අර්ජුන් ඇලෝසියස් සහ ඔහුගේ පියා පෞද්ගලික බැංකුවක් හරහා දේශපාලනඥයන්ට සහ ඔවුන්ගේ හිතවතුන්ට රුපියල් මිලියන 1098ක් වටිනා චෙක්පත් 168ක් අත්සන් කර ලබා දී ඇතැයි වෙ‍ෙළඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ ඊයේ (20) පාර්ලිමේන්තුවේදී ප්‍රකාශ කළේය.
ඇතැමුන්ට ඍජුවම මුදල් ලැබී ඇති අතර තවත් සමහරුන්ට මෙන්ඩිස් ඩිස්ටලරීස් වෙතින් එහි වයින් ස්ටෝර්ස් හරහා චෙක්පත් ලැබී ඇති බවද ඇමතිවරයා පැවසීය.
එමෙන්ම ඉතිහාසයේ හෙළිදරව් නොවූ පරීක්ෂණ බොහෝ ඇති බවත්, වසර 10ක පමණක් නොව 15ක පරීක්ෂණ පවා ඉදිරියේදී සිදු කරන බවද අමාත්‍ය වසන්ත සමරසිංහ මහතා පැවසීය.
ඇතැමුන් ඉතිහාසය අමතක කරන්න හැදුවත් ඉතිහාසය අමතක කර නොහැකි බව පැවසූ අමාත්‍යවරයා මේ රටේ ජනතාවට සිදු කළ හානිය වෙනුවෙන් අදාළ පුද්ගලයන්ට දඬුවම් ලැබිය යුතු බවද පැවසීය.
අපරාධ පරීක්ෂණ දෙපාර්තමේන්තු විමර්ශනවලට අනුව, මුදල් ලබාගත් අයගේ නම් ලබාදී ඇති බවද හෙතෙම පැවසීය.
බැඳුම්කර සිද්ධිය සම්බන්ධයෙන් පරීක්ෂණ සිදුකරන අතරතුර මෙන්ඩිස් අරක්කු සමාගම සමගි ජන බලවේගයේ පාර්ලිමේන්තු මන්ත්‍රී සුජීව සේනසිංහ, හර්ෂණ රාජකරුණා, සහ දයාසිරි ජයසේකර මහතා ඇතුළු පිරිසකට මුදල් ලබාදී ඇති බව අපරාධ පරීක්ෂණ දෙපාර්තමේන්තු වාර්තාවලින් හෙළිවී ඇතැයි මුදල් හා ක්‍රමසම්පාදන නියෝජ්‍ය අමාත්‍ය හර්ෂණ සූරියප්පෙරුම මහතා මෙහිදී පැවසීය. වැඩිදුරටත් අදහස් දක්වමින් අමාත්‍ය වසන්ත සමරසිංහ මහතා මෙසේද පැවසීය.
“2015 හෙළිදරව් වෙච්ච වංචා පවා තිබෙනවා. දැන් අපිට තමයි ඒ පරීක්ෂණ සිදු කරන්න වෙලා තිබෙන්නේ. දැන් අපි ඉන්නේ 2025.
දේශපාලනඥයන්ගේ හිතවතුන්ට සල්ලි බෙදපු ගිණුමත් සභාගත කරන්න කියනවා. අර්ජුන ඇලෝසියස්ට අයත් සෙලාන් බැංකුවේ ගිණුමකින් තමයි මෙම මුදල් ගෙවා තිබෙන්නෙ. මෙය සුප්‍රසිද්ධ රහසක්.
මෙම සල්ලි දීලා තිබෙන්නේ අරුම පුදුම විදියකට. සල්ලි දීලා තිබෙන්නේ වයින් ස්ටෝර්ස් එකකට. අපි ඒ ගැන ඉදිරියේදී හෙළිදරව් කරන්නම්. සමහරු ඉතිහාසය අමතක කරන්න හදනවා. නමුත් ඉතිහාසය අමතක කරන්න බැහැ. මේ රටේ ජනතාවට සිදු කළ හානිය අමතක කරන්න බැහැ. අදාළ චුදිතයන්ට දඬුවම් ලැබිය යුතු බවද අමාත්‍යවරයා අවධාරණය කළේය.
