දේශීය වෙළඳපොළ සඳහා ආනයනය කරන ලද දෙවැනි වාහන තොගය හම්බන්තොට ජාත්‍යන්තර වරායට (HIP) ළඟාවී තිබේ.
ග්ලෝවිස් සෙන්චරි නමැති නෞකාවෙන් රැගෙන ආ වාහන තොගයේ, ශ්‍රී ලංකා වෙළඳපොළ සඳහා BYD වාහන 462ක් ඇතුළත් වූ අතර වාහන 669ක් ප්‍රතිනැව්ගත කර ඇත. ග්ලෝවිස් සෙන්චරි නෞකාව සඳහා HIP විසින් හසුරුවන ලද මුළු වාහන ගණන 1,159කි.
‘’කලාපයේ මෝටර් රථ සැපයුම් දාමය තුළ, විශේෂයෙන්ම වේගයෙන් වර්ධනය වන විද්‍යුත් වාහන (EV) වෙළෙඳපොළ තුළ, හම්බන්තොට ජාත්‍යන්තර වරාය (HIP), ප්‍රධාන කේන්ද්‍රස්ථානයක් ලෙස ප්‍රසිද්ධ වෙමින් තිබෙනවා. එයට විශේෂ හේතුව, අපගේ මනා සංවිධනාත්මකභාවය මෙන්ම විද්‍යුත් වාහනවල අවශ්‍යතා සපුරාලීම සඳහා විශේෂඥ ලෙස සකස් කර ඇති නවීනතම සහ ආරක්ෂිත යටිතල පහසුකම්. විද්‍යුත් වාහන සඳහා උසස් තත්ත්වයේ පහසුකම් සැපයීමෙන් කලාපයේ මෝටර් රථ කර්මාන්තයේ වර්ධනය උදෙසා අපගේ කැපවීම සනාථ කරනවා,’ යි හම්බන්තොට ජාත්‍යන්තර වරාය සමූහයේ (HIPG) වාණිජ හා අලෙවි කටයුතු පිළිබඳ සාමාන්‍යාධිකාරී ලාන්ස් සූඕ මහතා ප්‍රකාශ කරයි.
සිංගප්පූරුවේ සිට පැමිණි, කොරියානු ධජය යටතේ යාත්‍රා කරන ග්ලෝවිස් සෙන්චරි නෞකාව, HIPහි සිය මෙහෙයුම් සාර්ථකව නිමවා, ඕමානයේ සොහාර් වරාය වෙත ගමන් ආරම්භ කළේය.
