දර්ගා නගරය, ආඳාවල, මීගම ශ්‍රී මංගලාරාම විහාරස්ථානයේ අභිනව අටවිසි බුදුරුව සහිත බෝධි ප්‍රාකාරය විවෘත කිරීමේ පුණ්‍ය මහෝත්සවය, විහාරාධිපති හේවිස්සේ උපතිස්ස නාහිමියන්ගේ අනුශාසනා පරිදි මහා සංඝරත්නය වැඩම කර පෙරේදා (19) උදෑසන සිදු කෙරිණි. විහාරස්ථ දායක සභාවේ මැදිහත් වීමෙන් ඉදිකෙරුණු මෙම බෝධි ප්‍රාකාරයට වැඩම කළ මහා සංඝරත්නය ප්‍රථම අෂ්ට පරිෂ්කාර පූජාව සිදු කිරීමෙන් අනතුරුව දායක කාරකාදී පින්වතුන් ඇතුළු ගම්වාසීහු කිරිපිඬු පූජාවක් සහිත අෂ්ට පරිෂ්කාර පූජා කර මහා සංඝරත්නය වෙතින් ආගමික ආශීර්වාදය ලබා ගත්හ. මීගම සමන් දේවාලයේ භාරකාර ප්‍රධාන කපු ධුරන්දර විජිත සමන්ත විජේසිංහ මහතා මෙම පින්කම වෙනුවෙන් විහාරස්ථ දායක සභාව වෙත එම අවස්ථාවේ රුපියල් 50,000ක මූල්‍ය ආධාරයක් සිදු කර ගිහි අනුශාසනාව පැවැත්වීය.
බෝධි ප්‍රාකාරය විවෘත කිරීමේ සුබ හෝරාවේ පුණ්‍ය මහෝත්සවයට විහාරාධිපති හේවෙස්සේ උපතිස්ස, මූණමල්වත්ත සෙනවිරත්නාරාමාධිපති ඉඳුරුවේ සුමනානන්ද, පන්නිල සිරිවිමල, මොරගල සුමනතිස්ස, වැල්ලවායේ ආරිඥාන, අනුරාධපුර සද්ධානන්ද, කිරිවන්දල විමලධම්ම යන හිමිවරු වැඩම කළ අතර, මීගම සමන් දේවාලයේ භාරකාර විජිත සමන්ත, දායක සභාවේ සභාපති ලාල් ගුණසේකර, ලේකම් පී.කේ. අනුර, භාණ්ඩාගාරික දීපිකා හෙට්ටිආරච්චි යන මහත්ම මහත්මීන් ඇතුළු ප්‍රදේශයේ රාජ්‍ය නිලධාරීන්, ගම්වැසියන් දායක පින්වතුන් ඇතුළු පිරිසක් මෙම පින්කමට සහභාගි වූහ.
