ජන ක්‍රීඩා සම්මේලනය (Ethnosport Federation) කොට්ට පොර සංවර්ධන කමිටුව එක්ව සංවිධාන කරන 2 වැනි ජාතික කොට්ට පොර ශූරතාවලිය ලබන මස අගභාගයේදී පැවත්වීමට සැලසුම් කර තිබේ.
පිරිමි සහ කාන්තා කාණ්ඩ දෙකෙන් පැවැත්වෙන තරගාවලියේදී පිරිමි ඉසව්ව කිලෝග්‍රෑම් 50, 60, 70, 80, 90ට අඩු සහ 90ට වැඩි බර පන්ති යටතේ ද, කාන්තා තරග කිලෝග්‍රෑම් 55 සහ 70ට අඩු හා 70ට වැඩි ලෙස බර පන්ති 3ක් යටතේත්, පිරිමි/කාන්තා විවෘත සහ මිශ්‍ර කණ්ඩායම් ලෙසත් තරග පැවැත්වේ.
සෑම බර පන්තියකම මුල් ස්ථාන 3 සඳහා පදක්කම් පිරිනැමෙන අතර, දක්ෂතම කණ්ඩායම සහ විවෘත තරගාවලියේ මුල් ස්ථාන 3 වෙනුවෙන් පදක්කම් සමඟ මුදල් ත්‍යාග පිරිනැමෙන බව ද සංවිධායකයෝ පවසති.
සහභාගි වන සැමට සහතික පතක් පිරිනැමීමට කටයුතු කර තිබේ.
මිශ්‍ර කණ්ඩායමක් සඳහා ක්‍රීඩකයන් දෙදෙනකු සහ ක්‍රීඩිකාවක් ඇතුළත් විය යුතු අතර, අතිරේක ක්‍රීඩකයෙක් ද නම් කළ හැකිය.
එක් තරග වටයක් විනාඩි දෙකක් පැවැත්වෙන අතර, සමබරතාව ගිලිහි නොවැටුණහොත්, වැඩි පහරදීම් ඇති තාක්ෂණික ක්‍රීඩකයාට ජය හිමි වේ. එක් ක්‍රීඩා සමාජයකින් කණ්ඩායම් කිහිපයක් අයදුම් කළ හැකිය.
තම අයදුම්පත් තැපැල් මඟින් අප්‍රේල් මස 6 වැනි දිනට පෙර එත්නෝ ක්‍රීඩා සම්මේලනය, අංක 91, ‘ජන නැඟුම’ මොරොන්තුඩුව හන්දිය, මොරොන්තුඩුව, වාද්දුව ලිපිනයට යොමු කළ යුතුය. වැඩි විස්තර උදිත පීරිස් 0785167721/ 0717694433 වට්ස්ඇප් මඟින් ලබාගත හැකිය.
