත්‍රී 7.30ට චෙන්නායි සුපර් කිංග්ස් සහ මුම්බායි ඉන්දියන්ස් අතර තරගයත් පැවැත්වීමට නියමිතය.
මූලික වටයේ තරග මැයි මස 18 වැනිදා දක්වා පැවැත්වෙන අතර, මැයි 20 අවසන් තරගයට සුදුසුකම් ලැබීමේ පළමු තරගයත් (Qualifier 1), මැයි 21 වැනිදා පරාජිතයන් ඉවත් කිරීමේ හෙවත් ප්‍රසාද ලකුණු සටහනේ තෙවැනි සහ සිවුවැනි ස්ථාන අතර තරගයත් (Eliminator) පැවැත්වෙන අතර, 23 වැනිදා සුදුසුකම් ලැබීමේ දෙවැනි තරගයත් (Qualifier 2) පැවැත්වේ. මැයි 25 වැනිදා ඊඩ්න් ගාඩ්න්ස් ක්‍රීඩාංගණයේදීම අවසන් මහ තරගය පැවැත්වීමට නියමිතය.
මෙවර තරගාවලියේ ශූරයන්ට අමෙරිකානු ඩොලර් මිලියන 2.32ක මුදලක් හිමිවන අතර, අනුශූරයන්ට මිලියන 1.5ක්, තෙවැනි ස්ථානයට ඩොලර් 810,800ක් සහ සිවුවැනි ස්ථානයට ඩොලර් 752,894ක් හිමි වෙයි.
ඉන්දීය ක්‍රීඩකයන් 9 දෙනකු මෙවර තරගාවලියේදී කණ්ඩායම් 9ක් මෙහෙයවන අතර, එකම විදේශීය නායකයා වන්නේ පැට් කමින්ස්ය. ඔහු සන්රයිසස් හයිද්‍රාබාද් කණ්ඩායම මෙහෙයවයි. හර්දික් පාණ්ඩ්‍යා (මුම්බායි ඉන්දියන්ස්), රුටුරාජ් ගයික්වාඩ් (චෙන්නායි සුපර් කිංග්ස්), රිෂාබ් පාන්ට් (ලක්නව් සුපර් ජයන්ට්ස්), සංජු සැම්සන් (රාජස්ථාන් රෝයල්ස්), රජත් පටිදාර් (රාජස්ථාන් රෝයල්ස් බැංගලෝර්), අක්ෂාර් පටෙල් (දිල්ලි කැපිටල්ස්), ශ්‍රේයාස් අයියර් (පන්ජාබ් කිංග්ස්), අජින්ක්‍යා රහානේ (කොල්කටා නයිට් රයිඩර්ස්) සහ ශුබ්මන් ගිල් (ගුජරාට් ජයන්ට්ස්) කණ්ඩායම්වලට නායකත්වය දෙති.
මෙවර තරගාවලිය සඳහා ශ්‍රී ලාංකික ක්‍රීඩකයන් 8 දෙනකු එක්ව සිටින අතර, ඒ අනුව මතීෂ පතිරණ (චෙන්නායි සුපර් කිංග්ස්), වනිඳු හසරංග සහ මහීෂ් තීක්ෂණ (රාජස්ථාන් රෝයල්), නුවන් තුෂාර (රෝයල් චැලෙන්ජර්ස් බැංගලෝර්), කමිඳු මෙන්ඩිස් සහ ඒෂාන් මාලිංග (සන්රයිසස් හයිද්‍රාබාද්), දසුන් ශානක සහ දුෂ්මන්ත චමීර (දිල්ලි කැපිටල්ස්) ක්‍රීඩා කරති.
මේ අතර මෙවර තරගාවලියේදී නව නීති දෙකක් ක්‍රියාත්මක කිරීමට ද ඉන්දීය ක්‍රිකට් පාලක මණ්ඩලය කටයුතු කර තිබේ. ඒ අනුව පන්දුවේ ඛේටය තැවරීමේ තහනම ඉවත් කිරීම සහ දෙවැනි ඉනිම සඳහා දෙවැනි පන්දුවක් හඳුන්වාදීම සිදු කර ඇත.
කොරෝනා වසංගතය අතරතුර පන්දු ඔප දැමීම සඳහා ඛේටය තැවරීම තහනම් කිරීමට ජාත්‍යන්තර ක්‍රිකට් කවුන්සිලය කටයුතු කළ අතර, එය 2022දී ස්ථිර විය. අයිපීඑල් තරග සඳහා එම නීතිය ක්‍රියාත්මක විය.
නව පන්දුවක් භාවිත කිරීමේ නීතිය ක්‍රියාත්මක වන්නේ දෙවැනි ඉනිමේ 11 වැනි ඕවරයෙන් පසුවය. මේ මඟින් රාත්‍රී කාලයේ තරගවලට පින්නෙන් වන බලපෑම අවම කිරීම බලාපොරොත්තුව වී තිබේ.
