ඇල්පිටිය, කහදූව ශ්‍රී පරම විශුද්ධාරාම මූල මහ විහාරයේ ඉපැරණි අබලන්ව තිබූ සංඝාවාස ගොඩනැඟිල්ලේ සිවිලිම පෙරේදා (18) රාත්‍රියේ බිමට කඩාවැටී ඇති අතර, ඒ තුළ පොත් පාඩම් කරමින් සිටි කුඩා සාමණේර භික්ෂූන් වහන්සේලාට කිසිදු අනතුරක් සිදු නොවීම ආශ්චර්යයක් බව, විහාරාධිපති දකුණු හා බස්නාහිර පළාත් ප්‍රධාන අධිකරණ සංඝනායක ශ්‍රී ශාඛ්‍යසිංහ සරසවියේ උපකුලපති කහදූවේ කෝලිත නාහිමියෝ පැවසූහ.
වසර 200කට වඩා පැරණි මෙය කඩාවැටීමට පෙර පිළිසකර කර දෙන ලෙස බලධාරීන්ගෙන් ඉල්ලීමක් කළ ද, එය බීරි අලින්ට වීණා වැයීමක් වැනි වූ බව නාහිමියෝ පවසති. මෙම තත්ත්වය හමුවේ ඉතිරි බිත්ති ද පෙරළෙන්නට පෙර මෙම විහාරස්ථානය පිළිසකර කිරීම සඳහා ඉක්මනින්ම පියවර ගත යුතු බව විහාරාධිපති නාහිමියෝ අදාළ බළධාරීන්ට ලිඛිතව දන්වා ඇත.
මෙම විහාරස්ථානය පිළිබඳව පින්වත් දානපතියකුගේ හෝ අවධානය යොමු වන්නේ නම්, තොරතුරු සඳහා විහාරාධිපති නාහිමි දුරකථන අංක 077 – 1550450 හෝ 071 – 8837447 මඟින් විස්තර ලබා ගත හැකි බව කෝලිත හිමියෝ පැවසූහ.
