ක්ලීන් ශ්‍රී ලංකා වැඩසටහන යටතේ කළුතර දිස්ත්‍රික්කයේ ඇළවේලි ශුද්ධ පවිත්‍ර කිරීමේ වැඩසටහන සෞඛ්‍ය හා ජනමාධ්‍ය අමාත්‍ය, කළුතර දිස්ත්‍රික් සම්බන්ධීකරණ කමිටු සභාපති වෛද්‍ය නලින්ද ජයතිස්ස මහතාගේ ප්‍රධානත්වයෙන් සහ කළුතර කළුතර මහ දිසාපති ජනක කේ. ගුණවර්ධන මහතාගේ සභාපතීත්වයෙන් අනිද්දා (22) පෙ.ව. 9.00ට ආරම්භ කිරීමට නියමිතය.
කළුතර දිස්ත්‍රික්කයට අයත් ප්‍රාදේශීය ලේකම් කොට්ඨාස 14ටම අයත් ඇළවේලි 430ක්, ප්‍රාදේශීය ගොවි සංවිධාන 356කට අයත් ගොවි සංවිධාන සාමාජිකයන්, රාජ්‍ය නිලධාරීන්, ආරක්ෂක අංශ නිලධාරීන් සහ කළුතර දිස්ත්‍රික්කයට අයත් විවිධ ස්වේච්ඡා සංවිධාන සාමාජිකයන් මෙම ජාතික වැඩසටහන සඳහා සම්බන්ධ වන බව වැඩසටහනේ ප්‍රධාන සැලසුම්කරු හා උපදේශකවරයා පැවසීය.
මෙම ජාතික වැඩසටහන පිළිබඳව රාජ්‍ය නිලධාරීන් සහ මාධ්‍ය දැනුම්වත් කිරීමේ වැඩසටහනක් පසුගිය 14 වැනිදා කළුතර කළුතර මහ දිසාපතිවරයාගේ ප්‍රධානත්වයෙන් පැවැති අතර, ඊට කළුතර දිස්ත්‍රික් පාර්ලිමේන්තු මන්ත්‍රීවරුන් වන චන්දිම හෙට්ටිආරච්චි සහ නන්දන පත්මකුමාර යන මහත්වරු ද සහභාගී වූහ. එහිදී රාජ්‍ය නිලධාරීන් සහ ප්‍රාදේශීය ගොවි සංවිධාන නියෝජිතවරුන් සමඟ සාකච්ඡා කොට එම වැඩසටහනට දිස්ත්‍රික්කයේ සෑම ජන කොට්ඨාසයකින්ම සහ සෑම රාජ්‍ය නිලධාරියකුගේම සක්‍රිය දායකත්වය ලබාදිය යුතු බවද මහ දිසාපතිවරයා අවධාරණය කර සිටියේය.
වැඩසටහන මාර්තු 29 වැනි සෙනසුරාදා අවසන් කිරීමට නියමිතය.
