පස්ගොඩ සෞඛ්‍ය වෛද්‍ය නිලධාරි කාර්යාලය මඟින් ඉකෝබිට් සංකල්පය ඌරුබොක්ක ප්‍රදේශයේ වෙ‍ෙළඳසල්වලට නියමු ව්‍යාපෘතියක් ලෙස හඳුන්වා දී ඇත. ඉකෝබිට් සංකල්පය හඳුන්වාදෙමින් ව්‍යාපාරිකයන් දැනුම්වත් කරනු ලැබුවේ ඌරුබොක්ක මහජන සෞඛ්‍ය පරීක්ෂක කේ.ජී.ඒ. ජිනේන්ද්‍ර මහතා විසිනි. මහජන සෞඛ්‍ය පරීක්ෂක කේ.ඒ.ජී. ජිනේන්ද්‍ර මහතා පසුගිය දිනවල අප කළ වැඩසටහන්වලදී අපි දැක්ක දෙයක් තමයි පොලිතීන්, ප්ලාස්ටික් විශාල ප්‍රමාණයක් පරිසරයට මුදා හැර තිබීම. එයට විසඳුමක් ලෙස ඉකෝබිට් සංකල්පය වෙළෙඳසල්වලට හඳුන්වා දී ඒ තුළින් ඉවත දමන ප්ලාස්ටික් බෝතල් තුළට ඔබගේ ව්‍යාපාරයේ ඉවත දමන ලන්ච් ෂීට්, ගොසරි බෑග්, ෂොපින් බෑග්, පොලිතීන්, ටොපි කොළ, බිස්කට් ඇසුරුම් වැනි දේවල් ප්ලාස්ටික් බෝතල් තුළට දැමිය යුතුය. බෝතලය පිරුණු පසු පියන වසා එම බෝතලය එළවළු, මල් වැනි වගාවන් සිදු කිරීමේදී පාත්ති සකස් කිරීමට මෙන්ම නි‍ෙවස අලංකාර කර ගැනීමට යොදා ගත හැකිය. ලොකු ප්ලාස්ටික් බෝතලයකට විශාල පොලිතීන් ප්‍රමාණයක් දැමිය හැකිය. ඌරුබොක්ක ප්‍රදේශයේ වෙළෙඳසල්වල අද සිට ඉකෝබිට් සංකල්පය ක්‍රියාත්මක කිරීමට කටයුතු කළ යුතු අතර මාසයකින් පසු නැවත අපි සොයා බලනවා. ඒ වන විට ඉකෝබිට් බෝතල දෙකක් එක් වෙළෙඳසලක තිබිය යුතුය. ඉකෝබිට් සංකල්පය වෙළෙඳසල් තුළ මෙන්ම නිවෙස්වලත් ක්‍රියාත්මක කිරීම තුළින් පරිසරයට මුදා හරින පොලිතීන් හා ප්ලාස්ටික් ප්‍රමාණය අවම වනු ඇත.
