මහපොළ භාරකාර අරමුදලේ සිදුව තිබෙන වංචා විමර්ශනය කර යුක්තිය ඉටු කරනවා
ඇමැති වසන්ත සමරසිංහ
හොර ගුහාවක් බවට පත්ව තිබූ වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍යාංශය පියවරෙන් පියවර නිදහස් කර හොරුන්ට දඬුවම් දීමෙන් පමණක් නොනැවතී නැවත හොරකම් කරන්න බැරි ක්‍රමයක් යටතේ ජනතාවට සේවාව සපයන අමාත්‍යාංශයක් බවට පත් කරන බව වෙළඳ, වාණිජ, ආහාර සුරක්ෂිතතා සහ සමුපකාර සංවර්ධන ඇමැති වසන්ත සමරසිංහ මහතා පාර්ලිමේන්තුවේදී ඊයේ (19) පැවසීය.
මහපොළ භාරකාර අරමුදල සම්බන්ධයෙන් සිදු කර තිබෙන වංචා දූෂණ විමර්ශනය කර සිදුව තිබෙන අසාධාරණයන්ට සාධාරණය ඉටු කිරීමට පියවර ගන්නා බව ද ඇමැතිවරයා පැවසුවේය.
අය වැය තෙවැනි වර කියවීමේ විවාදයට එක්වෙමින් ඇමැතිවරයා මේ බව කියා සිටියේය.
ඇමැතිවරයා මෙසේද පැවසුවේය.
මුජිබර් රහුමාන් මන්ත්‍රීවරයා කරුණු ගණනාවක් ඉදිරිපත් කළා. අමාත්‍යාංශය යටතේ තිබෙන ආයතන 15ක් තිබෙනවා. ඒත් එක්කම තවත් ආයතන 2ක් තිබෙනවා. සතොස යටතේ ආයතන දෙකත් එක්ක ආයතන 17ක් තිබෙනවා. අමාත්‍යාංශය ගැන රටේ හැදිලා තිබෙන චිත්‍රය වෙනස් කරන්න අපි විශාල වෙහෙසක් දරනවා. අපි සතොස භාර ගන්නා විට රුපියල් බිලියන 22ක් පාඩුයි. මේ ආයතනයෙන් රුපියල් කෝටි 2200 ක් පාඩු වෙනකොට ආයතනයේ වෙළඳසැල් 448 ක් තිබුණා. ඉන් 252 ක් පාඩු ලබනවා. මේ වසරේදී සතොස කඩ 150ක් විවෘත කරනවා. ඒවා විවෘත කරන්නේ දැන්වීම් පළ කරලා, සතොස නිලධාරීන් 22ක් බඳවා ගැනීමට දැන්වීම් පළ කර තිබෙනවා. භාණ්ඩ බෙදා හැරීම සඳහා සතොස ආයතනය පවත්වාගෙන යාමට අවශ්‍ය වෙනවා. සහල්වලට අපි රුපියල් 65ක බද්දක් ගැහුවා කියලා මෙතුමා කීවා. ඒක වැරදියි. 2023 මැයි 18 වැනිදා තමයි ඉස්සරවෙලාම ඒ බද්ද පනවා තිබෙන්නේ. 2024 සැප්තැම්බර් අපි බලයට එන්නේ. සහල් බද්ද තිබෙන එක අපේ රටේ ගොවියාට උත්තරයක්. ගොවියා සහ පාරිභෝගිකයා දෙන්නාම ආරක්ෂා කර ගැනීම සඳහා මේ බද්ද දිගටම තබාගෙන යන්න අපි තීරණය කළා. සතොස සේවකයන් පසුගිය වසරේ පමණක් 500කට ආසන්න සංඛ්‍යාවක් බඳවාගෙන තිබෙනවා. 