මේ වසරේ ජපානයේ ටෝකියෝ නුවර පැවැත්වෙන ලෝක මලල ක්‍රීඩා ශූරතාවලියට සුදුසුකම් ලබා ගැනීමේ බලාපොරොත්තු ඇතිව ලෝක ගෘහස්ථ මලල ක්‍රීඩා ශූරතාවලියට සහභාගිවන ශ්‍රී ලංකා මලල ක්‍රීඩා කණ්ඩායම චීනයේ නැංජින් බලා ඊයේ පිටත්ව ගියේය.
දොළොස් දෙනකුගෙන් යුත් ශ්‍රී ලංකා පිලට මීටර් 60 ධාවන ඉසව්ව සඳහා චමෝද් යෝධසිංහ, මීටර් 60 කඩුලු මතින් දිවීමේ ධාවන ඉසව්වට කවීෂ බණ්ඩාර හා මීටර් 400 ධාවන ඉසව්වට කාලිංග කුමාරගේ, මීටර් 400 සහාය දිවීමේ කණ්ඩායමේ ඉසුරු ලක්ෂාන්, දිනුජ රන්දිම මධුෂාන්, සදෙව් විමංස, ඔමෙල් ශෂින්ත, මීටර් 400 සහාය දිවීමේ කාන්තා පිලේ නදීෂා රාමනායක, සයුමි ලක්ෂිමා, හර්ෂණී ප්‍රනාන්දු, ජයේෂි උත්තරා හා ෂෙනරි වි‍ජේතුංග යන ක්‍රීඩක ක්‍රීඩිකාවෝ ඊයේ පිටත්ව ගියහ. මේ කණ්ඩායමේ පුහුණුකරු ලෙස සංජීව වීරක්කොඩි මහතා එක් විය. ශ්‍රී ලංකා මලල ක්‍රීඩා සංගමයේ ලේකම් සමන් කුමාර ගුණවර්ධන මහතා පැවසුවේ මේ තරගාවලිය ශ්‍රී ලංකාවට ඉතා වැදගත් එකක් බවය. මේ ශූරතාවලියෙන් ලෝක මලල ක්‍රීඩා ශ්‍රේණිගත කිරීමේ ලකුණු විශාල ප්‍රමාණයක් ශ්‍රී ලංකා ක්‍රීඩක ක්‍රීඩිකාවන්ට ලැබෙන බවත්, එය ලෝක මලල ක්‍රිඩා ශූරතාවලියට වැදගත්වනු ඇති බවත් ඒ මහතා පැවසීය.
2001 වසරේ පෘතුගාලයේ පැවති ලෝක ගෘහස්ථ මලල ක්‍රීඩා ශූරතාවලියට පසු මෙරටින් සහභාගී වන වැඩිම ක්‍රීඩක පිරිස මෙයවීම විශේෂත්වයකි.
මීටර් 400 සහාය දිවීමේ පිරිමි කණ්ඩායම මේ ශූරතාවලියේදී කෙළින්ම අවසන් මහා තරගයට පිවිසෙන අතර, චීනය, ජැමෙයිකාව, අමෙරිකාව, නයිජීරියාව හා හංගේරියාව සමඟ තරග වදියි. මීටර් 400 සහාය දිවීමේ කාන්තා කණ්ඩායමට චීනය, ඉන්දියාව, අමෙරිකාව, පෝලන්තය හා ඔස්ට්‍රේලියාව සමඟ අවසන් තරගයේදී හමුවේ. මේ ශූරතාවලිය හෙට (21) සිට 23 වැනිදා දක්වා නැංජින් ජාත්‍යන්තර ක්‍රීඩාංගණයේදී පැවැත්වේ.
