ඉන්දීය ප්‍රිමියර් ලීග් තරගාවලිය තවත් දින දෙකකින් ආරම්භ වීමට නියමිත අතර, මහේල ජයවර්ධනගේ පුහුණුකාරිත්වයෙන් යුත් මුම්බායි ඉන්දියන්ස් පිලට නිත්‍ය නායක හර්දික් පාණ්ඩ්‍යා නොමැතිව පළමු තරගයට එක්වීමට සිදුව තිබේ. මුම්බායි පිල 23 වැනිදා චෙන්නායි සුපර් කිංග්ස් පිලට එරෙහිව චෙන්නායිහිදී මෙවර තරගාවලියේ සිය පළමු තරගයට එක්වන අතර, එහිදී සූර්යකුමාර් යාදව්ට කණ්ඩායම මෙහෙයවීමේ වගකීම පැවරී තිබේ.
පසුගිය වසරේ (2024) පැවති අයිපීඑල් තරගාවලියේ මුම්බායි පිල ක්‍රීඩා කළ අවසන් තරගයෙන් පසු පැනවූ තහනමක් හේතුවෙන් පාණ්ඩ්‍යාට මේ තරගය අහිමි වනු ඇත.
එම වසරේ ලක්නව් සුපර් ජයන්ට් පිල සමඟ පැවති තරගයේදී නියමිත කාලය තුළ ඕවර 20 සම්පූර්ණ කිරීමට නොහැකි වූ අතර, එවර තරගාවලියේදී මුම්බායි පිල එම වරද සිදු කර තිබුණේ තෙවැනි වරටය. මේ හේතුවෙන් නායක පාණ්ඩ්‍යාට ඉන්දීය රුපියල් ලක්ෂ 30 (ශ්‍රී ලංකා රුපියල් ලක්ෂ 102) දඩ මුදලක් නියම කළ අතර, එක් තරග තහනමක් ද පැනවීය.