2023 වසරේදී සේවකයන් 370ක් බඳවාගෙන තිබෙනවා. ඡන්ද නාමයෝජනාවලට කලින් මාසය වන විට 336ක් බඳවාගෙන තිබෙනවා. කොළඹ දිස්ත්‍රික්කයේ සතොස අලෙවිසැල්වල සේවකයන් 259ක් වැඩියි. මාතර 86ක් වැඩියි. පසඳ යාපා සභාපති හිටියේ. මේ බර කාටද? එක් සේවකයකුවත් අපි අයින් කළේ නැහැ. අලුතින් ආරම්භ කරන අලෙවිසල්වලට ඔවුන් යොමු කරනවා. සතොස ලාභ ලැබීම කෙසේ වෙතත් ජනතාවට ලාභෙට බඩු මිලදී ගැනීමට හැකි ආයතනයක් කරනවා. බඩු මිල ගැන කතා කළා. භාණ්ඩ වර්ග 40ක් තිබෙනවා. ඒවායේ මිල සියයට 20කින් අඩු කර තිබෙනවා. පසුගිය මාස තුන තුළදී සැපයුම්කරුවන් 3ක් අසාදු ලේඛනගත කර තිබෙනවා. වගකීම ඉටු කරන්න කීවාම තනතුරු දාලා යනවා. අවුරුදු 11ක් තිස්සේ රුපියල් මිලියන 350 භාණ්ඩ අතරමඟ. එහෙම වෙන්න පුළුවන්ද? ඇමෝනියා නයිට්‍රේට් බෙදා හැරීමට අයිතිය තිබෙන්නේ අපට. ඇමෝනියා මෙට්‍රික්ටොන් එකක් ඩොලර් 1145කට ගෙනාවේ. විවෘත ටෙන්ඩර් දාලා අපි මේක ගෙනාවා. දැන් ඩොලර් 681යි. වසරකට මෙට්‍රික්ටොන් 2000ක් අපි ගේනවා. මෙට්‍රික්ටොන් එකකින් ඩොලර් 464ක් අඩු කර තිබෙනවා. ඩොලර් මිලියනයකට ආසන්න මුදලක් ඉතිරි කළා. මේ ආයතන භාවිතා කරලා ඩීල් දාපු අවස්ථා තිබෙනවා. ස්මාට් බෝඩ් ගේන්න කටයුතු කළා. මේ ආයතන පද්ධතිය ඉදිරියට ගෙනයාමට කටයුතු කරනවා.
මහපොළ භාරකාර අරමුදලත් අපට භාරයි. රුපියල් 5000 ශිෂ්‍යාධාරය රුපියල් 7500ක් දක්වා වැඩි කරනවා. සියයට 50කින් මහපොළ ශිෂ්‍යාධාරය වැඩි කළා. මීට වඩා වැඩි ගාණකින් වැඩි කරන්න තිබුණා. මහපොළ ආයතනයක් පටන් ගත්තා. 1999 සිට මේ ආයතනය පිහිටුවා පවත්වාගෙන ආවා. මේ ආයතනය මොරටුව විශ්වවිද්‍යාලයේ පරිපාලනයට යටත් කරන්න ඕන කියලා තීරණයක් ගන්නවා. භාරකාර මණ්ඩලය තුළ අරුම පුදුම වැඩ වෙනවා. 2015දී ගාමිණී ජයවික්‍රම පෙරේරා මහතා වෙළෙඳ ඇමැතිවරයා ලෙස රැස්වීම තියනවා. මේ රැස්වීමට සාමාන්‍යයෙන් යන්න හැකි වෙන්නේ අගවිනිසුරුවරයා, ඇමැතිවරයා, ඇමැතිවරයාගේ නියෝජිතයන් 3ක්, අධ්‍යාපන අමාත්‍යාංශයේ ලේකම් වගේ අය. ශ්‍රේෂ්ඨාධිකරණයේ අගවිනිසුරුවයාගේ කාමරයේ මේ භාරය කැඳවනවා. සරත් අමුණුගම ඇමැතිවරයා මේකට යනවා. ඔහු බලපෑමක් සහිතව මහපොළ භාරයේ තිබෙන ස්ලිට් ආයතනය පෞද්ගලීකරණය කරන්න තීරණය කරනවා. අවසානයේ ශ්‍රීපවන් අගවිනිසුරුවරයා කියනවා රැස්වීමේ නොගත් තීරණයක් මේ ක්‍රියාත්මක කරන්න හදන්නේ කියලා. ශ්‍රීපවන් අගවිනිසුරුවරයා සභාපතිත්වය දරන රැස්වීමක්. 