“වනාන්තර සහ ආහාර” තේමාව මුල් කරගෙන මෙවර ජාත්‍යන්තර වනාන්තර දිනය සමරනු ලබයි.
ආහාර සුරක්ෂිතතාව, පෝෂණය සහ ජීවනෝපායන් සඳහා වනාන්තරවල තීරණාත්මක කාර්යභාරය සමරනු ලබයි.
ආහාර, ඉන්ධන, ආදායම සහ රැකියා සැපයීමට අමතරව, වනාන්තර පසෙහි සාරවත් බව සඳහා සහාය වේ. ජල සම්පත් ආරක්ෂා කරයි. වැදගත් පරාග වාහකයන් ඇතුළු ජෛව විවිධත්වය සඳහා වාසස්ථාන ලබා දෙයි.
ජීවීන්ගේ පැවැත්ම සඳහා අත්‍යවශ්‍ය වන අතර කාබන් ගබඩා කිරීමෙන් දේශගුණික විපර්යාස අවම කිරීමට වනාන්තර දායක සුවිශාල දායකත්වයක් දක්වනු ලබයි.
ලොව පිහිටි සියලු වනාන්තර සහ වනාන්තරවලින් පරිබාහිරව පිහිටි වෘක්ෂ සම්පත්වල වැදගත්කම පිළිබඳව ජන සමාජය තුළ පවතින දැනුවත්භාවය ඉහළ නැංවීමේ අරමුණින් ජාත්‍යන්තර වනාන්තර දිනය ප්‍රකාශයට පත්කරනු ලබන්නේ එක්සත් ජාතීන් සංවිධානය විසිනි. ඒ 2012 වසරේ මාර්තු 21 වැනිදාය. මෙම දිනය ප්‍රකාශයට පත්කිරීමට වෙහෙස වී කටයුතු කළ එක්සත් ජාතීන්ගේ ආහාර හා කෘෂිකර්ම සංවිධානය වාර්ෂිකව මෙම දිනය ලොව පුරා සැමරීමට මුල්වී ක්‍රියා කරයි.
මෙවර ජාත්‍යන්තර වනාන්තර දිනය වෙනුවෙන් වන සංරක්ෂණ දෙපාර්තතමේන්තුව විසින් හෙක්ටයාර් 10ක භූමියක ආහාරමය ශාඛ රෝපණය කිරීමේ වැඩසටහනක් දියත් කරන බව වන සංරක්ෂණ අධ්‍යක්ෂ ජනරාල් නිශාන්ත එදිරිසිංහ මහතා පැවසීය.
මෙහි සමාරම්භක උත්සවය වටරැක වරාව ප්‍රදේශයේදී අද දින පැවැත්වෙන බවත් අක්කරයක භූමියක ආහාරමය ශාක පැළ 600ක් රෝපණය කරන බවත් නිශාන්ත එදිරිසිංහ මහතා සඳහන් කළේය.
පරිසර අමාත්‍යාංශයේ ලේකම් රෝහිත උඩුවාවල මහතාගේ ප්‍රධානත්වයෙන් පැවැත්වෙන මෙම අවස්ථාවට එක්සත් ජාතීන්ගේ ආහාර හා කෘෂිකර්ම සංවිධානයේ මෙරට නියෝජිතයන් ඇතුළු විශාල පිරිසක් සහභාගි වීමට නියමිතය.
