කූට ලේඛනයක් සකසා මහනුවර ප්‍රධාන පෙළේ බාලක පාසලක පළමු වසරට ආදි ශිෂ්‍ය පදනමින් සිසුවකු ඇතුළත් කළ බව කියන සිද්ධියක් සම්බන්ධයෙන් පරීක්ෂණ පැවැත් වූ පොලීසිය අදාළ කූට ලේඛනය ආදි ශිෂ්‍ය සංගමයට අයත් පරිගණකය උපයෝගි කර ගනිමින් සකස් කරගෙන තිබෙන බව අනාවරණය කරගෙන තිබේ. අදාළ පරිගණකය පොලිස් භාරයට ගෙන රස පරීක්ෂක වෙත යොමු කිරීමෙන් පසු ලබාදුන් වාර්තාව අනුව මේ බව තහවුරුව තිබෙන බව මහනුවර පොලීසියේ විශේෂ අපරාධ විමර්ශන ඒකකය පවසයි.
විදුහලේ පළමු වසරට 2022 වසරේ දී සිසුවකු ඇතුළත් කිරීමට මේ කූට ලේඛනය ඉදිරිපත් කර තිබිණි. අදාළ පාසලේ අධ්‍යාපනය ලද වෘත්තියෙන් වෛද්‍යවරයකු වූ පුද්ගලයකු හදිසියේ මියගොස් තිබෙන අතර දරුවා ඇතුළත් කිරීමට ඔහුගේ නම භාවිත කරමින් කූට ලේඛනය ඉදිරිපත් කර තිබුණේ වෙනත් පාසලක අධ්‍යාපනය ලැබ තිබෙන ඔහුගේ සහෝදරයාය.
වෛද්‍යවරයාගේ දරුවා 2023 වසරේ දී ආදි සිසු පදනමින් අදාළ පාසලට ඇතුළත් කිරීමට සිටි බැවින් ඔහුගේ බිරිය මේ සිදුවීම සම්බන්ධයෙන් පැමිණිලි කර තිබිණි.
ඒ ඔස්සේ පරීක්ෂණ කළ පොලීසිය ආදි ශිෂ්‍ය සංගමයේ සාමාජිකයන් කිහිප දෙනෙකුගෙන්ම ප්‍රකාශ සටහන් කරගනු ලැබීය. විදුහල්පතිවරයා ද මේ සම්බන්ධයෙන් පොලීසියට පැමිණිල්ලක් කිරීමෙන් පසු පළමු වසරට ඇතුළත් කර සිටි දරුවා පාසලෙන් ඉවත් කර ගැනීමට වෛද්‍යවරයාගේ සහෝදරයා කටයුතු කර තිබිණි. සිද්ධිය සම්බන්ධයෙන් පසුව පොලීසිය විසින් ඔහු අත්අඩංගුවට ගෙන අධිකරණයට ඉදිරිපත් කළ අතර, ඔහු මේ වන විට සිටින්නේ ඇප මත නිදහස්වය.
සිද්ධිය සම්බන්ධයෙන් විමර්ශන ක්‍රියාත්මක වෙද්දී ආදි ශිෂ්‍ය සංගමයේ ප්‍රබල සාමාජිකයකු පොලීසියේ ඉහළ නිලධාරියකු සමඟ සමීප සම්බන්ධතා පවත්වමින් ඒ සම්බන්ධ පරීක්ෂණ කටයුතු යටපත් කරන්න කටයුතු කළ බවට ද චෝදනා එල්ල විය.
පාසලට ළමයින් ඇතුළත් කර ගැනීමට සිටි සම්මුඛ පරීක්ෂණ මණ්ඩලයට ආදි ශිෂ්‍ය සංගමයේ සාමාජිකයකු ද අයත්ය. ආදි සිසුවකු නොවන පුද්ගලයකු ආදි සිසුවකු ලෙස පෙනී සිටිමින් දරුවා ඇතුළත් කිරීමට උත්සාහ කිරීම එම සාමාජිකයා නොදැන සිටියේ ඇයිද යන්න පොලීසිය ප්‍රශ්න කර තිබේ. සිද්ධිය සම්බන්ධයෙන් මහනුවර පොලීසියේ විශේෂ අපරාධ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක හේරත් මහතා ඇතුළු කණ්ඩායමක් පරීක්ෂණ පවත්වයි.