2015දී මේ ආයතනය භාරදීමට යන විට ස්ලිට් ආයතනයේ ගිණුම් වාර්තා බැලුවා. විගණන වාර්තාවත් මා සතුව තිබෙනවා. ස්ලිට් සතු වූ මුදල් මිලියන 1069ක් රඳවා ගත් ලාභය තිබෙනවා. මිලියන 408කට ගණන් බේරලා පැත්තකට වෙනවා. මිලියන 1069ක ලාභාංශය තිබෙන ආයතනය වෙන අයෙකුට පවරාදීමට තීරණය ගන්නේ ඇමැතිවරයායි, හොරෙන් ගිය ඇමැතිවරයෙකුයි. සමහර නිලධාරීන් වැරදි විදියට බැංකු ගිණුමක් ආරම්භ කර තිබෙනවා. ගාමිණී ජයවික්‍රම ඇමතිවරයාගේ පෞද්ගලික ලේකම්වරයාගේ නමත් බැංකු ගිණුමට දානවා. භාරයේ ගිණුම්වලට එහෙම කරන්න බැහැ. අලුත් කම්පැනි දෙකක් හදලා මිලියන 408ක් දානවා. මිලියන 600ක් ගැන හොයන්න නැහැ. මෛත්‍රීපාල සිරිසේන මහතා තීරණයක් ගන්නවා මෙහි සම්පූර්ණ අයිතිය ස්ලිට් එකට දෙන්න. එහෙම කොහොමද කරන්නේ. එයාගේ දුව ස්ලිට් එකෙන් ඩිප්ලෝමාවක් ගත්තා කියලාද මේක දෙන්න හැදුවේ. ප්‍රශ්නේ තිබෙන්නේ මහපොළ ශිෂ්‍යාධාර අරමුදලෙන් තමන්ගේ සල්ලි දාලා හදපු අධ්‍යාපන ආයතනය 2015 වන විටත් මිලියන 1069ක් රඳවා ගත් ලාභ තිබෙද්දි බැංකු ගිණුම්වල තවත් මිලියන 483ක් තිබෙද්දි මිලියන 408 කට ආපහු දෙන්න කියනවා. ඒ තීරණය ක්‍රියාත්මක කරන්න විගණනය නැවැත්වීමට මෛත්‍රීපාල ජනාධිපතිවරයා මේ තීරණය ගන්නවා. එදා සිට භාරකාර සභාපති පුටුවේ අගවිනිසුරු ශ්‍රීපවන් මහතා වාඩි වෙන්නේ නැහැ. එතුමා මේ ගැන සාක්ෂි දී තිබෙනවා. කෝප් කමිටුවේ මේ ගැන සාකච්ඡා කළා. එදා කෝප් එක නැවැත්තුවා. හිටපු ශ්‍රේෂ්ඨාධිකරණ විනිසුරු විජිත් මලල්ගොඩ මහතා දැන් මෙහි සභාපති ධුරයට පත් කර තිබෙනවා. ඒ ඔස්සේ පරීක්ෂණ පවත්වාගෙන යනවා. දරුවන්ට දීමට තිබූ මහපොළ ශිෂ්‍යාධාර දේශපාලන හිතවතුන්ට ධනය රැස්කරන්න දීලා. ඒ සඳහා කැබිනට් තීරණ අරන් තිබෙනවා. ඒ හොරකමුත් අපි හෙළි කරමින් සිටිනවා. මේ රටේ ජනතාවගේ දේපළ කොල්ලකා තිබෙන ආකාරය ගැන අපි ඉදිරියේදීත් කියනවා.
ලලිත් ඇතුළත්මුදලි නමින් පශ්චාත් උපාධි ආයතනයක් ආරම්භ කරන්න
මන්ත්‍රී රවී කරුණානායක
මහපොළ භාරකාර පදනම මුල් කර ගනිමින් ලලිත් ඇතුළත්මුදලි මහතාගේ නමින් පශ්චාත් උපාධි ආයතනයක් ආරම්භ කරන ලෙස පාර්ලිමේන්තු මන්ත්‍රී රවී කරුණානායක මහතා පාර්ලිමේන්තුවේදී ඊයේ (19) ප්‍රකාශ කළේය.
රවී කරුණානායක මහතා මේ බව සඳහන් කළේ, 2025 වසර සඳහා වන අය වැය කාරක සභා අවස්ථාවේ විවාදයට ඊයේ (19) එක් වෙමිනි.
වැඩිදුරටත් අදහස් දැක්වූ රවී කරුණානායක මහතා මෙසේද පැවසීය.
රටට සේවයක් කරන්න පුළුවන් අමාත්‍යාංශයක් පිළිබඳ වැය ශීර්ෂයක් අද තිබෙන්නේ. රටේ තිබෙන ප්‍රශ්නවලට විසඳුම් මේ අමාත්‍යාංශයෙන් යම් තරමකට ලබාදිය හැකියි. දෙලක්ෂ විසි එක්දහසක සමාගම් තිබෙනවා. සාමාන්‍යයෙන් සමාගමක් ලියාපදිංචි කිරීමට දින පහක් හයක් යනවා.
