අ.පො.ස. සා/පෙළ විභාග පිළිතුරු පත්‍ර රැගෙන හැටන් ශ්‍රීපාද විද්‍යාලයේ පිහිටුවා ඇති විභාග සම්බන්ධීකරණ මධ්‍යස්ථානය වෙත ධාවනය වූ වෑන් රථය ත්‍රිරෝද රථයකින් හරස්කර එම වෑන් රථයේ ගමන් ගත් විභාග මධ්‍යස්ථානයේ ශාලාධිපතිවරයාට සහ උප ශාලාධිපතිවරයාට පෙරේදා (18) පස්වරුවේ ත්‍රිරෝද රථ රියැදුරු බැණ වැදුනේ යැයි කියන සිද්ධියක් සම්බන්ධයෙන් නොර්වුඩ් පොලීසිය විමර්ශනයක් ආරම්භකර ඇත.
නෝර්වුඩ් පොලිස් වසමට අයත් පුලියාවත්ත විභාග මධ්‍යස්ථානයේ පෙරේදා (18) පැවති අ.පො.ස. සා/පෙළ විභාගයේ අවසන් වීමෙන් පසු එහි පිළිතුරු පත්‍ර ශ්‍රීපාද විද්‍යාලයේ පිහිටුවා ඇති විභාග සම්බන්ධීකරණ මධ්‍යස්ථානය වෙත භාර දීම සඳහා ශාලාධිපතිවරයාගේ පෞද්ගලික වෑන් රථයකින් ගමන් කරමින් සිටියදී පුලියාවත්ත පාසලට පිවිසෙන ප්‍රධාන ගේට්ටුව ත්‍රිරෝද රථ රියැදුරා විසින් අවහිර කරමින් සිටීම සම්බන්ධයෙන් ශාලාධිපතිවරයා ත්‍රිරෝද රථ රියැදුරාට ත්‍රිරෝද රථය ගේට්ටුවෙන් ඉවත්කර ගන්නා ලෙසට ඉල්ලීමක් කර ඇත. ත්‍රිරෝද රථය ඉවත් නොකරගත් නිසා විභාග ශාලාධිපතිවරයා විසින් තම වෑන් රථය දැඩි පරිශ්‍රමයක් දරා මාර්ගය හරස්කර තිබූ ත්‍රිරෝද රථයේ නොගැටී වෑන් රථය ඉදිරියට ධාවනය කර ඇත.
පසුව ත්‍රිරෝද රථ රියැදුරු වෑන් රථය මීටර් 500ක් පමණ දුරට පසුපස හඹාගෙන විත් වෑන් රථය හරස්කර ත්‍රිරෝද රථය නතර කර වෑන් රථයේ සිටි ශාලාධිපතිවරයාට සහ උප ශාලාධිපතිවරයාට බැණ වැදුන බවට එම විභාග ශාලාධිපතිවරයා විසින් නොර්වුඩ් පොලීසියට පැමිණිල්ලක් කර ඇත.
අප මේ සම්බන්ධයෙන් නොර්වුඩ් පොලීසියේ ස්ථානාධිපතිවරයාගෙන් කළ විමසුමකට පවසා සිටියේ අදාළ ත්‍රිරෝද රථ රියැදුරා හඳුනාගත් බවත්, ඔහු පුලියාවත්ත දමිළ පාසල අසල ත්‍රිරෝද රථ ධාවනය කරමින් සිටින අයෙකු බවයි.
පාසලේ ගේට්ටුව අවහිර කිරීම සම්බන්ධයෙන් විභාග ශාලාධිපතිවරයා සහ ත්‍රිරෝද රථ රියැදුරා අතර වචන හුවමාරුවක් සිදු වී ඇති බවත්, එයට උරණ වූ ත්‍රිරෝද රථ රියැදුරා වෑන් රථය ලුහුබැඳ විත් වෑන් රථය හරස් කර ඇති බවයි.
