මීගහතැන්න, වෙලපහළ මාර්ගයේ පහළ ඇළ අසල කොටස කඩාවැටී මාරක අනතුරකට අතවනමින් තිබෙන බව ප්‍රදේශවාසීහු පවසති.
පසුගිය ප්‍රාදේශීය සභා පාලන සමයේ රුපියල් ලක්ෂ ගණන් වැයකර කොන්ක්‍රීට් කළ මෙම මාර්ගයේ මීගහතැන්න නගරයෙන් ආරම්භ වන ස්ථානයේ මීටර් 150ක පමණ කොටසක් ඇළට කඩාවැටී වසරකට ආසන්න කාලයක සිට ගමනාගමනය පාපැදි හා පාගමනට පමණක් සීමාවී තිබේ. වළල්ලාවිට ප්‍රාදේශීය සභාව සතු මෙම මාර්ගය පසුගිය කාලයේ කොන්ක්‍රීට් කළ ද නිසි ලෙස මාර්ගය පස් දමා ප්‍රමිතියෙන් යුතුව ගොඩකිරීම සිදු නොකර, කුඹුරේ මඩ දමා ඒ මත කොන්ක්‍රීට් ඇතිරීම හේතුවෙන් කොන්ක්‍රීට් තට්ටුවට යටින් සේදී කොන්ක්‍රීට් තට්ටුව පුපුරා මාර්ගය විනාශ වී ඇති බවට ප්‍රදේශයේ ජනතාව චෝදනා කරති. විශාල අනතුරක් වීමට පෙර මෙම මාර්ගයේ අවදානම් ස්ථානය ප්‍රතිසංස්කරණය කර දෙන්නැයි ප්‍රදේශවාසීහු වළල්ලාවිට ප්‍රාදේශීය සභාවෙන් ඉල්ලති.