නමුත් කියන්නේ ඔන්ලයින් කරන්න පුළුවන් කියලා. ඒ නිසා මේ තුළ වෙනසක් ඇති කළ යුතුයි. සුළු හා මධ්‍ය පරිමාණ ව්‍යවසායකයෙක් බවට තරුණයින් පත් කිරීමට අවශ්‍ය වාතාවරණය ලබාදිය යුතුයි. ස්ලිට් එකේ ඉඩම් ප්‍රමාණයක් තිබුණා. මේ ඉඩම තිබෙනවා. මේ තුළ මීට වඩා වාණිජකරණයක් කරන්න කියලා ඒ වෙලාවේ යෝජනා කළා.
අමාත්‍ය වසන්ත සමරසිංහ මහතා –
ස්ලිට් එක අත්හරින තීරණය ගත්තේ 2015 ආණ්ඩුව කාලේ. ශ්‍රීපවන් විනිසුරුතුමා කියනවා, මේක හොරට ගහපු ගිවිසුමක් කියලා.
ඔඩිට් කරන එක නතර කරන්නයි මේ තීරණය අරගත්තේ. ස්ලිට් එක මීට වඩා හොඳට කරන්න තිබුණා. මේක දීලා තිබෙන්නේ හොරට ගහපු ගිවිසුමක් අනුව. මීට වඩා මුදලක් මහපොළ භාරයට හිමිවිය යුතුයි. ඒ සල්ලි යන්නේ කොහෙටද? මට හිතෙන්නේ රවී කරුණානායක මහතාත් මේක රකිනවද කියලා. 2015 තෙක්ම මේක හොඳට කරගෙන ආවා.
රවී කරුණානායක මහතා
මේ ආණ්ඩුව ව්‍යවසායකයින් වෙනුවෙන් කල්පනා කළ යුතුයි. මම රකින්නේ මේකේ තිබෙන වටිනාකම. එයින් සිසුන් 40000ක් විතර එළියට ගිහින් තිබෙනවා. ඒක වටින්නෙ නැද්ද? දක්ෂ අය එළියට යන්නේ. පුළුවන් තරම් පෞද්ගලික විශ්වවිද්‍යාල ආරම්භ කරන්න. අපට ලලිත් ඇතුළත්මුදලි මහතා වෙනුවෙන් පශ්චාත් උපාධි ආයතනයක් ආරම්භ කරන ලෙස ඉල්ලා සිටිනවා. මහපොළ පදනම් කරගනිමින් මේක ආරම්භ කරන්න.
ලංකාව බ්‍රෑන්ඩ්කරණයට ලක්කරන්න. ස්පා සිලෝන්, ඩිල්මා තේ මේ වගේ දේවල් තිබෙනවා. විවෘත ආර්ථිකයෙහි ඇති හොඳ දේවල් අගය කරන්න. නරක දේවල් ඉවත් කරන්න. අපනයන ආදායම බිලියන 16 ක් තිබෙනවා. ඒක බිලියන 36 දක්වා වැඩි කළ යුතුයි.
දරිද්‍රතා රේඛාව මනින ක්‍රමයේ දෝෂ රැසක්
විපක්ෂ නායක සජිත් ප්‍රේමදාස
2025 ජනවාරි මාසයේ නිල දරිද්‍රතා රේඛාව අනුව එක් පුද්ගලයකු සඳහා මාසයක් ජීවත් වීමට රුපියල් 16334ක් බව ජන සංඛ්‍යා ලේඛන දෙපාර්තමේන්තුව තීන්දු කර ඇති බවත් ඒ අනුව හතර දෙනකු සිටින පවුලකට මසකට රුපියල් 65336ක් වැයවන බවත් මෙවන් මුදලකින් ජීවත්විය හැකිදැයි විපක්ෂනායක සජිත් ප්‍රේමදාස මහතා පාර්ලිමේන්තුවේදී ඊයේ (19) විමසීමක් කළේය.
පවුලක් තුළ ආහාර මෙන්ම ආහාර නොවන වියදම් ද ඇති බවත් වත්මන් බඩු මිල සමඟ මෙම ඉලක්කයට යාහැකි ද කියා ගැටලුවක් ඇති බවත් ආනයනික කිරිපිටි ග්‍රෑම් 400 පැකට්ටුව රුපියල් 50කින් ඉහළ දමා ඇති බවද විපක්ෂ නායකවරයා පැවසිය.
