වසර 55ක පමණ කාලයක් තිස්සේ අබලන්ව පවතින මුරුතවෙල ව්‍යාපාරයේ දකුණු ඉවුර ඇළ ප්‍රතිසංස්කරණය කිරීමේ වැඩසටහනේ සමාරම්භක උත්සවය පසුගියදා පැවැත්විණි. ක්ලීන් ශ්‍රී ලංකා වැඩසටහනට සමගාමීව වාරිමාර්ග දෙපාර්තමේන්තුවේ 125 සංවත්සරය නිමිත්තෙන් මෙම වාරි ප්‍රතිසංස්කරණ වැඩසටහන ක්‍රියාත්මක කෙරේ. හම්බන්තොට දිස්ත්‍රික්කයේ ක්‍රියාත්මක කෙරෙන ප්‍රධානතම සංවර්ධන ව්‍යාපෘතිය මුරුතවෙල දකුණු ඇළ ප්‍රතිසංස්කරණය කිරීම බව වීරකැටිය වාරිමාර්ග ඉංජිනේරු කාර්යාලයේ ප්‍රකාශකයකු පැවසීය.
මුරුතවෙල ව්‍යාපාරයේ දකුණු ඇළ දීර්ඝ කාලයක් තිස්සේ ගස් කොළන් වැවී ඇළ ගොඩ වී අබලන්ව පැවතීම නිසා ඒ හරහා වාරි ජලය නිකුත් කිරීමට නොහැකිවූ බවත් ජල හිඟකමින් යල කන්නයේ වී වගාව සිදු කිරීමට නොහැකිව ගොවීන් දැඩි ලෙස අසරණ වී සිටි බවත් මුරුතවෙල දකුණු ඇළ ගොවි සංවිධානයේ නියෝජිතයකු පැවසීය. මෙම ඇළ ප්‍රතිසංස්කරණය කිරීමෙන් පසු මුරුතවෙල ජලාශයේ සිට කිරම ඔය ව්‍යාපාරයේ හඹුමණ්ඩිය අමුණ දක්වා ජලය ගෙන යාමට හැකි වේ. එනිසා කිරම ඔය ව්‍යාපාරයේ ජලය හිඟයටද විසඳුමක් ලැබේ. මෙම ඇළ පිළිසකර කිරීමෙන් මුරුතවෙල දකුණු ඉවුරේ කුඹුරු අක්කර 1200ක පමණ ජල හිඟයෙන් තොරව වී වගා කළ හැකි අතර, එළවළු, පලතුරු භෝග වගාවන්ද සිදු කළ හැකි බව ගොවීහු පවසති.
හම්බන්තොට දිස්ත්‍රික් වාරිමාර්ග අධ්‍යක්ෂ එච්.ආර්.ඩබ්ලිව්.කේ. පේමතුංග මහතාගේ උපදෙස් අනුව වීරකැටිය ප්‍රාදේශීය වාරිමාර්ග ඉංජිනේරු ගයාන් මාඳුවාවේගොඩ මහතා ඇතුළු කාර්යාල මණ්ඩලය මෙම වැඩසටහන ක්‍රියාත්මක කරති. වාරිමාර්ග දෙපාර්තමේන්තුවේ යන්ත්‍ර යොදවා ගොවි ජනතාවගේ සහ ප්‍රදේශවාසීන්ගේ සහාය ලබා පිළිසකර කිරීම් අවසන් කර වාරිමාර්ග දෙපාර්තමේන්තුවේ 125 සංවත්සරය යෙදෙන මැයි 15 වැනිදා පළමු දියවර නිකුත් කිරීමට අපේක්ෂා කරන බව වීරකැටිය ප්‍රාදේශීය වාරිමාර්ග ඉංජිනේරු ගයාන් මාඳුවාවේගොඩ මහතා පැවසීය.
