නව නිවාස සංකීර්ණය
ගල්ඔය හන්දිය මඩකලපු දුම්රිය මාර්ගයේ ප්‍රධාන දුම්රිය ස්ථානයක් වන හිඟුරක්ගොඩ දුම්රිය ස්ථානයේ ස්ථානාධිපතිවරුන් සඳහා යහපාලන රජය කාලයේ නව නිවාස සංකීර්ණයක් ඉදිකර වසර හයකට ආසන්න කාලයක් ගතවී ඇතත්, එම දුම්රිය ස්ථානාධිපතිවරුන්ට තවමත් අබලන් තත්ත්වයේ පවතින නිල නිවාසවලම රැඳී සිටීමට සිදුවී ඇතැයි වාර්තා වේ. එම දුම්රිය ස්ථානයට නැඟෙනහිරට වන්නට මහල් ගොඩනැඟිල්ලක් ලෙස ඉදිකර ඇති මෙහි පහත මහල නිවාස දෙකකින් සහ ඉහළ මහල නිවාස දෙකකින් යුක්තය. එහි ඉහළ මහලට නඟින පඩිපෙළ ප්‍රවේශයේ සිවිලිම ද කඩාවැටී ඇත. විදුලි වයරින් කටයුතු ද නිම කර ඇති බවක් දක්නට නැත.
රජරට නවෝදයේ ජනාධිපති වැඩසටහන යටතේ ශ්‍රී ලංකා ගුවන් හමුදාව මඟින් ඉදිකරන ලද මෙම නිවාස සංකීර්ණය සඳහා රුපියල් ලක්ෂ දෙසිය හැත්තෑවක් වැය කර ඇත. එම නිවාස සංකීර්ණය වටා අනාරක්ෂිත ස්වභාවයක් දක්නට ඇති අතර ප්‍රවේශ මාර්ගයක්ද ඉදිකර නැත. මේ පිළිබඳව දුම්රිය දෙපාර්තමේන්තුවේ මාර්ග හා කර්මාන්ත ප්‍රධාන ඉංජිනේරු ඊ.එම්.එස්.පී.කේ. දීගල මහතාගෙන් කළ විමසීමේදී ඒ මහතා පැවසූයේ, හිඟුරක්ගොඩ දුම්රිය නිවාස සංකීර්ණය තවමත් භාරදී නොමැති බවත්, ඒ පිළිබඳ සොයා බලන බවත්ය.