වෙළෙද වාණිජ හා සමුපකාර ක්ෂේත්‍රයට අදාළ අය වැය විවාදයේ දී විපක්ෂ නායක සජිත් ප්‍රේමදාස මහතා මේ බව පැවසීය.
එබැවින් රජය මේ සම්බන්ධයෙන් නැවත පසු විපරමක් සිදු කරන ලෙසත් අද වන විට දරිද්‍රතා රේඛාව මනින ක්‍රමය ගැන දෝෂ රැසක් ඇති බවත් විපක්ෂ නායකවරයා පැවසීය. එබැවින් මේ පිළිබඳව නිවැරදිව සොයා බලා දත්ත කේන්ද්‍රීයව රාජ්‍ය ප්‍රතිපත්ති නිර්මාණය කරන ලෙසත් වැරදි දත්ත මත රාජ්‍ය ප්‍රතිපත්ති නිර්මාණය වුවහොත් සියල්ල අවුල් වන බවත් විපක්ෂ නායකවරයා පැවසීය. එමෙන්ම හිටපු රජය අස්වැසුම ලබා දුන්නේද මෙවැනි අවිද්‍යාත්මක දත්ත මත පදනම්ව බැවින් එය අසාර්ථක වූ බවද විපක්ෂ නායකවරයා කීය.
මෙරට දළ දේශීය නිෂ්පාදනයට විශාල දායකත්වයක් ලබා දෙන ක්ෂුද්‍ර කුඩා හා මධ්‍ය පරිමාණ කර්මාන්තකරුවන් අද බරපතළ ගැටලුවලට මුහුණ දෙන බවත් හිඟ ණය බොල් ණය ආදී ගැටලු ආදී ත්‍රිත්ව ඛේදවාචකයන් නිසා නිර්මාණය වූ තත්ත්වය තුළ දඩ පොලී වැල් පොලී එකතු වී මොවුන් ගැටලු රැසකට මුහුණ දී ඇති බවත් විපක්ෂ නායකවරයා පැවසීය.
විදුලිවැට නඩත්තුවට සහායකයන් 3530ක් බඳවා ගන්නවා
නියෝජ්‍ය ඇමැති ඇන්ටන් ජයකොඩි
දිවයින පුරා ඇති විදුලිවැට නඩත්තුකර පවත්වාගෙන යාම සඳහා විදුලිවැට සහායකයන් 3530ක් බඳවාගන්නා බව පරිසර නියෝජ්‍ය අමාත්‍ය ඇන්ටන් ජයකොඩි මහතා පාර්ලිමේන්තුවේදී ඊයේ (19) ප්‍රකාශ කළේය.
විදුලි වැට නඩත්තුව සඳහා බහුකාර්ය සේවකයන් බඳවා ගැනීමට එරෙහිව ශ්‍රේෂ්ඨාධිකරණය විසින් අතුරු තහනම් නියෝගයක් පනවා තිබූ බවත් 2024-12-19 දින එම තහනම් නියෝගය ඉවත්කර ඇති බැවින් මෙම පිරිස බඳවා ගැනීමට කටයුතු කරන බවත් නියෝජ්‍ය ඇමැතිවරයා පැවසීය.
මෙම පිරිස බඳවා ගැනීම වෙනුවෙන් අවශ්‍ය අනුමැතිය ලබා දෙන ලෙස රාජ්‍ය සේවා කොමිෂන් සභාව වෙත 2024-12-24 දින නැවත වතාවක් ලිපියක් යොමුකර ඇති බවද නියෝජ්‍ය ඇමැතිවරයා පැවසීය. නියෝජ්‍ය අමාත්‍ය ඇන්ටන් ජයකොඩි මහතා මේ බව සඳහන් කළේ පාර්ලිමේන්තු මන්ත්‍රී දිනේෂ් හේමන්ත මහතා මතු කරනලද ප්‍රශ්නයකට පිළිතුරු දෙමිනි.
එහිදි වැඩිදුරටත් අදහස් දැක්වූ නියෝජ්‍ය අමාත්‍ය ඇන්ටන් ජයකොඩි මහතා සඳහන් කළේ වනජීවී දෙපාර්තමේන්තුවට අවශ්‍ය නිලධාරින් රජයේ උපාධිධාරින් බඳවා ගැනීමේ වැඩසටහන යටතේ බඳවා ගැනීමට අපේක්ෂා කරන බවයි.
වැඩිදුරටත් අදහස් දැක්වූ නියෝජ්‍ය ඇමැතිවරයා මෙසේද පැවසීය.
