තිස්සමහාරාම, පන්නෙගමුව රාජකීය විදුහලේ පවත්වා ගෙන යනු ලබන අ.පො.ස.(සාමාන්‍ය පෙළ) විභාග මධ්‍යස්ථානයේ සම්බන්ධීකරණ නිලධාරියා ලෙස කටයුතු කරමින් සිටි විදුහල්පතිවරයෙකු පන්නෙගමුව මහජන පොළ ආසන්නයේදී පෙරේදා (19) සවස 6.30ට පමණ වෑන් රියක ගැටී ජීවිතක්ෂයට පත්ව ඇතැයි තිස්සමහාරාම පොලීසිය පවසයි.
ජීවිතක්ෂයට පත්ව ඇත්තේ සූරියවැව, විහාරගල පදිංචි රුවන් පතිරණගේ පියසේන නමැති 58 හැවිරිදි සූරියවැව වීරියගම කනිටු විදුහලේ විදුහල්පතිවරයාය. ඔහු එක්දරු පියෙකි.
තිස්සමහාරාමයේ සිට ලුණුගම්වෙහෙර දෙසට ධාවනය වූ වෑන් රථය පාගමනින් යමින් සිටි විදුහල්පතිවරයා යටකර වෙනත් වාහන දෙකක ගැටී නතර වී ඇතැයි පොලීසිය පවසයි. වෑන් රථයේ රියැදුරු දෙහිඕවිට, මාගම්මන ප්‍රදේශයේ පදිංචි 25 හැවිරිදි පුද්ගලයෙකි. ඔහු තිස්සමහාරාම පොලීසිය විසින් අත්අඩංගුවට ගෙන ඇත.
ජීවිතක්ෂයට පත් විදුහල්පතිවරයාගේ දේහය තිස්සමහාරාම දෙබරවැව රෝහලේ තැන්පත් කර තිබේ.
තිස්සමහාරාම පොලීසිය අනතුර ගැන වැඩිදුර පරීක්ෂණ පවත්වයි.
