අමෙරිකා එක්සත් ජනපද ඉන්දු-පැසිෆික් විධානයේ (INDOPACOM) අණදෙන නිලධාරි අද්මිරාල් සැමුවෙල් ජේ. පපාරෝ මහතා සංචාරයක් සඳහා ශ්‍රී ලංකාවට පැමිණ තිබේ.
දෙදින සංචාරයක් සඳහා ශ්‍රී ලංකාවට පැමිණි ඒ මහතා, අද (21) දක්වා මෙරට රැඳී සිටින බව ශ්‍රී ලංකාවේ එක්සත් ජනපද තානාපති කාර්යාලය පවසයි.
ශ්‍රී ලංකා සංචාරය අතරතුර, අද්මිරාල් පපාරෝ මහතා, ශ්‍රී ලංකා රජයේ ජ්‍යෙෂ්ඨ නිලධාරීන් සහ හමුදා නායකයින් සමඟ සම්බන්ධ වී ඉන්දු-පැසිෆික් කලාපයේ දිගුකාලීනව පවතින එක්සත් ජනපද-ශ්‍රී ලංකා ආරක්ෂක හවුල්කාරිත්වය නැවත තහවුරු කිරීමටත්, ඉන්දු-පැසිෆික් කලාපීය ස්ථාවරත්වය සහ ආරක්ෂාව සඳහා වන එක්සත් ජනපද දැක්ම බෙදා ගැනීමටත් කටයුතු කරනු ඇත.
ඒ මහතාගේ සංචාරය, ශ්‍රී ලංකාව සමඟ ඇති ආරක්ෂක සහයෝගීතාව වැඩිදියුණු කිරීමට සහ ඉන්දු-පැසිෆික් කලාපයේ පොදු අභියෝගවලට මුහුණ දීම සඳහා වන එක්සත් ජනපදයේ අඛණ්ඩ කැපවීම අවධාරණය කරයි.
එක්සත් ජනපද ඉන්දු-පැසිෆික් විධානයේ අණදෙන නිලධාරි අද්මිරාල් සැමුවෙල් පපාරෝ මහතා පිළිබඳව:
අද්මිරාල් සෑම් පපාරෝ මහතා, ඕල්ඩ් ඩොමීනියන් විශ්වවිද්‍යාලයෙන් (Old Dominion University) ජාත්‍යන්තර අධ්‍යයනය පිළිබඳ ශාස්ත්‍රපති උපාධියක් සහ නාවික පශ්චාත් උපාධි පාසලෙන් පද්ධති විශ්ලේෂණය පිළිබඳ ශාස්ත්‍රපති උපාධියක් ලබා ඇත. එක්සත් ජනපද නාවික ගුවන් නියමුවෙකු වන ඔහු TOPGUN පාඨමාලාවේ උපාධිධාරියෙකු වන අතර, F-14, F-15 සහ F/A-18 යානාවන්හි පැය 6,000කට අධික පියාසර කාලයක් සමඟ වාහක මත ගොඩබෑම් 1,100ක් සිදු කර තිබේ.
මුහුදු මෙහෙයුම් අණදෙන චාරිකා අතරට ජපානයේ යොකොසුකාහි ඉදිරි පෙළ නාවික බළකායේ ස්ට්‍රයික් ෆයිටර් බළඟණයේ (VFA )195 ට අනුයුක්තව කටයුතු කිරීම, Kitty Hawk Strike Group වෙත අනුයුක්තව: අණදෙන නිලධාරි, Carrier Air Wing 7, Dwight D. Eisenhower Strike Group හි කටයුතු කිරීම සහ Carrier Strike Group Ten හි අණදෙන නිලධාරියා ලෙස කටයුතු කිරීම ඇතුළත් වේ. ගොඩබිමේදී ඔහු 3 වන බළසේනාව, 10 වන කඳුකර සේනාංකය සහ 173 වන ගුවන් විහිදුම් බළකාය සමඟ ඇෆ්ගනිස්ථානයේ නුරිස්තාන් පළාතේ පළාත් ප්‍රතිසංස්කරණ කණ්ඩායමට අණ දුන්නේය.
වෙරළාරක්ෂක කටයුතුවලදී ඔහු නාවික ගුවන් හමුදා අණදෙන නිලධාරී කාර්යාලයේ F/A-18 යානා පුහුණු කිරීමේ, සූදානම් කිරීමේ සහ අදාළ අවශ්‍යතා සඳහා වූ කාර්ය මණ්ඩල නිලධාරියෙකු ලෙස කටයුතු කළේය.
ඔහු VFA-106 හි අණදෙන නිලධාරියා ලෙස සේවය කළ අතර, නාවික මෙහෙයුම් ප්‍රධානියාගේ කාර්ය මණ්ඩලයේ OPNAV N80 ශාඛා ප්‍රධානියා ලෙස ද සේවය කළේය. ඔහු විධායක සහකාර ලෙස එක්සත් ජනපද නාවික බළඇණියේ අණදෙන නිලධාරිවරයාට ද, ඉන් අනතුරුව 31 වන නාවික මෙහෙයුම් ප්‍රධානියාට ද සේවය කළේය.
ඔහු එක්සත් ජනපද මධ්‍යම විධානයේ J3 හි මෙහෙයුම් අධ්‍යක්ෂවරයාද විය. ඔහු එක්සත් ජනපද නාවික හමුදා මධ්‍යම විධානයේ /එක්සත් ජනපද 5 වැනි බළ ඇණියේ / ඒකාබද්ධ සමුද්‍රීය බළකායේ අණදෙන නිලධාරිවරයා වශයෙන්ද කටයුතු කළේය. ඔහු මෑත කාලීනව ලැබූ නවතම පත්වීම වනුයේ 2021 මැයි සිට 2024 අප්‍රේල් දක්වා එක්සත් ජනපද පැසිෆික් බළකායේ අණදෙන නිලධාරිවරයා ලෙස කටයුතු කිරීමයි.
පපාරෝ මහතා 2024 මැයි මාසයේ දී එක්සත් ජනපද ඉන්දු-පැසිෆික් බළකායේ අණදෙන නිලධාරියා ලෙස රාජකාරි භාර ගත්තේය. ඔහු ජාතියේ පැරණිතම සහ විශාලතම සටන් විධානයේ 27 වන අණදෙන නිලධාරියා වේ. USINDOPACOM බළකායට සොල්දාදුවන්, නාවිකයින්, නාවික භටයන් (Marines), ගුවන් භටයින්, ආරක්ෂකයින්, වෙරළාරක්ෂකයින් සහ ආරක්ෂක දෙපාර්තමේන්තුවේ සිවිල් වැසියන්ද ඇතුළු 380,000ක් ඇතුළත් වන අතර, ජාතීන් 36ක් සහ වේලා කලාප 14ක් සහිත ලෝක ජනගහනයෙන් සියයට 60ක් ආවරණය වන පරිදි ඉන්දු-පැසිෆික් කලාපයේ සියලුම එක්සත් ජනපද හමුදා ක්‍රියාකාරකම් සඳහා වගකීම දරයි.
