වඩාත් නිපුණතාවයක් සහිත ශ්‍රමිකයන් විදේශ රැකියා සඳහා යොමු කරමින් රටේ සෑම ගමකටම සමානව විදේශ රැකියා අවස්ථා ලබාදීමට රජය තීරණය කර තිබේ.
ඒ සඳහා කිසිඳු දේශපාලන මැදිහත්විමක් නොමැති අතර වඩාත් නිපුණතාවයක් සහිත ශ්‍රමිකයින් විදේශ රැකියා සඳහා යොමු කිරීම නව රජයේ අරමුණ බවද විනිවිදභාවයකින් යුතුව තෝරා ගන්නා බවද ශ්‍රී ලංකා විදේශ සේවා නියුක්ති කාර්යාංශයේ සභාපති කෝශල වික්‍රමසිංහ මහතා ප්‍රකාශ කරයි.
ඊශ්‍රායල් රාජ්‍යයේ ඉදිකිරීම් ක්ෂේත්‍රය යටතේ ක්‍රියාත්මක ප්‍රතිසංස්කරණ ආශ්‍රිත රැකියා (Renovation General Workers) සඳහා තෝරා ගත් ප්‍රථම කණ්ඩායම පෙරේදා රාත්‍රියේ (19) දිවයිනෙන් පිටත්ව ගිය බව ශ්‍රී ලංකා විදේශ සේවා නියුක්ති කාර්යාංශය සදහන් කරයි.
මෙම කණ්ඩායමට රැකියාලාභීන් 50 දෙනෙකු ඇතුළත් වන බවද පසුගිය වසරේ නොවැම්බර් මස පැවති ප්‍රායෝගික පරීක්ෂණවලින් තෝරාගත් මෙම පිරිස මේ වසරේ ජනවාරි මස දී ඊශ්‍රායලයට විදේශ ශ්‍රමිකයන් බඳවා ගන්නා ක්‍රමය වන ලොතරයි ඇදීම මගින් තෝරාගෙන තිබෙන අතර වසර 5ක කාලයක් සඳහා රැකියා කිරිමට මේ යටතේ අවස්ථා හිමිවන බවද එම කාර්යාංශය පවසයි.
මෙම පිරිසට ගුවන් ගමන් බලපත්‍ර ලබාදීම ශ්‍රී ලංකා විදේශ සේවා නියුක්ති කාර්යාංශයේ දී එහි සභාපති කෝශල වික්‍රමසිංහ මහතාගේ ප්‍රධානත්වයෙන් සිදුකෙරිණි.
එහිදී අදහස් දැක්වූ වික්‍රමසිංහ මහතා සඳහන් කළේ විගමනික ශ්‍රමිකයන් මෙරටට එවනු ලබන විදේශ විනිමය රටේ සංවර්ධනයට විශාල දායකත්වයක් ලබාදෙන බවත් එමඟින් ආර්ථික දේහය පෝෂණය කිරීමට සමත් වන බවත්ය. වඩාත් නිපුණතාවයක් සහිත ශ්‍රමිකයින් විදේශ රැකියා සඳහා යොමු කිරීම නව රජයේ අරමුණ බවත්, රැකියා අවස්ථා සියලුම ගම්මානවලට සමානව ලබාදීමට පියවර ගන්නා බවත් ඒ මහතා සඳහන් කළේය.
එහිදී කිසිඳු දේශපාලන මැදිහත්විමක් නොකොට තෝරා ගැනීමේ දී පූර්ණ විනිවිදභාවයකින් යුතුව ඔවුන් තෝරා ගැනීමට අවශ්‍ය විධි විධාන යොදා ඇති බව ද ඔහු කියා සිටියේය. එහිදී කිසිදු පුද්ගලයෙකුට අසාධාරණයක් නොවන අයුරින් මෙම කටයුතු ක්‍රියාත්මක කිරීමට නිලධාරීන්ට උපදෙස් ලබා දී තිබෙන බව ද කෝශල වික්‍රමසිංහ මහතා වැඩිදුරටත් කියා සිටියේය. මේ වසරේ දි විදේශ රැකියා සදහා ශ්‍රමිකයන් 344,000 විදේශගත කිරීමට බලාපොරොත්තුවන බවද ඔහු සඳහන් කළේය.
