දිවුලපිටිය ප්‍රාදේශීය ලේකම් කොට්ඨාසයේ වැඩිහිටි සමිතිවල සාමාජිකාවන් විසින් ඉදිරිපත් කරන ලද ‘දෙටු පුරවැසි රැඟුම් වැයුම්’ වැඩසටහන පසුගියදා දිවුලපිටිය ප්‍රාදේශීය ලේකම් ඩබ්.ඩබ්.එම්.ඩී. කුමාරි මහත්මියගේ ප්‍රධානත්වයෙන් දිවුලපිටිය නෙත්මි උත්සව ශාලාවේදී පැවැත්විණි.
වැඩිහිටි සමිති සාමාජිකයින්ගේ නිර්මාණාත්මක කුසලතා එළිදැක්වීමට අවස්ථාව සැලසීම මෙන්ම එමඟින් ඔවුන්ගේ මානසික සෞඛ්‍යය වර්ධනය කිරීම උදෙසා මෙය පැවැත්වීය. පින්නකැලේවත්ත සැනසුම, හපුගහගම ස්වර්ණමාලී, පින්නකැලේ දකුණ විදර්ශනා යන වැඩිහිටි සමිති ඒකාබද්ධ කර ගනිමින් පැවති මෙම වැඩසටහන, එම වසම්වලට අදාළ ග්‍රාම නිලධාරීන් වන ඩබ්.එච්.ඒ. නිල්මිණි කුමාරි, කේ.එම්. සුජීවා කුලතුංග, එච්.පී.සී.ඊ. පතිරණ යන මහත්මීහු විසින් සංවිධානය කරනු ලැබූහ.
මෙම අවස්ථාවට දිවුලපිටිය ප්‍රාදේශීය ලේකම් කාර්යාලයේ පරිපාලන ග්‍රාම නිලධාරී කේ.ආර්.ඩබ්.කේ. කත්තොට, සමාජ සේවා නිලධාරී සුනිමල් ද සිල්වා, සමාජ සේවා සංවර්ධන නිලධාරී තනූජා සුරංජි යන මහත්ම මහත්මීන් සහ වැඩිහිටි සමිතිවල සාමාජිකාවන් ඇතුළු රාජ්‍ය නිලධාරීන් පිරිසක් එක්ව සිටියහ.
