හරක් කටාගේ මත්කුඩු ජාලයේ ප්‍රධානියා බව කියැවෙන රන්මල්ලි නමැති මත්කුඩු ජාවාරම්කරුගේ පාසල් මිතුරා රුපියල් කෝටි 66කට අධික වීථි වටිනාකමක් ඇති හෙරොයින් කිලෝ 33යි ග්‍රෑම් 210ක් සමඟ දික්වැල්ල, ඌරුගමුව, රදම්පල පිහිටි නි‍ෙවසකදී පොලිස් මත්ද්‍රව්‍ය කාර්යාංශයේ නිලධාරින් විසින් පෙරේදා (19) රාත්‍රී කාලයේදී අත්අඩංගුවට ගෙන තිබේ.
මත්කුඩු තොගය සමඟ අත්අඩංගුවට ගත් සැකකරු මාතර කාර්මික විද්‍යාලයේ රියැදුරෙක් ලෙස සේවයේ නිරතව සිට මසකට පමණ පෙර ඉන් ඉවත්ව ඇති අයෙක් බව පොලිස් මත්ද්‍රව්‍ය කාර්යාංශය විසින් කළ විමර්ශනයේ දී අනාවරණය වී ඇත.
දික්වැල්ලේ පිහිටි ප්‍රධාන පෙළේ පාසලක රන්මල්ලී සහ මෙම සැකකරු එක පන්තියේ අධ්‍යාපනය ලබා ඇති බව පොලිස් මත්ද්‍රව්‍ය කාර්යාංශය සඳහන් කරයි.
චරිත් සඳකැළුම් නොහොත් රන්මල්ලි නැමැති මත්කුඩු ජාවාරම්කරු මේ වන විට සිටින්නේ ඩුබායිහිය. හරක් කටාගේ මත්කුඩු ජාලයේ ප්‍රධානියා බව පැවසෙන ඔහු හරක් කටා මැඩගස්කරයේ දී අල්ලා මෙරටට රැගෙන ඒමෙන් පසු මත්කුඩු ජාවාරම තනිවම කරගෙන ගොස් ඇති බව සඳහන්ය.
මුහුදු මාර්ග ඔස්සේ බෝට්ටු මඟින් දකුණු මුහුදු තීරයට රැගෙන විත් ඇති මෙම මත්කුඩු තොගය දින කිහිපයකට පෙර මෙම නි‍ෙවසේ කාමරයක සඟවා ඇති බව විමර්ශනවලින් අනාවරණය වී තිබේ.
පැකට් 29ක් ලෙස මෙම මත්කුඩු තොගය නි‍ෙවසේ කාමරයේ සඟවා තිබුණු බව මත්ද්‍රව්‍ය කර්යාංශයේ උසස් පොලිස් නිලධාරියෙක් සඳහන් කළේය. ප්‍රශ්න කිරීම් හමුවේ සැකකරු පවසා ඇත්තේ රන්මල්ලි විසින් ඩුබායි සිට දුරකතන ඔස්සේ ලබාදුන් උපදෙස් මත මෙම මත්කුඩු තොගය තමා නි‍ෙවසේ සඟවා තබාගත් බවය.
ඔහු සිය රැකියාවෙන් පවා ඉවත්ව ඇත්තේ මත්ද්‍රව්‍ය ජාවාරම පූර්ණ කාලීනව සිදුකිරීමේ අපේක්ෂාවෙන් විය හැකි බවට පොලිස් මත්ද්‍රව්‍ය කාර්යාංශය සැක කරයි.
මෙම සැකකරු මඟින් මත්කුඩු තොග ගබඩාකර බෙදා හැරීම රන්මල්ලිගේ සැලසුම වී තිබී ඇති බව පොලිස් මත්ද්‍රව්‍ය කාර්යාංශය සඳහන් කරයි. පොලිස් මත්ද්‍රව්‍ය කාර්යාංශයේ මහනුවර ඒකකයේ නිලධාරීන් පසුගිය ජනවාරි 16 වැනිදා කුරුණෑගලින් සොයාගත් රුපියල් කෝටි 24ක මුදල ද රන්මල්ලිට අයත් බව විමර්ශනවලින් හෙළිවී තිබුණි. මත්කුඩු ජාවාරම්කරුවකුට අයත් මෙතෙක් සොයාගත් විශාලතම මුදල වන්නේ ද එයයි.
රන්මල්ලිට අයත් රුපියල් කෝටි 600කට අධික වටිනාකමක් ඇති හෙරොයින් කිලෝ 300ක ප්‍රමාණයක්ද පසුගිය 2022 වසරේ නොවැම්බර් 7 වැනිදා නාවික හමුදාව විසින් බහුදින යාත්‍රාවකින් ප්‍රවාහනය කරමින් තිබිය දී අල්ලාගෙන තිබුණි.
ඒ කාන්තාවක් ඇතුළු සැකකරුවන් 10 දෙනෙක් සමඟිනි. පොලිස් මත්ද්‍රව්‍ය කාර්යාංශයට ලද තොරතුරකට අනුව නාවික හමුදාව විසින් කළ මෙහෙයුමකින් එම මත්කුඩු තොගය අල්ලාගෙන තිබුණි.
2021 වසරේ ජූලි මාසයේදී පොලීසිය කළ වැටලීමකදී ද රන්මල්ලිට අයත් මත්කුඩු සඟවන කොට්ටාවේ පිහිටි නි‍ෙවසක් හඳුනා ගත් පොලිස් මත්ද්‍රව්‍ය කාර්යාංශයේ නිලධාරින් එහි වළදමා තිබී මත්කුඩු ජාවාරමෙන් උපයා ගත් රුපියල් එක්කෝටි තිස් නව ලක්ෂයක පමණ මුදලක් සොයා ගත්තේය.
