අඹ වගා භූමියකට ඇතුළුවී රුපියල් ලක්ෂ තුනකට ආසන්න ටොම් ජේ.සී. වර්ගයේ අඹ ගෙඩි 1238ක් සොරකම් කළ පුද්ගලයන් තිදෙනෙකු දඹුල්ල ආර්ථික මධ්‍යස්ථානය අසලදී පෙරේදා (19) අත්අඩංගුවට ගත් බව මඩාටුගම පොලීසිය පවසයි.
මෙලෙස අත්අඩංගුවට පත්ව ඇත්තේ දඹුල්ල කපුවත්ත, 43 කණුව ප්‍රදේශයේ පදිංචි 36 සහ 29 හැවිරිදි පුද්ගලයෙකු සහ දඹුල්ල සියඹලාවැව, විජය කුමාර මාවතේ පදිංචි 26 හැවිරිදි පුද්ගලයෙකි.
මඩාටුගම, මයිලගස්වැව ප්‍රදේශයේ පදිංචි අඹ වගාකරුවෙකු සිදු කළ පැමිණිල්ලකට අනුව පොලීසිය මෙම විමර්ශනය ආරම්භ කර ඇත.
පැමිණිලිකරු ඉකුත් ජනවාරි මාසයේ දිනක අඹ වගා භූමියට අවසන් වරට ගොස් ටොම් ජේ.සී. අඹ වගාවේ ගෙඩි හට ගෙන ඇති ගස් පරීක්ෂා කර බැලීමෙන් අනතුරුව, ඔහුගේ පුත්‍රයා විසින් ගස්වල තිබූ එම අඹ ගෙඩි 1850කට ආවරණ යොදා ඇති අතර ඉන්පසු දින පහකට පමණ පසු ගොස් නැවත පරීක්ෂා කර බැලීමේදී, ආවරණ දමා තිබූ අඹ ගෙඩි 1238ක් සොරුන් විසින් කඩාගෙන ඇති බව සඳහන් කරමින් මෙම පැමිණිල්ල ඉදිරිපත් කර තිබුණි.
සැකකරුවන් තිදෙනා සොරකම් කර ඇති අඹ ගෙඩි 1238 බර කිලෝග්‍රෑම් 835ක් පමණ වන බවත් එහි වටිනාකම රුපියල් 271,586කි.
දඹුල්ල ආර්ථික මධ්‍යස්ථානයේ පළමු දොරටුව අසලදී අත්අඩංගුවට ගත් මෙම සැකකරුවන් තිදෙනා අධිකරණයට ඉදිරිපත් කිරීමට නියමිතව ඇත.
