නිකවැරටිය බස් නැවතුම්පොළ පිටුපස ඇති ප්‍රධාන අතුරු මාර්ගය ආරම්භ වන ස්ථානයේ ඇති විදුලිය ට්‍රාන්ස්ෆෝමරය එම මාර්ගය මැද තිබීම හේතුවෙන් දැඩි අනතුරුදායක තත්ත්වයක් මේ වන විට නිර්මාණය වී ඇති බව ජනතාව පවසති.
වසර ගණනාවකට පෙර මෙම ට්‍රාන්ස්ෆෝමරය මෙම ස්ථානයේ සවි කළ ද එක් පසෙක පෞද්ගලික හිස් බිම්කඩක් තිබීම හේතුවෙන්, ජනතාව එම බිම්කඩ හරහා ගමන් කිරීම නිසා අනතුරුදායක තත්ත්වයක් නිර්මාණය නොවී තිබූ බව ද ජනතාව පවසති.
එහෙත් මේ වන විට එම පෞද්ගලික හිස් බිම්කඩෙහි ඉදිකිරීමක් සිදුවෙමින් පවතින අතර එහි මායිම් වැට මාර්ගය අද්දරින් ඉදිවීමත් සමඟ මාර්ගයේ ගමනා ගමනයේදී දැඩි අනතුරුදායක තත්ත්වයක් නිර්මාණය වූ බවද ජනතාව පවසති.
ට්‍රාන්ස්ෆෝමරයේ පොළොවට සම්බන්ධ කම්බි පද්ධතියද, ඉදිකිරීම් සිදු වෙමින් පවතින, එම පෞද්ගලික බිම් කොටස තුළ තිබීමද ගැටලුවක්ව පවතින බවද ජනතාව බලධාරීන්ට පෙන්වා දෙති. ට්‍රාන්ස්ෆෝමරය පාර මැද තිබීම හේතුවෙන් වාහන දෙකක් මාරු වීමට නොහැකිවා මෙන්ම, එම ස්ථානයෙන් පයින් ගමන් කිරීම පවා අනතුරුදායකය. දෛනිකව මෙම මාර්ගයේ අති විශාල පිරිසක් පයින් ගමන් කෙරෙන අතර විශාල රථවාහන සංඛ්‍යාවක් ද ගමන් කෙරෙන බවද ජනතාව පවසති.
මෙම මාර්ගයේ ප්‍රධාන අමතර පන්තියක්, පෙර පාසලක්, විශේෂ අවශ්‍යතා සහිත දරුවන්ගේ පාසලක්, ව්‍යාපාරික ස්ථාන රැසක් සහ නිවාස රැසක්ද පවතින බවද, එම නිසා මෙම මාර්ගය දිවා රාත්‍රි ජනාකීර්ණ මාර්ගයක් බවද, ජනතාව අවධාරණය කර සිටිති.
