කුරුණෑගල සාන්ත ආනා සහ මලියදේව විදුහල් අතර 41 වැනි ‘ඇතුගල් පුර මහා සටන’ වාර්ෂික ක්‍රිකට් තරගය මේ මස 28 සහ 29 දෙදින කුරුණෑගල වෙළගෙදර ක්‍රිකට් ක්‍රීඩාංගණයේදී පැවැත්වේ. එම තරගයට සමගාමීව දෙපිල අතර එක්දින තරගය මේ 31 වැනිදා එම ක්‍රීඩාංගණයේදීම පැවැත්වීමට නියමිතය. මෙවර තරගයේදී සාන්ත ආනා කණ්ඩායමේ නායකත්වය බුද්ධිම නන්දසිරි දරන අතර, මලියදේව කණ්ඩායමේ නායකත්වය චන්දූප අබේසිංහට හිමිව තිබේ.
තරගාවලිය පිළිබඳ මාධ්‍ය හමුවක් පසුගියදා දෙවිදුහල්හි විදුහල්පතිවරුන්ගේ ප්‍රධානත්වයෙන් පැවති අතර, එහිදී අනුග්‍රාහකත්වය පිරිනැමීම, තරග ද්විත්වය සඳහා විශේෂයෙන් පිළියෙල කරන ලද ඇඳුම් එළිදැක්වීම හා ඒවා දෙපිලේම ක්‍රීඩකයන් වෙත බෙදාදීමද සිදුවිය.
මෙවර දෙදින තරගය සඳහා ඩයලොග් ආසියාටා සමාගම පූර්ණ දායකත්වය ලබාදෙන අතර, එක්දින තරගාවලියට දම්රෝ අනුග්‍රාහකත්වය දක්වයි.
මේ මාධ්‍ය හමුවට සාන්ත ආනා විදුහල්පති චන්දන හපුආරච්චි පියතුමා, මලියදේව විදුහල්පති ඩබ්ලිව්.එම්.සී.කේ. මහමිතව, ඩයලොග් ආයතනය වෙනුවෙන් ප්‍රාදේශීය කළමනාකරු බුද්ධික පෙරේරා, දම්රෝ ආයතනය වෙනුවෙන් සාමාන්‍යාධිකාරී (තොග වෙළඳාම්) චතුර තෙන්නකෝන්, සාන්ත ආනා ආදි ශිෂ්‍ය සංගමයේ සභාපති අසංක ජයසිංහ සහ මලියදේව ආදි ශිෂ්‍ය සංගමයේ සභාපති සමන් ජයසිංහ මහත්වරු මේ මාධ්‍ය හමුවට එක්වූහ.
