කැබිතිගොල්ලෑව පොලිස් ස්ථාන භූමියේ වළලා තිබූ වසර ගණනාවක් පැරණි පුද්ගල නාශක බෝම්බයක් ඩෑෂ් (DASH) නමැති බිම් බෝම්බ නිශ්ක්‍රිය ආයතනය විසින් පෙරේදා (19) සොයාගත් බව කැබිතිගොල්ලෑව පොලීසිය පවසයි.
කැබිතිගොල්ලෑව පොලිස් වසමේ ත්‍රස්තවාදී තර්ජන පැවති වකවානුවේ පොලිස් ස්ථානයේ ආරක්ෂාව සඳහා එවකට සිටි නිලධාරීන් විසින් ආරක්ෂක මුරකුටි සහ වැට මායිම් බිම් තීරු ප්‍රදේශවල මෙම පුද්ගල නාශක බෝම්බ වළලා ඇත. ඒ පිළිබඳ ලද තොරතුරකට අනුව 2024.10.10 වන දින කිලිනොච්චියේ රාජ්‍ය නොවන සංවිධානයක් වන ඩෑෂ් (DASH) නමැති බිම් බෝම්බ නිශ්ක්‍රිය ආයතනයෙන් කරන ලද ඉල්ලීමට අනුව මෙම පරීක්ෂාව සිදුකර ඇත.
ඒ අනුව කිලිනොච්චියේ පිහිටි ඩෑෂ් (DASH) බිම් බෝම්බ නිශ්ක්‍රිය අංශයේ ඕ.ඒ.සී.ඩී. ඉද්දමල්ගොඩ මහතා ඇතුළු නිලධාරීන් කණ්ඩායමක් කැබිතිගොල්ලෑව පොලිස් ස්ථානය වෙත පැමිණ ඇත. අනතුරුව විද්‍යුත් උපකරණ යොදාගනිමින් කැබිතිගොල්ලෑව පොලිස් ස්ථානය වටා සිදු කළ පරීක්ෂාවෙන් පසු පොලිස් ස්ථාන භූමියේ බස්නාහිර වැට මායිමෙන් පිටත එනම් කැබිතිගොල්ලෑව මූලික රෝහලට අයත් රජයේ බිම් කොටසේ පැරණි පුද්ගල නාශක බෝම්බයක් තිබී හමුවී ඇත.
මේ පිළිබඳව කැබිතිගොල්ලෑව මහේස්ත්‍රාත් අධිකරණයට කරුණු වාර්තා කර ඇත. ඒ අනුව පුද්ගල නාශක බෝම්බය නිශ්ක්‍රිය කර විනාශ කිරීමට කලාප අණදෙන නිලධාරී, විශේෂ කාර්‍ය බළකා කඳවුර, වවුනියාව වෙත නියෝග කර ඇත.
මෙම බිම් ප්‍රදේශයේ මෙවැනි පුද්ගල නාශක බෝම්බ තවදුරටත් තිබේදැයි සෙවීමට ඉදිරී පරීක්ෂණ සිදු කිරීමට නියමිතව ඇත.