මෙරට ඇති විදුලි වැට ආරක්ෂා කිරීම වෙනුවෙන් බඳවාගෙන ඇති පුහුණු අලිවැට සහායකයන් සංඛ්‍යාව 3530ක්. වනජීවී දෙපාර්තමේන්තුවේ ස්වේච්ඡා මාර්ගෝපදේශකයන් ලෙස කටයුතු කරන නිලධාරින් වනජීවී දෙපාර්තමේන්තුවට ස්ථිර නිලධාරින් ලෙස බඳවාගැනීම හා ස්ථිර කිරීම සම්බන්ධයෙන් බහුකාර්ය සේවකයන් බඳවා ගැනීම තහනම් කරමින් ශ්‍රේෂ්ඨාධිකරණය අතුරු නියෝගයක් නිකුත් කර තිබුණා. එය 2024-12-19 දින ඉවත් කිරීමට කටයුතු කර තිබෙනවා. ඒ අනුව විදුලි වැට නඩත්තු කටයුතු වෙනුවෙන් අවශ්‍ය පිරිස් බඳවා ගැනීම වෙනුවෙන් අවශ්‍ය කටයුතු සිදු කරමින් තිබෙනවා. අතුරු නියෝගය ඉවත් කිරීමත් සමඟ අදාළ බඳවා ගැනීම් පටිපාටිය අනුමත කර එවන ලෙස නැවතත් රාජ්‍ය සේවා කොමිෂන් සභාවට ඉල්ලීම් කර ඇත. ඒ වගේම සුදුසුකම් සහිත පිරිස් වෙනුවෙන් සම්මුඛ පරීක්ෂණ සිදුකර අවසන්. පත්වීම් ලිපි නිකුත් කිරීමට අදාළ නාමලේඛන පරිගණකගත කර තිබෙනවා.
අතුරු නියෝග ඉවත්කිරීමෙන් පසුව අදාළ අනුමැතීන් කඩිනමින් ලබා දෙන ලෙස රාජ්‍ය සේවා කොමිෂන් සභාවට 2024-12-24 දිනැති නැවත ලිපියක් යොමුකර තිබෙනවා. වැටුප් ගෙවීම සඳහා සහායකයන්ගේ බැංකු තොරතුරු ප්‍රධාන කාර්යාලය වෙත ගෙන්වා පරිගණකගත කර ඇත.
පාර්ලිමේන්තු මන්ත්‍රී දිනේෂ් හේමන්ත මහතා
සමස්ත ලංකාවටම බලපාන ප්‍රශ්නයක් අලි මිනිස් ගැටුම. මේක බරපතළ ගැටලුවක්. වනජීවී නිලධාරින්ගේ ප්‍රශ්නයක් නෙවෙයි. ප්‍රමාණවත් නිලධාරින් පිරිසක් නැහැ.
නියෝජ්‍ය අමාත්‍යවරයා
කඩිනමින් දිවයින පුරා ඇති විදුලි වැට නඩත්තු කිරීම සඳහා විදුලිවැට සහායකයින් 3530ක් බඳවා ගන්නවා. ඒත් එක්කම මේ වෙනුවෙන් සිවිල් ආරක්ෂක නිලධාරින් යොදවා තිබෙනවා. සමහර ප්‍ර‍ෙද්ශවල හිඟය පියවා ගන්නවත් පිරිස නැහැ. ඒ වගේම තත්කාලීන සේවක පිරිසක්ද සිටිනවා. ඒ අයත් ස්ථිර කිරීම සම්බන්ධයෙන් සලකා බලනවා.
උපාධිධාරින් 35000ක් බඳවා ගැනීම වෙනුවෙන් රජය ගෙන ඇති තීරණය යටතේ වනජීවී දෙපාර්තමේන්තුව සඳහා සුදුසුකම් සපුරන උපාධිධාරින් බඳවාගෙන නිලධාරින්ගේ හිඟය පියවා ගැනීමට අපේක්ෂා කරනවා. මේ වසර අවසානය වනවිට නිලධාරින් හා සේවක හිඟය පියවා ගැනීමට හැකිවේ යැයි කියා අපි අපේක්ෂා කරනවා.
විපක්ෂයට චෝදනා නොකර ආණ්ඩුවේ මාස 6ක ප්‍රගති වාර්තාව දෙන්න
මන්ත්‍රී නලීන් බණ්ඩාර ජයමහ
විපක්ෂයට චෝදනා කරන්නේ නැතිව ආණ්ඩුව දැන් කළ යුත්තේ ඔවුන් මාස හයක් තිස්සේ කළ ප්‍රගති වාර්තාව ඉදිරිපත් කිරීම යැයි සමගි ජන බලවේගයේ කුරුණෑගල දිස්ත්‍රික් මන්ත්‍රී නලීන් බණ්ඩාර ජයමහ මහතා පාර්ලිමේන්තුවේ දී ඊයේ (19) පැවසීය.
