මැතිවරණ පොරොන්දු අමු අමුවේ උල්ලංඝනය කරමින් වත්මන් රජය ජාත්‍යන්තර මූල්‍ය අරමුදලේ රූකඩයක් බවට පත්ව ඇතැයි විපක්ෂ නායක සජිත් ප්‍රේමදාස මහතා පාර්ලිමේන්තුවේදී ඊයේ (20) ප්‍රකාශ කළේය.
සාර්ව හා ක්ෂුද්‍ර ආර්ථිකය හසුරු වන ආකාරය සම්බන්ධයෙන් වත්මන් රජය පසුගිය මැතිවරණ සමයේදී පොරොන්දු රැසක් ලබාදුන් බවත් ප්‍රතිපත්ති ප්‍රකාශයෙන් පවා පෙරොන්දු වූ කරුණු අමුඅමුවේ උල්ලංඝනය කර ඇති බවත් විපක්ෂ නායකවරයා පැවසීය.
ආර්ථික වර්ධනය 5%ක ඉලක්කය කරා යා යුතු බවත් 2028 වනවිට ණය ගෙවීමේ තැනට රට පත්වනවිට මේ ආර්ථික වර්ධන වේගය සම්පූර්ණ කළ යුතු බවත් විපක්ෂ නායකවරයා පැවසීය.
විපක්ෂ නායකවරයා මේ බව සඳහන් කළේ, 2025 වසර සඳහා වන අය-වැය කාරක සභා අවස්ථාවේ විවාදයේදී සිය අදහස් දක්වමිනි.
එහිදී වැඩිදුරටත් අදහස් දැක්වූ විපක්ෂ නායක සජිත් ප්‍රේමදාස මහතා සඳහන් කළේ රාජ්‍ය ආදායම් හා පොලී අනුපාත ඉලක්ක සම්පූර්ණ කරගතයුතු බවත් ආර්ථික වර්ධන වේගය හරහා රටේ දළ දේශීය නිෂ්පාදනය ප්‍රවර්ධනය කරන රජයේ වැඩපිළිවෙළ ප්‍රමාණවත් නොවන බවත්ය.
IMF එක කියන ඕනෑම දේකට එහෙයි කියා එකඟ වන ජනවරම අමු අමුවේ උල්ලංඝනය කරන රජයක් ජනතාව අපේක්ෂා නොකරන අතර අපනයන ප්‍රවර්ධනය අත්‍යවශ්‍ය කරුණක් බවද හෙතෙම පැවසීය.
