කුරුණෑගල – මඩගල්ල ප්‍රධාන මාර්ගයේ පිහිටි ජනාකීර්ණ උප නගරයක්වන පොල්පිතිගම නගරයට ප්‍රධාන බස් නැවතුම්පොළක් නොමැතිවීම නිසා පාසල් දරුවන් මෙන්ම මගී ජනතාවද මහත් අපහසුතා රැසකට මුහුණ දී සිටිති.
කුරුණෑගල සිට මඩගල්ල දක්වා ශ්‍රී ලංකා ගමනා ගමන මණ්ඩලයට අයත් බස්රථ මෙන්ම පෞද්ගලික බස් රථද විශාල සංඛ්‍යාවක් පොල්පිතිගම නගරය හරහා ගමන් කරයි. මැල්සිරිපුර සිට ඉරුදෙණියාය හරහා පොල්පිතිගම දක්වා ගමන් කරන බස්රථ පොල්පිතිගම නගරයේදී ආපසු හරවයි. එසේම මහව සිට ගල්ටැංවැව හරහා දිවෙන ඇතැම් බස්රථද පොල්පිතිගම නගරයෙන් ආපසු හරවා යයි. එහෙත් මෙම බස්රථ තම ගමන් වාරය එන තෙක් නවතා තැබීමට ස්ථිර ස්ථානයක් නොමැතිවීම නිසා නගරයේ මාර්ගය දෙපස අක්‍රමවත් ලෙස නවතා තැබීමට සිදුව තිබේ. මෙය වෙළෙඳ සල් හිමියන්ට මෙන්ම පදිකයේ ගමන් කරන ජනතාවටද විශාල හිරිහැරයක් වී ඇත.
පොල්පිතිගම ප්‍රාදේශීය සභාව, ප්‍රාදේශීය ලේකම් කාර්යාලය, ප්‍රධාන තැපැල් කාර්යාලය, පොල්පිතිගම පොලීසිය, ජාතික පාසල, දිස්ත්‍රික් රෝහල, මහජන පුස්තකාලය, කොට්ඨාස අධ්‍යාපන කාර්යාලය, ලංකා බැංකුව, මහජන බැංකුව, ප්‍රාදේශීය සංවර්ධන බැංකුව ආදී රාජ්‍ය ආයතන සහ වෙළෙඳසල් අතිවිශාල සංඛ්‍යාවක් පොල්පිතිගම නගරයේ පිහිටා තිබේ. මෙම රාජ්‍ය ආයතනවලට සිය එදිනෙදා කටයුතු සඳහා පැමිණෙන ප්‍රදේශයේ හා පිටස්තර ප්‍රදේශවල ජනතාවටත් රැකියා සඳහා යන එන්නන්ටත් පාසල් දරුවන්ටත් පොදු බස්රථ නැවතුම්පොළක් නොමැතිවීම නිසා මහත් අපහසුතාවලට මුහුණදීමට සිදුව තිබේ.
අඩු තරමින් කුඩා මගී ආවරණයක්වත් ඉතා කඩිනමින්ම ඉදිකර දෙන්නැයි ප්‍රදේශයේ ජනතාව වගකිවයුත්තන්ගෙන් ඉල්ලා සිටිති.
මේ අතර රුපියල් ලක්ෂ 210ක් පමණ මුදලක් වැයකර නාගරික සංවර්ධන අධිකාරිය මඟින් ඉදි කර පොල්පිතිගම ප්‍රාදේශීය සභාවට පවරා දෙන ලද පොල්පිතිගම නව බස් නැවතුම්පොළ දහවල් කාලයේ මගී ප්‍රයෝජනයට නොගන්නා ස්ථානයක් බවට පමණක් සීමා වී තිබීම නිසා මෙම ස්ථානයේ කිසිදු බස් රථයක් නවත්වන්නේ නැතිව ගොස් මඩගල්ල මංසන්ධියේ නවත්වන බවත් ජනතාව පවසති. මෙම ස්ථානයෙන් කිසිම මගීයෙක් බසයකට ගොඩවීමට නොපැමිණෙන අතර, බසයෙන් බැසීමක් හෝ නොකරන බවද බස්රථ බස්නැවතුම් පොළට දිවා කාලයේදී ඇතුළු නොකරන බවද ඔවුහු පවසා සිටිති.
බස් නැවතුම්පොළ ගොඩනැඟිල්ලේ ‘පොල්පිතිගම’ යනුවෙන් නාම පුවරුවක් දමා තිබුණද එය පොල්පිතිගම නගරයේ සිට කිලෝ මීටර් 03ක් පමණ දුරින් වූ මඩගල්ල උප නගරයට කිලෝ මීටරයක් පමණ දුරින් බස් නැවතුම්පොළ ඉදිකිරීම විශාල මුදල් නාස්තියක්බව ජනතාව පවසා සිටිති.
මේ පිළිබඳව පොල්පිතිගම ඒ.ඒ. අබේසිංහ මහතා මෙසේ අදහස් දක්වා සිටියේය.
“බස් නැවතුම්පොළක් ඉදිකළ එකනම් හොඳයි. නමුත් ඒක ඉදිකරලා තියෙන්නේ මගී ජනතාවටවත් බස් රථවලටවත් අවශ්‍යම ස්ථානයක නොවෙයි. පොල්පිතිගම නගරයටත් මඩගල්ල උප නගරයටත් මැද්දේ තමයි බස් නැවතුම හදලා තියෙන්නේ. ජනතාව රැඳෙන්නේ පොල්පිතිගම නගරයේයි. මඩගල්ල නගරයේත් එසේමයි.
අදත් පාසල් සිසුන් වෙළෙඳසල් තුළ එහෙම නැත්නම් ඒ අසල පදික වේදිකාවේ මඩගල්ල නගරය බලබලා මගී ජනතාව ඊට කිලෝමීටරයක් මෙහායින් බස්වලින් බහින්නේ නෑ. අනෙක බස් එනතුරු හෝ බස් රථයකට නගින්න මඩගල්ල නගරයේ සිට කිලෝ මීටරයක් පයින් ඇවිත් බස් නැවතුමට මගීන් එන්නේත් නැහැ. ආවොත් පිස්සෙක් විතරයි.
මඩගල්ල නගරයට අනිවාර්යෙන්ම බස් රථ පැමිණෙන නිසා බස් මගීන් එහි රැඳෙනවා. මේ ගොඩනැඟිල්ල හදන්න තිබුණේ පොල්පිතිගම නගරය මැදයි.”