අය-වැය තෙවැනි වර කියවීමේ විවාදයට එක්වෙමින් මන්ත්‍රීවරයා මේ බව කියා සිටියේය.මන්ත්‍රීවරයා මෙසේද පැවසුවේය.
සහල් ඇටයක්වත් ගේන්නේ නැහැ කීවා. පොරොන්දු දුන්නා ආණ්ඩුව බලයට එන්න කලින්. මහා පරිමාණ සහල් ව්‍යාපාරිකයන්ට මේ ආණ්ඩුව බෝනස් එකක් දුන්නා. සහල් ගෙනත් වෙළඳපොළ තුළ තරගකාරි තත්ත්වයක් ඇති කරන්න තිබුණා. බද්ද අඩු කළා නම් ආනයනික සහල් වෙළඳපොළට එනවා. එසේ වුණා නම් මහා පරිමාණ වෙළඳ ව්‍යාපාරිකයන්ට තරගයක් ඇති වෙනවා. එසේ වුණා නම් පාරිභෝගිකයාට සහන ලැබෙනවා. සතොස ශක්තිමත් කර ගමට ගෙනියන්න. ආණ්ඩුවට සහාය දෙන විපක්ෂයක් සිටිනවා. ඒ නිසා ආණ්ඩුවට වැඩ කරන්න ලොකු අවස්ථාවක් තිබෙනවා. තිබෙන ප්‍රශ්න අමතක කරන්න විපක්ෂයට අවලාද නඟන තත්ත්වයක් අපට පේනවා. හඳුන්නෙත්ති මහතා සජිත් ප්‍රේමදාස මහතාට චෝදනාවක් කරනවා අපි ඊයේ දැක්කා. බොරු අවලාද කියන්න එපා. ආණ්ඩුවේ ප්‍රගති වාර්තාව දැන් ඉදිරිපත් කරන්න. ආයෝජන කලාප අලුතින් බිහි කරනවා කියලා ආණ්ඩුව කියනවා. බිංගිරියේ අලුතින් ආයෝජන කලාපයක් හදනවා කියලා ආණ්ඩුව බොරු කියනවා. බිංගිරියේ මීට කලින් එය පටන් ගත්තේ. පළාත් පාලන මැතිවරණයෙන් ජය ගන්නේ සමගි ජන බලවේගය කියලා මම අද කියනවා. අපේ සභාපතිවරු නවකයන්ට අවස්ථාව දෙන්න ඒ තනතුරුවලින් ඉවත් වෙනවා.
කලින් ආණ්ඩුවලින් දීපු වාහන බලපත් 8ක් ජවිපෙ මන්ත්‍රීවරුත් ගත්තා
මන්ත්‍රී එස්.එම්. මරික්කාර්
ඉතිහාසය පුරා ආණ්ඩුවලින් ලබා දුන් වාහන බලපත්‍ර ජනතා විමුක්ති පෙරමුණේ මන්ත්‍රීවරුන් ද ලබා ගෙන ඇති බව සමගි ජන බලවේගයේ පාර්ලිමේන්තු මන්ත්‍රී එස්.එම්.මරික්කාර් මහතා පාර්ලිමේන්තුවේදී ඊයේ (19) ප්‍රකාශ කළේය.
පාර්ලිමේන්තුවේදී ඊයේ (19) පැවති කාරක සභා අවස්ථාවේ විවාදයේදී අදහස් පළ කරමින් එස්.එම්. මරික්කාර් මහතා මේ බව සඳහන් කළේය.
හිටපු ජනාධිපති රනිල් වික්‍රමසිංහ මහතා වාහන බලපත්‍රයක් ලබා නොදීම සම්බන්ධයෙන් මෙපමණ කේන්ති ගැනීමට අවශ්‍ය නොමැති බව ඊට ප්‍රතිචාර දක්වමින් වෙළද, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ මහතා පැවසීය.
