59
නෙළුව-පැලවත්ත මාර්ගයේ ත්‍රිරෝද රථයක් සහ තේ දලු රැගෙන යන ලොරියක් මුහුණට මුහුණ ගැටී සිදු වූ රිය අනතුරකින් කාන්තාවන් දෙදෙනකු මියගොස් තවත් තිදෙනකු තුවාල ලබා ඇතැයි තිනියාවල පොලීසිය පවසයි. අනතුරෙන් මියගොස් ඇත්තේ නෙළුව, කළුබෝවිටියාව ප්‍රදේශයේ පදිංචිව සිටි 55 සහ 27 වියැති කාන්තාවන් දෙදෙනෙකි.
ලොරිය නෙළුව දෙස සිට පැලවත්ත දෙසට ගමන් කර ඇති අතර, පැලවත්ත දෙස සිට නෙළුව දෙසට ගමන් ගත් ත්‍රිරෝද රථය 7 කණුව ප්‍රදේශයේදී මුහුණට මුහුණ ගැටී ඇති බව පොලීසිය කීය.
තුවාලකරුවන් මීගහතැන්න රෝහලට රැගෙන ගොස් ඇති අතර, එහිදී දෙදෙනකු මියගොස් ඇති බව රෝහල් ආරංචි මාර්ග සඳහන් කරයි. ලොරිය සහ ත්‍රිරෝද රථය පොලිස් භාරයට ගෙන ඇති අතර, තිනියාවල පොලීසිය වැඩිදුර පරීක්ෂණ පවත්වති.
