විදේශිකයන්ට අලෙවි කිරීම සඳහා සූදානම් කර තිබූ කොතල හිඹුටුවලින් නිපදවන ලද කෝප්ප 30ක් සමඟ සැකකරුවකු අත්අඩංගුවට ගත් බව පාණදුර දකුණ මූලස්ථාන පොලීසිය පවසයි. මෙසේ අත්අඩංගුවට ගෙන ඇත්තේ පාණදුර ප්‍රදේශයේ පදිංචි 26 හැවිරිදි පුද්ගලයෙකි. පාණදුර ප්‍රදේශයේ සංචාරක හෝටලයක කොතල හිඹුටුවලින් නිපදවන ලද කෝප්ප අලෙවි කරන බවට ලද තොරතුරක් මත පොලිස් කණ්ඩායම හෝටලයේ සඟවා තිබූ කෝප්ප 30ක් සොයාගෙන සැකකරු අත්අඩංගුවට ගෙන තිබේ. සැකකරු රාජගිරිය ප්‍රදේශයෙන් රැගෙන විත් පාණදුර සංචාරක හෝටලයේ සඟවා, විශේෂයෙන් චීන ජාතිකයන් ඉලක්ක කරගනිමින් කාලයක පටන් කොතල හිඹුටු කෝප්ප අලෙවි කර තිබූ බවට පරීක්ෂණවලදී හෙළි වී ඇත. සැකකරු පාණදුර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි. පාණදුර මූලස්ථාන පොලිස් පරීක්ෂක උපුල් ප්‍රියංකර මහතාගේ උපදෙස් පරිදි අපරාධ අංශ නිලධාරීහු පරීක්ෂණ පවත්වති.
