ලොව පුරා කාන්තාවන්ගේ සහභාගිත්වයෙන් පැවැත්වෙන ක්‍රීඩාවල 2025දී ගෝලීය ආදායම අවම වශයෙන් ඩොලර් බිලියන 2.3ක් ඉක්මවනු ඇතැයි විගණනය, මූල්‍ය උපදේශනය සහ බදු සේවා වෙනුවෙන්ම ක්‍රියාත්මක ඩෙලොයිට් සමාගම පුරෝකථනය කරයි.
මේ ආදායම 2024දී ඩොලර් බිලියන 1.88ක් වූ අතර, එම ගෝලීය ආදායමෙන් 56%ක් උතුරු අමෙරිකාවෙන් ලැබුණු බැවින් උතුරු අමෙරිකාව කාන්තා ක්‍රීඩාවල ගෝලීය වර්ධනයේ පෙරමුණ ගෙන සිටින බවට හඳුනාගෙන ඇත. එය යුරෝපය, ආසියා පැසිෆික් සහ අනෙකුත් වෙළෙඳපොළවල් වෙතද වේගයෙන් ප්‍රසාරණය වෙමින් පවතී.
බිලියන ගණනක ඩොලර් වටිනාකමක් ඇති ලොව පුරා වේගයෙන් වර්ධනය වන කාන්තා ක්‍රීඩාවලින් ගෝලීය ආදායම 2023දී ඩොලර් මිලියන 981 සිට 2024 දී ඩොලර් බිලියන 1.88 දක්වා දෙගුණයකට ආසන්නව වැඩි වූ හෙයින් 2025දී ඩොලර් බිලියන 2.35ක් පුරෝකථනය කිරීම සාධාරණ වේ. අනුග්‍රාහකත්ව, හවුල්කාරිත්ව, වෙළෙඳ භාණ්ඩ අලෙවිය සහ පූර්ව-කාලීන සංචාර ආදායම් මේ ආදායම්වලට ඇතුළත් වේ.
පාපන්දු සහ පැසිපන්දුවලින් ඔබ්බට, නව ක්‍රීඩා ආකර්ෂණය වෙමින් පවතින අතර ක්‍රිකට්, රග්බි සහ වොලිබෝල් යන ක්‍රීඩාවලින්ද ආයෝජන ආකර්ෂණය කර ගනිමින් සිටිති. 2025දී ලොව පුරා කාන්තා ක්‍රීඩාවල ඉහළම ආදායම් පැසිපන්දු සහ පාපන්දු තරගවලින් ලැබෙනු ඇතැයි අපේක්ෂා කරන අතර, පැසිපන්දු ක්‍රීඩාවෙන් අමෙරිකානු ඩොලර් බිලියන 1.03 (44%)ක ආදායමක් අපේක්ෂා කරන අතර, කාන්තා පාපන්දුවෙන් අමෙරිකානු ඩොලර් මිලියන 820 (35%)ක ආදායමක් උපයනු ඇතැයි පුරෝකථනය කර ඇත.
එක්සත් රාජධානියේ පැවැත්වෙන 2025 රග්බි කාන්තා ලෝක කුසලාන තරගාවලියේ දැනටමත් ටිකට්පත් අලෙවියෙන් වාර්තා පිහිටුවා ඇති අතර, 2027 ෆිෆා කාන්තා ලෝක කුසලානය පළමු වරට බ්‍රසීලයේ පැවැත්වෙන හෙයින් එය අනාගත පාපන්දු වෙළෙඳපොළකට නව වාණිජ අවස්ථා හඳුන්වා දෙනු ඇතැයි පැවසේ.
