පුත්තලම මූලික – රෝහලේ වැසිකිළි පද්ධති මාස කිහිපයක සිට උතුරා යාම හේතුවෙන් නේවාසිකව ප්‍රතිකාර ලබන රෝගීන් හා රෝහල් කාර්ය මණ්ඩලය මෙන්ම අවට ජනතාව දැඩි පීඩාවකට පත්ව තිබුණද වගකිව යුතු බලධාරීන් කිසිදු විසඳුමක් ලබා නොදීමත් සමඟ බරපතළ ගැටලු රැසකට පත්ව ඇති බව ජනතාව පවසති.
දිගින් දිගටම වැසිකිළි පද්ධති උතුරා ගලා යමින් මල මූත්‍ර විවෘත පරිසරයට ගලා යාමත් සමඟ බරපතළ සෞඛ්‍ය ගැටලු රැසක් මතුව තිබුණද වගකිව යුතු සෞඛ්‍ය බලධාරීන් නිහඬ පිළිවෙතක් අනුගමනය කිරීමෙන් ප්‍රතිකාර ලබා ගැනීමට පැමිණෙන රෝගීන් ඇතුළු සෙසු පිරිසගේ සෞඛ්‍ය ආරක්ෂාව බිංදුවට දමා ඇති බවද ජනතාව පවසති.
පුත්තලම දිස්ත්‍රික්කයේ ඇති රෝහල් කිහිපය අතරින් පුත්තලම මූලික රෝහල ප්‍රධාන තැනක් ගනී. ඒ හේතුවෙන් ආණමඩුව, නවගත්තේගම, වනාතවිල්ලුව, කල්පිටිය, මහකුඹුක්ඩවල, තබ්බෝව, අලුත්ගම, කොට්ටුකච්චිය ඇතුළු රෝහල්වලින් ප්‍රතිකාර ලබා ගැනීටම පැමිණෙන රෝගීන් වැඩිදුර ප්‍රතිකාර සඳහා පුත්තලම මූලික රෝහලට පැමිණෙති. මෙම රෝහලේ බාහිර රෝගී අංශයට දෛනිකව ප්‍රතිකාර ලබා ගැනීම සඳහා රෝගීන් දහසකට ආසන්න පිරිසක් පැමිණෙන බවද පැවසේ.
ඒ සමඟම පුත්තලම මූලික රෝහලේ දෛනිකව 800කට ආසන්න නේවාසික රෝගීන් පිරිසක් ප්‍රතිකාර ලබන අතර මෙම සියලු දෙනා වෙනුවෙන් ඇති පහසුකම් කිසිදු ලෙසකින් ප්‍රමාණවත් නොවීම මෙම තත්ත්වයට හේතුවී ඇති බවද කියයි. එවන් වටපිටාවක් තුළ රෝහලේ නේවාසික රෝගීන් රැඳී සිටින වාට්ටු සංකිර්ණ කිහිපයක් තුළ කැසිකිළි වැසිකිළි උතුරා යාමත් සමඟ වාට්ටු තුළ රෝගීන්ට රැඳී සිටීමට සිදුව ඇත්තේ අධික දුගඳ හා මැසි මදුරු කරදරයට අමතරව සෞඛ්‍ය ගැටලු රැසකුත් මතු කරමිනි.
මෙයින් බරපතළ තත්ත්වය වී ඇත්තේ හෘද රෝග ඒකකය අසල වැසිකිළි ඒකකය සම්පූර්ණයෙන් උතුරා යාමෙන් මෙම ඒකකයට පැමිණෙන රෝගීන් හා කාර්ය මණ්ඩලය බරපතළ පීඩාවට සහ අසීරුතාවට ලක්ව ඇති බව කියයි.
මෙලෙස සමස්ත රෝහල් පද්ධතිය පුරාම මෙලෙස කැසිකිළි හා වැසිකිළි පද්ධතිය සම්පූර්ණයෙන් උතුරා යමින් සිදුවන පීඩාවට නිසි ක්‍රියා මාර්ගයක් නොගැනීම හේතුවෙන් පුත්තලම මූලික රෝහල ලෙඩ බෝ කරන මධ්‍යස්ථානයක් බවට පත් කර ඇති බවද ජනතාව පවසති.
පුත්තලම මූලික රෝහල් අධ්‍යක්ෂ වෛද්‍ය තිළිණා වනිගසේකර මෙ‍ෙණවියගෙන් මේ පිළිබඳව කළ විමසීමේදී පවසා සිටියේ මෙවැන්නකි.
“මම මේ රෝහලට ඇවිත් දැනට මාස කිහිපයක් පමණයි ගෙවී තිබෙන්නේ. ඔය ප්‍රශ්නය අවුරුදු 15ක් පුරා පැවති ප්‍රශ්නයක්. අඩුම තරමින් මේ රෝහලට ජල නළ කාර්මිකයකුවත් නැහැ, එවැනි තත්ත්වයක් පවතින්නේ.
මේ ගැටලුව බරපතළ එකක් බව මම දන්නවා. නමුත් අවුරුදු ගණනක් තිබුණ ප්‍රශ්නයක් මට මාස කිහිපයකින් කරන්න බැහැ. ඒ සඳහා මම අදාළ ඉහළ නිලධාරීන් දැනුම්වත් කර තිබෙනවා. ඒ අය මේ සඳහා මැදිහත්වීම් කරමින් සිටිනවා. අනික පුත්තලම මූලික රෝහලේ පිහිටීම ගත්තොත් මුහුදු මට්ටමින් පහළ තිබෙන්නේ එයත් මේ ගැටලුවට බලපා තිබෙනවා යැයි ද ඇය පැවසුවාය.