සමගි ජන බලවේගයේ පාර්ලිමේන්තු මන්ත්‍රී එස්.එම්. මරික්කාර් මහතා
මේ ඉතිහාසය පුරාම ආණ්ඩුවලින් ලබාදුන් වාහන පර්මිට් ජේ.වී.පී. එක ගත්තා. 2015 ගත්ත පර්මිට් මෙන්න. බිමල් රත්නායක ඇමැතිවරයා ගත්ත පර්මිට් එක මෙන්න. සුනිල් හඳුන්නෙත්ති ඇමැතිතුමා ගත්ත පර්මිට් එක මෙන්න. අනුර කුමාර දිසානායක ගත්ත පර්මිට් එක මෙන්න. පර්මිට් 08ක් අරන් තියෙනවා. සියලු පර්මිට් ගත්තා. ඒ නිසා ඒ ගැන කතා කරන්න එන්න එපා. අපිට හොරා කියන්න බෑ. අපි ණයත් නෑ බයත් නෑ.
වෙළද, වාණිජ, ආහාර සුරක්ෂිතතා සහ සමුපකාර සංවර්ධන අමාත්‍ය වසන්ත සමරසිංහ මහතා
වාහන පර්මිට් එක හම්බුණේ නෑ කියලා එච්චර තරහා ගන්න ඕනි නෑ. රනිල් වික්‍රමසිංහ මහත්මයා වාහන පර්මිට් එක දුන්නේ නෑ කියලා.
සෞම්‍යමූර්ති තොණ්ඩමන් පදනම වෘත්තීය පුහුණු අමාත්‍යාංශයට පවරා ගන්නවා
නියෝජ්‍ය අමාත්‍ය සුන්දරලිංගම් ප්‍රදීප්
හැටන්හි පිහිටි සෞම්‍යමූර්ති තොණ්ඩමන් පදනම වෘත්තීය පුහුණු අමාත්‍යාංශය යටතට පත්කර ගැනීමට අවධානය යොමු වී ඇති බවත් නෝර්වුඩ් පිහිටි තොණ්ඩමන් ක්‍රීඩාංගණය ක්‍රීඩා අමාත්‍යාංශය යටතට පත්කරන බවත් වැවිලි කර්මාන්ත හා යටිතල පහසුකම් නියෝජ්‍ය අමාත්‍ය සුන්දරලිංගම් ප්‍රදීප් මහතා පාර්ලිමේන්තුවේදී ඊයේ (19) ප්‍රකාශ කළේය.මේ සම්බන්ධයෙන් අග්‍රාමාත්‍යවරයා සහ ක්‍රීඩා අමාත්‍යාංශය සමඟ මේ වන විට සාකච්ඡා සිදු කරන බවද නියෝජ්‍ය ඇමැතිවරයා පැවසීය.
නියෝජ්‍ය අමාත්‍ය සුන්දරලිංගම් ප්‍රදීප් මහතා මේ බව සඳහන් කළේ පාර්ලිමේන්තු මන්ත්‍රී මංජුල සුරවීර මහතා මතු කරන ලද ප්‍රශ්නයකට පිළිතුරු දෙමිනි.
සෞම්‍යමූර්ති තොණ්ඩමන් අනුස්මරණ භාරය යනු පාර්ලිමේන්තු පනතක් මඟින් සංස්ථාගත කරන ලද සංස්ථාවක් වන අතර එම භාරය 2005 අංක 19 දරන පාර්ලිමේන්තු පනත මඟින් ස්ථාපිත කර ඇති බවද හෙතෙම පැවසීය. තොණ්ඩමන් පුහුණු මධ්‍යස්ථානය, තොණ්ඩමන් සංස්කෘතික මධ්‍යස්ථානය, තොණ්ඩමන් ක්‍රීඩා මධ්‍යස්ථානය සහ ප්‍රජාශක්ති මධ්‍යස්ථානය සඳහා නිලධාරීන් 217 දෙනෙකු පත් කර ඇති අතර දැනට මෙම සමාගමේ පුද්ගලයින් 181 දෙනෙකු සේවය කරන බවද හෙතෙම පැවැසිය. තොණ්ඩමන් පුහුණු මධ්‍යස්ථානයේ ගොඩනැඟිලි 22ක් ඇති අතර පරිගණක 54ක් සහ මේස සහ පුටු 940ක් ඇතුළු ගෘහ භාණ්ඩ ඇති බවද අනාවරණය කළේය. ඒ අනුව අනාගතයේදී නුවරඑළිය දිස්ත්‍රික්කයේ ජනතාවගේ ප්‍රයෝජනය සඳහා තොණ්ඩමන් ක්‍රීඩාංගණය භාවිත කරන බවද නියෝජ්‍ය ඇමැතිවරයා පැවසීය.
